តាមការឲ្យដឹងពីឯកឧត្តម លី សំរិទ្ធ អភិបាលខេត្តសៀមរាបស្តីទី កាលពីពេលថ្មីៗនេះបានឲ្យដឹងថា នៅឆ្នាំ២០២០ខាងមុខនេះ ក្រុងសៀមរាប នឹងទទួលបានផ្លូវល្អៗជាច្រើនខ្សែ ដើម្បីជាការជួយសម្រួលការធ្វើចរាចរណ៍ដល់បងប្អូនប្រជាពលរដ្ឋ ក៏ដូចជាភ្ញៀវទេសចរ ។
ឯកឧត្តមអភិបាលខេត្តសៀមរាបស្តីទី បានលើកឡើងថា កន្លងមកអាជ្ញាធរខេត្តបាននឹងកំពុងបន្តគិតគូរយកចិត្តទុកដាក់ជាប្រចាំលើកិច្ចការងារជួសជុល និងពង្រីកហេដ្ឋារចនាសម្ពន្ឋ័នានា ធ្វើយ៉ាងណា បញ្ចៀសពីការកកស្ទះចរាចរណ៍ និងដើម្បីរក្សាបាននូវធ្វើ សន្តិសុខ សណ្តាប់ធ្នាប់ សុវត្ថិភាព សាធារណៈជូនភ្ញៀវជាតិនិងអន្តរជាតិក៏ដូចជាប្រជាពលរដ្ឋក្នុងទូទាំងខេត្ត ព្រមទាំងបានគិតគូរពីអនាម័យ បរិស្ថាន ក្នុងក្រុងផងដែរ ។
ឯកឧត្តមបន្តថា ខេត្តសៀមរាបជាខេត្តគោលដៅទេសចរណ៍ដ៏សំខាន់ និងមានសក្តានុពលរបស់កម្ពុជា ដែលកំពុងទទួលបានការចាប់អារម្មណ៍ពីភ្ញៀវទេសចរស្ទើរគ្រប់ជាតិសាសន៍ក្នុងពិភពលោក ហេតុនេះ អាជ្ញាធរខេត្ត មិនអាចព្រងើយកន្តើយនោះទេ គឺតែងតែជួសជុល និងកសាងពង្រីកបន្ថែមនូវផ្លូវជាច្រើនខ្សែក្នុងរយៈពេលប៉ុន្មានឆ្នាំចុងក្រោយនេះ។ ប៉ុន្តែផ្លូវមួយចំនួនរងនូវភាពទ្រុឌទ្រោម និងខូចខាតបណ្តាលមកពីកត្តាច្រើនយ៉ាង ជាពិសេសគឺដល់អាយុកាលរបស់វាដែលត្រូវខូចផងដែរ។
ឯកឧត្តម លី សំរិទ្ធ បានឲ្យដឹងទៀតថា ដោយបានការយកចិត្តទុកដាក់និងគាំទ្រយ៉ាងពេញទំហឹង ពីប្រមុខរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា និងបានការគាំទ្រថវិកាពីក្រសួងសេដ្ឋកិច្ចហិរញ្ញវត្ថុ និងក្រសួងសាធារណៈការនិងដឹកជញ្ជូន ព្រមទាំងក្រសួងទេសចតរណ៍ផង បានខ្នះខ្នែងជួយជំរុញ និងរិះរកវិធានការណ៍ គ្រប់បែបយ៉ាង ផ្តល់អាទិភាពដល់ខេត្តនេះ ដើម្បីស្តារ ជួសជុលកែលម្អហេដ្ឋារចនាសម្ព័ន្ឋនានានៅក្នុងក្រុងសៀមរាប ខណៈដែលបច្ចុប្បន្នខេត្តនេះបាននឹងបង្កើតនូវយន្តការគណៈកម្មាធិការជាតិអភិវឌ្ឍទេសចរណ៍និងរៀបចំប្លង់គោល(ប្លង់មេ) សំដៅធ្វើឱ្យទីក្រុងសៀមរាបជាទីក្រុងមួយប្រកបដោយភាពទាក់ទាញដើម្បីរួមចំណែកក្នុងការ អភិវឌ្ឍន៍ ក្រុងសៀមរាបរបស់យើងឱ្យកាន់តែមានការរីកលូតលាស់ សក្តិសមជាទីក្រុងស្អាត បរិស្ថានបៃតងស្រស់៕
អត្ថបទ, រូបភាព៖ ជា ស្រស់ ខេង ឧត្តម
កែសម្រួល៖ អ៊ុន ណារាជ្យ
