ព្រៃឈើមានតួនាទីយ៉ាងសំខាន់ ក្នុងការជួយថែរក្សាដំណើរការនៃប្រព័ន្ធអេកូឡូស៊ី ជួយកាត់បន្ថយឥទ្ធិពលជាអវជ្ជមានពីការប្រែប្រួលអាកាសធាតុ និងទប់ស្កាត់ទឹកជំនន់ ខ្យល់ ព្យុះ ការហូរច្រោះដី គ្រោះរាំងស្ងួត និងជួយស្រួបយកជាតិពុលពីបរិយាកាសជាដើម និងផ្តល់នូវផលអនុផលព្រៃឈើ ជាច្រើន ដល់ប្រជាពលរដ្ឋដោយផ្ទាល់ ដែលរួមចំណែកកាត់បន្ថយភាពក្រីក្ររបស់ប្រជាសហគមន៍។
យោងតាមរបាយការណ៍របស់នាយកដ្ឋានជីវភាពសហគមន៍ នៃក្រសួងបរិស្ថាន បានឲ្យដឹងថា តាមគម្រោងជំរុញភាពធន់របស់សហគមន៍ជនបទរស់នៅក្នុងតំបន់ការពារធម្មជាតិទៅនឹងការប្រែប្រួលអាកាសធាតុនៅកម្ពុជា នាយកដ្ឋានជីវភាពសហគមន៍ នៃអគ្គនាយកដ្ឋានសហគមន៍មូលដ្ឋាន បានផ្តល់កូនឈើព្រៃចំនួន ២៥០០០(ពីរម៉ឺនប្រាំពាន់)ដើម ដើម្បីដាំក្នុងព្រៃសហគមន៍តំបន់ការពារធម្មជាតិជប់តាសុក ស្ថិតក្នុងឃុំខ្នងភ្នំ ស្រុកស្វាយលើ ខេត្តសៀមរាប ដែលពិធីដាំកូនឈើនេះបានធ្វើឡើងនៅថ្ងៃទី២៣ ខែសីហា ឆ្នាំ២០១៩នេះ។
មានប្រសាសន៍នៅក្នុងពិធីដាំកូនឈើទាំង២៥០០០ដើមនេះ ឯកឧត្តម សៅ សុភាព រដ្ឋលេខាធិការក្រសួងបរិស្ថាន បានលើកឡើងថា៖ ការដាំស្តារកូនឈើចំនួន ២៥០០០ដើម ឡើងវិញនៅសហគមន៍តំបន់ការពារធម្មជាតិជប់តាសុក នៅលើខ្នងភ្នំគូលេននេះ បានបង្ហាញឱ្យឃើញនូវការគាំទ្រយ៉ាងខ្លាំងពីប្រជាសហគមន៍ និងអាជ្ញាធរមូលដ្ឋាន ដែលបានចាត់ទុកការដាំកូនឈើគឺជាកាព្វកិច្ចចំបងរបស់យើងគ្រប់គ្នា។
ព័ត៌មានជាតិ ថ្មីៗ
ជាមួយគ្នានេះ ឯកឧត្តម បានលើកទឹកចិត្តសហគមន៍ចូលរួមពង្រឹង និងកាអនុវត្តច្បាប់ស្តីពីតំបន់ការពារធម្មជាតិ ក្នុងការគ្រប់គ្រងធនធានធម្មជាតិក្នុងសហគមន៍ឲ្យមាននិរន្ត ភាព ក្នុងការទប់ស្កាត់ការកាប់ទន្ទ្រានដីព្រៃធ្វើជាកម្មសិទ្ធិ ការឈប់បបាញ់សត្វ ហើយរួមគ្នាការការពារព្រៃឈើ ក៍ដូចធនធានធម្មជាតិឲ្យបានកាន់តែសំបូរបែប ការបង្កើនគម្របព្រៃតាមរយៈការដាំស្តារព្រៃឈើឡើងវិញ នៅក្នុងតំបន់ការពារធម្មជាតិ ដើម្បីរួមចំណែកកាត់បន្ថយនូវការប្រែប្រួលអាកាសធាតុ។
