ប្រធានាធិបតី ប្រេស៊ីល លោក Jair Bolsonaro បានត្អូញថាប្រទេសរបស់លោកខ្វះសមត្ថភាពពន្លត់អគ្គីភ័យព្រៃអាម៉ាហ្សូនកាលពីម្សិលមិញ ថ្ងៃទី២២ ខែសីហា ឆ្នាំ២០១៩ ហើយលោកបានប្រាប់អ្នកសារព័ត៌មានថា៖ «ព្រៃអាម៉ាហ្សូនមានទំហំធំជាងអឺរ៉ុបទាំងមូល តើយើងអាចប្រឆាំងនឹងអគ្គីភ័យនៅតំបន់ដែលមានទំហំប៉ុននេះតាមរបៀបណា? យើងមិនមានធនធានគ្រប់គ្រាន់សម្រាប់ដោះស្រាយរឿងនេះទេ
អគ្គីភ័យព្រៃអាម៉ាហ្សូនបានចាប់ផ្ដើមកាលពីដើមខែសីហានេះ ហើយបានបន្តឆេះរហូតដល់សព្វថ្ងៃ។
ទីក្រុងធំជាងគេបំផុតក្នុងប្រទេសប្រេស៊ីល បានប្រែក្លាយជាងងឹតស្លុបភ្លាមៗនៅកណ្ដាលថ្ងៃត្រង់ក្រោយពេលដែលផ្សែងខ្មៅពីភ្លើងឆេះព្រៃអាម៉ាហ្សូនគ្របដណ្ដប់ទីក្រុងកាលពីថ្ងៃចន្ទកន្លងទៅ។
ហេតុការណ៍នេះកើតឡើងដោយសារភ្លើងឆេះព្រៃអាម៉ាហ្សូនដែលមានចម្ងាយរាប់ពាន់គីឡូម៉ែត្រឯណោះ។ ផ្សែងដែលហ៊ុយមកគ្របដណ្ដប់ទីក្រុងធ្វើឲ្យប្រែជាងងឹតស្លុបនេះ បានបង្កឲ្យមានការព្រួយបារម្ភជាខ្លាំងពីអ្នកប្រើប្រាស់បណ្ដាញសង្គមអំពីភ្លើងដែលកំពុងឆេះព្រៃតំបន់ត្រូពិចធំជាងគេបង្អស់ក្នុងពិភពលោកដែលត្រូវបានគេស្គាល់ថាជា “សួតរបស់ផែនដី”។
បើគិតមកទល់ពេលនេះ ស្ថិតិបង្ហាញថាភ្លើងបានឆេះព្រៃអស់ប្រមាណជាជាង ២ ២០០គីឡូម៉ែត្រការ៉េហើយក្រោយបន្ដឆាបឆេះអស់រយៈពេល ២សប្ដាហ៍ ខណៈពេលដែលមានការរិះគន់ជាច្រើន និងអ្នកវិទ្យាសាស្ត្រមួយចំនួនបានបន្ទោសលោក Bolsonaro ជាអ្នកធ្វើឲ្យមានការឆេះព្រៃដល់ថ្នាក់នេះ ព្រោះតាំងពីលោកធ្វើប្រធានាធិបតីមក លោកបានគាំទ្រការឈូសឆាយព្រៃដើម្បីធ្វើជាដីកសិកម្ម ខណៈនោះដែល កាលពីអាទិត្យមុនរដ្ឋាភិបាលអាល្លឺម៉ង់ និងន័រវែសបានផ្ដាច់ថវិកាជំនួយថែរក្សាព្រៃអាម៉ាហ្សូនក្រោយពីបានឃើញភាពអសកម្មរបស់រដ្ឋាភិបាលលោក Bolsanaro៕
អត្ថបទ និងរូបភាព web sabay
កែសម្រួល ហាំ ម៉េងហួត
