សិស្សមត្តេយ្យកម្រិតខ្ពស់ នៃសាលាមត្តេយ្យអង្គរ ខេត្តសៀមរាប ក្នុងឆ្នាំសិក្សា២០១៨-២០១៩ ចំនួន២៣០នាក់ ក្នុងនោះស្រី១០៣នាក់ បានទទួលវិញ្ញាបនបត្របញ្ចប់ការសិក្សាថ្នាក់មត្តេយ្យកម្រិតខ្ពស់ កាលពីព្រឹកថ្ងៃទី២៦ ខែសីហា ឆ្នាំ២០១៩ ក្រោមអធិបតីភាពរបស់លោក លី ប៊ុនណា អនុប្រធានមន្ទីរអប់រំយុវជន និង កីឡាខេត្តសៀមរាប ។
លោកស្រី អ៊ី សុធារី នាយិកាសាលាមត្តេយ្យអង្គរ បានឲ្យដឹងថា គោលបំណងនៃការចែកវិញ្ញាបនបត្របញ្ចប់ថ្នាក់មត្តេយ្យសិក្សានេះ គឺបញ្ជាក់ថា ពួកគេបានទទួលចំណេះដឹងនៅថ្នាក់មត្តេយ្យរយៈពេលបីឆ្នាំកន្លងមកដោយជោគជ័យ និង ត្រូវបន្តទៅថ្នាក់បឋមសិក្សាឡើងថ្នាក់ទី១ នៅឆ្នាំសិក្សាខាងមុខ ប៉ុន្តែវិញ្ញាបនបត្របញ្ចប់ការសិក្សានេះ គ្រាន់តែជាបណ្ឌិតស្រមោលប៉ុណ្ណោះ ហើយដើម្បីក្លាយជាបណ្ឌិតពិតប្រាកដនោះ សិស្សត្រូវតែខិតខំ ប្រឹងប្រែងសិក្សារៀនសូត្របន្ថែមទៀត ។
លោកស្រី អ៊ី សុធារី បានឲ្យដឹងបន្ថែមថា តាមរយៈសកម្មភាពនេះ គឺជាការឆ្លុះបញ្ចាំងអំពីការយកចិត្តដាក់ខ្ពស់ ពីសំណាក់មន្ទីរអប់រំយុវជននិងកីឡាខេត្ត សហគមន៍ គណៈគ្រប់គ្រងសាលា មាតាបិតា និង អាណាព្យាបាលសិស្ស ចំពោះសាលាមត្តេយ្យអង្គរ សំដៅលើកស្ទួយឲ្យសាលារៀនមានការអភិវឌ្ឍប្រកបដោយគុណភាព ប្រសិទ្ធភាព ដើម្បីកសាងធនធានមនុស្សសម្រាប់ទៅអនាគត ដូច្នេះតាមរយៈនេះ សំណូមពរមន្ទីរអប់រំ បន្តយកចិត្តទុក ដាក់លើការងារវិស័យកុមារតូចៗ ឲ្យកាន់តែប្រសើរឡើង និង សូមឲ្យមាតាបិតា អាណាព្យាបាលសិស្ស មេត្តាបន្តសហការជូនកូនៗ មកសាលារៀនឲ្យបានទៀងទាត់ និង គាំទ្រដល់ការកែលម្អអភិវឌ្ឍសាលាមត្តេយ្យអង្គរ ដើម្បីឲ្យសក្តិសមជាសាលាស្ថិតក្នុងតំបន់ទេសចរណ៍ និង ឆ្លើយតបនឹងតម្រូវការសហគមន៍អាស៊ានទៀតផង ។
មានប្រសាសន៍ក្នុងឱកាសនោះ លោក លី ប៊ុនណា អនុប្រធានមន្ទីរអប់រំយុវជន និង កីឡាខេត្តសៀមរាប បានសម្ដែងនូវការសាទរចំពោះកូនៗ និង មាតាបិតា អាណាព្យាបាលសិស្សទាំងអស់ ដែលបានយកចិត្តទុកដាក់ខ្ពស់ក្នុងវិស័យអប់រំ សំខាន់ចំពោះវិស័យអប់រំកុមារតូចៗ ស្របពេលដែលទម្រង់ក្នុងវិស័យអប់រំក្នុងខេត្តសៀមរាប បាននឹងកំពុងមានការអភិវឌ្ឍឈានឡើង ពិសេសមាតាបិតា និង អាណាព្យាបាលសិស្សទាំអអស់ បានឲ្យតម្លៃទៅលើការសិក្សារបស់បុត្រធីតារបស់ខ្លួន និង ឲ្យតម្លៃទៅលើការសិក្សាអប់រំរបស់កូនៗទៀតផង ។
លោក លី ប៊ុនណា មានប្រសាសន៍ទៀតថា ការងារអប់រំ ទាំងបីកម្រិតសិក្សា មានកម្រិតបឋមសិក្សា , កម្រិតមធ្យមសិក្សា និង កម្រិតឧត្តមសិក្សា គឺពិតជាមានសារៈសំខាន់ណាស់ដែលមិនអាចខ្វះបាន ប៉ុន្តែកិច្ចដំណើរការនៃការអប់រំថ្នាក់មត្តេយ្យសិក្សា ក៏មានសារៈសំខាន់ដែរ ដោយបានផ្តោតលើការអនុវត្តទៅតាមកម្មវិធីស្តង់ដារ ដែលក្រសួងអប់រំដែលបានកំណត់ ដើម្បីធានាបាននូវការអប់រំមួយប្រកបដោយសមធម៌ និង គុណភាព ក៏ដូចជាការធ្វើឲ្យសម្រេចនូវគោលដៅ និង ចំណុចដៅនានា នៃការកែទម្រង់វិស័យអប់រំ និង ផែនការយុទ្ធសាស្ត្រវិស័យអប់រំ ៕
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