ឯកឧត្តមរដ្ឋលេខាធិការក្រសួងបរិស្ថាន បានសង្កត់ធ្ងន់ថា ប្រជាសហគមន៍អាចដកហូតប្រើប្រាស់ផល- អនុផលព្រៃឈើ សម្រាប់បំពេញតម្រូវការក្នុងជីវភាពរស់នៅប្រចាំថ្ងៃ ពិសេសសហគមន៍ត្រូវបង្កើត និងផ្តល់សេវាទេសចរណ៍ធម្មជាតិ សម្រាប់ផ្គត់ផ្គង់ក្នុងជីវភាព គ្រួសារ និងការអភិវឌ្ឍសហគមន៍ឱ្យបានកាន់តែប្រសើរឡើង។
សូមបញ្ជាក់ថា៖ការដាំកូនឈើថ្ងៃនេះ រៀបចំឡើងដោយក្រសួងបរិស្ថាន តាមរយៈគម្រោងជម្រុញភាពធន់របស់សហគមន៍ជនបទរស់នៅក្នុងតំបន់ការពារធម្មជាតិ ដើម្បីបន្សាំទៅនឹងការប្រែប្រួលអាកាសធាតុ នៅលើ៣ទីតាំង មានផ្ទៃដី ១៦ហិចតា បានមកពីការដកហូតពីការកាប់ទន្ទ្រានដីព្រៃ នៅតាមសហគមន៍តំបន់ការពារធម្មជាតិនៅក្នុងខេត្តសៀមរាប និងខេត្តព្រះវិហារ។
លោក នាក់ ណេរ៉ុន អភិបាលរងខេត្តសៀមរាបបានឱ្យដឹងថា៖ ពិធីដែលយើង បាននិងកំពុងតែប្រារព្ធធ្វើនាពេលនេះពេល នេះមានអត្ថន័យដ៏ជ្រាលជ្រៅ ខ្លាំង ណាស់ សម្រាប់ចលនាបំផុសស្មារតីប្រជាពលរដ្ឋ មន្ត្រីរាជការ អាជ្ញាធរមូលដ្ឋាន លោកគ្រូ-អ្នកគ្រូ សិស្សានុសិស្ស កងកម្លាំងប្រដាប់អាវុធ ប្អូនៗ ក្មួយៗ និងបងប្អូនប្រជាពលរដ្ឋ យើងទាំងអស់ឱ្យចេះស្រឡាញ់ព្រៃឈើ ចូលរួមដាំដុះ និងការពារព្រៃឈើ កុំបំភ្លេចបំផ្លាញ កាប់ឆ្ការ ដុត ហ៊ុព័ទ្ធដីព្រៃជាដើម។
លោកអភិបាលរងខេត្ត មានប្រសាសន៍ទៀតថា ការរៀបចំកម្មវិធីដាំកូនឈើក្នុងឧទ្យានជាតិនេះ គឺជាការដង្ហែតាមព្រះរាជតំរិះដ៏ខ្ពង់ខ្ពស់របស់ ព្រះករុណា ព្រះបាទសម្តេច នរោត្តម សីហមុន្នី ព្រះមហាក្សត្រ នៃព្រះរាជាណាចកម្ពុជា ជាទីគោរព សក្ការៈដ៏ខ្ពង់ខ្ពស់ ដែលព្រះអង្គតែងតែយកព្រះទ័យទុកដាក់ដល់បញ្ហាព្រៃឈើ បរិស្ថាន និងការដាំដើមឈើជាអាទិភាពចំបង ហើយព្រះអង្គតែងតែយាង ចូលរួមជាព្រះរាជាអធិបតីដ៏ខ្ពង់ខ្ពស់ក្នុងពិធីបុណ្យរុក្ខទិវាជាតិ ជារៀងរាល់ឆ្នាំ។ ដូច្នេះការសហការរៀបចំឱ្យមានកម្មវិធីដាំកូនឈើ នាឱកាសនេះ គឺបានឆ្លុះបញ្ចាំងឱ្យឃើញ ពីការ ខិតខំប្រឹងប្រែងយ៉ាងសកម្មរបស់រាជរដ្ឋាភិបាល ក្នុងការគ្រប់គ្រង ការអភិរក្សធនធានព្រៃឈើ គឺជាអាទិភាព ចំបងរបស់រាជ-រដ្ឋាភិបាល។ គោលដៅយូរអង្វែងរបស់ប្រទេសជាតិយើង គឺការអភិរក្ស និងការគ្រប់គ្រង ធនធានធម្មជាតិ ជីវចំរុះ និងប្រព័ន្ធអេកូឡូស៊ី ប្រកបដោយប្រសិទ្ធភាព និងបានរួមចំណែកក្នុងការកាត់ បន្ថយភាពក្រីក្ររបស់ប្រជាជន និងការអភិវឌ្ឍន៍សេដ្ឋកិច្ចសង្គមឱ្យបានប្រសើរឡើង។ ធនធានធម្មជាតិ គឺជាប្រភពធនធានមួយដ៏រស់រវើក និងមិនចេះរីងស្ងួត ប្រសិនបើយើង ទាំងអស់គ្នាចេះគ្រប់គ្រង ការពារ និងអភិរក្សឱ្យបានសមស្រប។ មួយវិញទៀត ធម្មជាតិទាំងឡាយអាចរស់នៅលើភពផែនដីយើងនេះបាន ដោយ មិនចាំបាច់មានមនុស្ស តែមនុស្ស សត្វទាំងឡាយ មិនអាចរស់នៅដោយខ្វះធម្មជាតិបានទេ។
លោកអភិបាលរងខេត្ត បន្តថា ការចូលរួមយ៉ាងច្រើនកុះកររបស់ លោក លោកស្រី នាពេលនេះ បានបង្ហាញឱ្យឃើញ នូវការគាំទ្រដ៏ឧត្តុង្គឧត្តមគ្រប់មជ្ឈដ្ឋាន ដល់ចលនាដាំកូនឈើ ដោយចាត់ទុកចលនានេះ ជាកាតព្វកិច្ចដ៏ចំបង ផ្សារភ្ជាប់នឹងសេចក្តីត្រូវការចាំបាច់ នៃជីវភាពរស់នៅផ្ទាល់របស់ប្រជារាស្ត្រក្នុងការប្រកបរបរទទួលទាន និងនាំមកនូវរុក្ខជាតិបៃតងដ៏សែនមនោរម្យនៅលើទឹកដីខេត្តសៀមរាបរបស់យើង។ សរុបមកការរៀបចំកម្មវិធីដាំកូនឈើនាថ្ងៃនេះ ឆ្លុះបញ្ចាំងសារជា ថ្មីម្តងទៀត នូវការភ្ញាក់រលឹករបស់ប្រជាជាតិយើងទាំងមូល ក្នុងការប្រឈមមុខដោះស្រាយគ្រោះមហន្តរាយបាត់បង់ព្រៃឈើ និងស្មារតីម្ចាស់ការទទួលខុសត្រូវលើជោគវាសនាអនាគតមាតុភូមិយើង សម្រាប់យើងជំនាន់នេះ ក៏ដូចជាជំនាន់ក្រោយ យើងត្រូវចាប់ផ្តើមដោយឥតបង្អែរបង្អង់នូវផែនការស្តារព្រៃឈើ និងការដាំកូនឈើឡើងវិញ ជាខ្សែចង្វាក់គ្រប់ទិសទី ដើម្បីឱ្យ ខេត្តសៀមរាបរបស់យើងរក្សាបាននូវលំនឹងបរិស្ថានធម្មជាតិ និងមានសម្រស់ស្រស់បំព្រងដោយរុក្ខជាតិ ពណ៌បៃតងឡើងវិញ៕
អត្ថបទ និង រូបភាព ៖ជា ស្រស់, រូបភាព៖ ខេង ឧត្តម
កែសម្រួល៖ អ៊ុន ណារាជ្យ
