ក្នុងដំណើរបេសកកម្មចូលរួមក្នុងពិធី 2019 Smart China Expo នៅក្រុងឆុងឈីង នៃសាធារណរដ្ឋប្រជាមានិតចិន នៅថ្ងៃទី២៥ ខែសីហា ឆ្នាំ២០១៩នេះ ប្រតិភូខេត្តសៀមរាបដឹកនាំដោយឯកឧត្តម ទៀ សីហា អភិបាល នៃគណអភិបាលខេត្តបានជួបសម្តែងការគួរសមនិងពិភាក្សាការងារជាមួយលោកស្រី Luo Ying សមាជិកគណៈកម្មាធិការអចិន្ត្រៃយ៍ស្រុកវ័នចូវនៃបក្សកុម្មុយនិស្តចិន ប្រធាននាយកដ្ឋានរណសិរ្សរួបរួមប្រចាំស្រុកវ័នចូវ និងជាប្រធានប្រតិភូ ហើយកិច្ចប្រជុំនេះមានសហគ្រាស ចំនួន ១៣ប្រចាំស្រុកវ័នចូវអញ្ជើញចូលរួមផងដែរ។
ជំនួបពិភាក្សានាពេលនោះដែរ គឺដើម្បីពិភាក្សាការងារក្នុងការពង្រឹងសម្ព័ន្ធមេត្រីភាព និងជំរុញកិច្ចសហប្រតិបត្តការការងាររវាងស្រុកវ័នចូវជាមួយខេត្តសៀមរាប ដើម្បីស្វែងរកឱកាវិនិយោគទៅវិញទៅមករវាងខេត្តសៀមរាប នៃព្រះរាជណាចក្រកម្ពុជា និងស្រុកវ័នចូវ នៃសាធារណរដ្ឋប្រជាមានិតចិន។
ក្នុងនោះដែរ លោកស្រី Luo Ying ក៏បានឲ្យដឹងថា បច្ចុប្បន្នអាជ្ញាធរនៃសាធារណ៖រដ្ឋចិន បាននឹងកំពុងជំរុញឱ្យមានជើងហោះហើរត្រង់ឱ្យកាន់តែច្រើនថែមទៀត ដើម្បីទាក់ទាញភ្ញៀវទេសចរប្រទេសចិន ក៏ដូចជាប្រទេសជិតខាង បន្តទៅទស្សនាខេត្តសៀមរាប ប្រទេសកម្ពុជាឲ្យបានច្រើនឡើងបន្ថែមទៀត ។
ជាមួយគ្នានេះដែរ ឯកឧត្តម ទៀ សីហា អភិបាលខេត្តសៀមរាប ក៏សង្ឃឹមជឿរជាក់ថា ការជំរុញឱ្យមានជើងហោះហើរត្រង់នេះ នឹងអាចជួយឲ្យប្រទេសទាំងពីរមានរីកចម្រើនគ្រប់វិស័យទាំងអស់ ជាពិសេសវិស័យទេសចរណ៍នេះតែម្ដង ។
ក្នុងនោះដែរ ឯកឧត្តម ទៀ សីហា ក៏បានថ្លែងនូវអំណរគុណយ៉ាងជ្រាលជ្រៅចំពោះប្រតិភូខេត្តវ័នចូវ ដែលបានខិតខំជំរុញការងារទាំងនេះ និងសូមបន្តពង្រឹងកិច្ចសហប្រតិបត្តការរវាងស្រុកវ័នចូ វនិងខេត្តសៀមរាបឱ្យកាន់តែស្អិតរមួតថែមទៀត៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
