ប្រជាពលរដ្ឋដែលមានក្បាលដីចំនួន២,៤៤០ក្បាលដីនៅក្នុងភូមិធ្លកអណ្តូង សង្កាត់ស្លក្រាម ក្រុង/ខេត្តសៀមរាប បានសម្តែងសេចក្តីសប្បាយរីករាយបំផុតដែលដីធ្លីផ្ទះសម្បែងរបស់ពួកគាត់បានទទួលស្គាល់ដោយស្របច្បាប់របស់រាជរដ្ឋាភិបាល។
នៅក្នុងពិធីប្រកាសចែកវិញ្ញាបនបត្រសម្គាល់ម្ចាស់អចលនវត្ថុ(ប័ណ្ណកម្មសិទ្ធ ) នាព្រឹកថ្ងៃទី២៣ ខែសីហា ឆ្នាំ២០១៩ នេះ លោក ហ៊ី សាយ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តសៀមរាប បានមានប្រសាសន៍ថា ថ្ងៃនេះបងប្អូនប្រជាពលរដ្ឋដែលមានទីតាំងស្ថិតក្នុងភូមិត្តអណ្តូង សង្កាត់ក្រាម ក្រុងសៀមរាប ខេត្តសៀមរាប ត្រូវបានទទួលវិញ្ញាបនបត្រសម្គាល់ម្ចាស់អចលនវត្ត (ប័ណ្ណកម្មសិទ្ធិ)ចំពោះតែក្បាលដីរបស់បងប្អូនប្រជាពលរដ្ឋណា ដែលបានបំ ពេញនូវលក្ខខណ្ឌគ្រប់គ្រាន់តាមនីតិវិធីនិងការចូលរួមចំណែកក្នុងការរៀបចំកែលម្អសោភ័ណ្ឌភាពសណ្តាប់ធ្នាប់របៀបរៀបរយសាធារណៈតែប៉ុណ្ណោះនិងចំពោះតែក្បាលដីណាដែលមិនមានទំនាស់តវ៉ា ឬជាប់ពាក់ព័ន្ធនឹងបុរាណដ្ឋាន។
លោក ហ៊ី សាយ ក៍បានមានប្រសាសន៍បញ្ជាក់បន្ថែមទៀតថាជាក់ស្តែង ភូមិធ្លកអណ្តូងមានក្បាលដីសរុបចំនួន ៣,០២៤ ក្បាលដី ដែលក្នុងនោះក្បាលដីចំនួន២,៤៤០ ត្រូវបានទទួលប័ណ្ណកម្មសិទ្ធិហើយនិងក្បាលដីមួយចំនួនទៀតដែលនៅសល់ ពុំទាន់អាចចេញប័ណ្ណជូនបានឡើយដោយក្បាលដីទាំងនោះមានការពាក់ព័ន្ធក្បាលដីគ្មានទិន្នន័យ, ក្បាលដីជាប់ពាក់ព័ន្ធបណ្តឹងទប់ស្កាត់ , ការជំទាស់តវ៉ា ពាក់ព័ន្ធនឹងផ្លូវ ប្រឡាយ ហើយនិងក្បាលដីមួយចំនួនទៀតជាប់បុរាណដ្ឋានជាដើម ។
មានប្រសាសន៍ក្នុងពិធីនេះដែរ លោក ពិន ប្រាកដ អភិបាលរងនៃគណៈអភិបាលខេត្តសៀមរាប បានមានប្រសាសន៍ថ្លែងការកោតសរសើរ ចំពោះក្រុមការងារចុះបញ្ជីដីធ្លី និងអ្នកពាក់ព័ន្ធទាំងអស់ ដែលខិតខំសម្រេចកិច្ចការនេះ ដោយការទទួលខុសត្រូវ និងតម្លាភាព។ លោក ក៍បានគូសបញ្ជាក់ថា ក្បាលដីដែលបងប្អូន បានចុះបញ្ជី នៅក្នុងសៀវភៅគោលបញ្ជីដីធ្លី និងទទួលបានប័ណ្ណកម្មសិទ្ធិនេះ គឺបានបំពេញលក្ខណ្ឌគ្រឹះដ៏រឹងមាំ ដែលធានាដោយរដ្ឋ និង ការពារដោយច្បាប់ ហើយក៏ជាលក្ខណ្ឌសំខាន់ សម្រាប់ការប្រើប្រាស់ប័ណ្ណដី ។ ដូច្នេះការចុះបញ្ជី គឺជាការពង្រឹងសុវត្ថិភាព នៃការកាន់កាប់ដីធ្លី ដែល នឹងជម្រុញការប្រើប្រាស់ដីធ្លីឲ្យអស់សក្ដានុពល ហើយកត្តានេះ ពិតជាបានបញ្ចប់ ជម្លោះ និងវិវាទដីធ្លី ។
លោកអភិបាលរងខេត្តបានបញ្ជាក់ថា ប័ណ្ណកម្មសិទ្ធិ ដែលបងប្អូន ទទួល បាននៅថ្ងៃនេះ គឺជាឯសារមួយសំខាន់ណាស់គឺជាឯកសារតំណាងឲ្យទ្រព្យរបស់បងប្អូន ជា ឯកសារតំណាងឲ្យសិទ្ធិ នៃកម្មសិទ្ធផ្ដាច់មុខ របស់កម្មសិទ្ធិករ លើដីធ្លីរបស់ខ្លួន ក្នុងការ ប្រើ ប្រាស់ និងអាស្រ័យផល ក្នុងការលក់ដូរ ការផ្ទេរទៅអ្នកដ៍ទៃ ការដាក់ធានាខ្ចីប្រាក់ និង ការផ្ទេរ ទៅ ឲ្យកូនចៅ។
លោក ពិន ប្រាកដ ក៍បានមានប្រសាសន៍បញ្ជាក់បន្ថែមទៀតថា ចំពោះក្បាលដីរបស់បងប្អូនប្រជាពលរដ្ឋដែលជាប់ពាក់ព័ន្ធនឹងទំនាស់ គណៈកម្មាការរដ្ឋបាលខេត្តនឹងបន្តដោះស្រាយជូនជាបន្តបន្ទាប់ ហើយក្បាលដីដែលជាប់ពាក់ព័ន្ធ នឹង បុរាណដ្ឋាននោះ រដ្ឋបាលខេត្តបាននឹងបន្តសហការជាមួយអាជ្ញាធរជាតិអប្សារា និង មន្ទីរ អង្គភាពពាក់ព័ន្ធ ដើម្បីពិនិត្យ និងដោះស្រាយ តាមនិតិវិធីបន្ថែមទៀត ហើយ រដ្ឋបាលខេត្តក៍សូមធ្វើការអធ្យាស្រ័យចំពោះ បងប្អូន ប្រជាពលរដ្ឋដែលពុំទាន់ទទទួលបានប័ណ្ណកម្មសិទ្ធសូមមេត្តារងចាំរដ្ឋបាលខេត្តនឹងបន្តដោះ ស្រាយជូនអោយបានចប់ក្នុងពេលឆាប់ៗខាងមុខនេះផងដែរ ៕
អត្ថបទ និង រូបភាព ៖ ទ្រា ពន្លឺ
