នៅព្រឹកថ្ងៃទី២៦ ខែសីហា ឆ្នាំ២០១៩ មន្ត្រីនាយកដ្ឋានគ្រប់គ្រងទឹក , នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន និង នាយកដ្ឋានទ្រទ្រង់បច្ចេកទេសនិងអន្តរវិស័យ នៃអាជ្ញាធរជាតិអប្សរា រួមជាមួយនឹងនិស្សិតមកពីប្រទេសជប៉ុន សរុបចំនួនប្រមាណជាង២០០នាក់ បានរួមគ្នាសម្អាតបរិស្ថានតាមដងប្រឡាយនាផ្លូវសម្តេចវិបុលបញ្ញា សុខ អាន។
លោក សោម ផារ៉ាត់ មន្ត្រីនៃនាយកដ្ឋានទ្រទ្រង់បច្ចេកទេសនិងអន្តរវិស័យ បានឱ្យដឹងថា ការសម្អាតបរិស្ថាននៅតាមបណ្តោយផ្លូវសម្តេចវិបុលបញ្ញា សុខ អាន ធ្វើឡើងទៅតាមទម្លាប់ជាប្រចាំ និង ដើម្បីជាការទទួលស្វាគមន៍គណៈប្រតិភូជាន់ខ្ពស់នៃកិច្ចប្រជុំអាស៊ានផងដែរ ហើយកិច្ចការសម្អាតនេះ ធ្វើឡើងចំនួន២ទីតាំង គឺពីផ្លូវចេញពីផ្លូវជាតិលេច៦ និងផ្លូវនៅស្ពាននាគ ដោយផ្តោតទៅលើការជួសជុលផ្លូវថ្នល់ , ការកាត់ក្រីមែកឈើ និងកាប់ស្មៅសម្អាតប្រឡាយទឹក ។
លោក សោម ផារ៉ាត់ បានឱ្យដឹងទៀតថា ក្រៅពីការសម្អាតបរិស្ថានតាមប្រឡាយ ផ្លូវសម្តេចវិបុលបញ្ញាសុខអាន ក៏នឹងធ្វើការជួសជុលកែលម្អសាជាថ្មីដោយអ្នកជំនាញអាជ្ញាធរជាតិអប្សរា នៅចុងឆ្នាំ២០១៩ នឹងគ្រោងជួសជុលកែលម្អ ដោយពង្រីងប្រវែងទទឹងនិងបណ្តោយឱ្យធំទូលាយជាងមុន ព្រោះជាតំបន់មួយលើកស្ទួយវិស័យទេសចរ និងការទទួលគណៈប្រតិភូជាន់ខ្ពស់ជាតិ-អន្តរជាតិ រួមទាំងការធ្វើដំណើររបស់ប្រជាជនផង។
សូមបញ្ជាក់ថា ជានិច្ចកាលអាជ្ញាធរជាតិអប្សរាតែងតែបណ្តុះបណ្តាលដល់មន្ត្រី បុគ្គលិកនៃស្ថាប័នខ្លួនជាប្រចាំ ដើម្បីលើកកម្ពស់ការយល់ដឹង ការថែរក្សាបរិស្ថាន ព្រមទាំងធ្វើការផ្សព្វផ្សាយអំពីផលប៉ះពាល់នៃការទុកដាក់សំរាមមិនបានត្រឹមត្រូវដល់ប្រជាជនក្នុងតំបន់អង្គរសំរាមជាប្រចាំ ហើយលើសពីនោះ ស្ថាប័នអាជ្ញាធរជាតិអប្សរា ក៏ទទួលបានវិញ្ញាបនបត្រធានាគុណភាពបរិស្ថានពីប្រទេសជប៉ុនជាច្រើនលើក ថែមទាំងបានចូលរួមដោយផ្ទាល់ក្នុងការសម្អាតបរិស្ថាន នៅតាមសហគមន៍ និងជាសាធារណៈ ៕
អត្ថបទ និង រូបភាព ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
