តាមសេចក្តីរាយការណ៍ មនុស្សចំនួន៧នាក់ បានស្លាប់បាត់បង់ជីវិតនៅទីក្រុងម៉ាល់ឡូកា បន្ទាប់ពីមានឧទ្ធម្ភាគចក្រមួយគ្រឿង និងយន្តហោះខ្នាតតូចមួយគ្រឿង បានបុកគ្នាកណ្ដាលអាកាស នៅខាងលើកោះម៉ាល់ឡូកា ប្រទេសអេស្ប៉ាញ កាលពីថ្ងៃអាទិត្យ។
យោងតាមការចេញផ្សាយដោយកាសែត UPI នៅថ្ងៃទី២៦ ខែសីហា ឆ្នាំ២០១៩នេះ បានឲ្យដឹងថា គ្រោះថ្នាក់បុកគ្នាកណ្ដាលអាកាសនេះ បានកើតឡើងនៅជិតទីក្រុង Inca ដោយឧទ្ធម្ភាគចក្រមានផ្ទុកមនុស្ស៥នាក់ ដែលរួមមានក្មេងពីរនាក់ផង បានបុកគ្នាជាមួយយន្តហោះខ្នាតតូចដែលមានកៅអីជាអតិបរិមាចំនួនពីរ។
ប្រធានក្នុងតំបន់ លោកស្រី Francina Armengol បានមានប្រសាសន៍ប្រាប់ថា ក្រុមជួយសង្គ្រោះបន្ទាន់ បានធ្វើដំណើរទៅកន្លែងកើតហេតុភ្លាមៗ ហើយអង្គភាពមួយ នៅក្នុងចំណោមអង្គភាពក្នុងតំបន់ ក៏ត្រូវបានបញ្ជូនឲ្យ ទៅកន្លែងកើតហេតុ ដើម្បីធ្វើការសង្គ្រោះបន្ទាន់ផងដែរ៕
ប្រភព៖ ដើមអំពិល
ប្រែសម្រួល៖ប៉ាង កុង
កែសម្រួលអត្ថបទ៖ សេង ផល្លី
