លោក ង៉ែត អ៊ីត ជាអ្នកបើករថយន្តដឹកភ្ញៀវទេសចរ បានឲ្យដឹងថា ការរៀបចំឲ្យមានចំណតរថយន្ដ បានធ្វើឲ្យបរិវេណមុខប្រាសាទអង្គរមានសណ្ដាប់ធ្នាប់ល្អ ស័ក្ដិសមជារមណីយដ្ឋានប្រវត្តិសាស្ត្រ ព្រមទាំងធ្វើឲ្យមានសណ្ដាប់ធ្នាប់ល្អ និងជាការលើកកម្ពស់សោភ័ណភាពប្រាង្គប្រាសាទបុរាណ ព្រោះថាកន្លែងសម្បត្ដិបេតិកភណ្ឌ ចាំបាច់ត្រូវមានសណ្ដាប់ធ្នាប់ល្អ និងបរិស្ថានល្អ ដើម្បីទាក់ទាញអ្នកទេសចរ ជាពិសេសប្រាង្គប្រាសាទ ជាកន្លែងជាទីគោរពបូជារបស់ខ្មែរ ។
លោក ឧត្តម ជាអ្នកបើកបររថយន្តដឹកភ្ញៀវទេសចរណ៍ដែរនោះ បានឲ្យដឹងដែរថា ការដែលមានចំណតរថយន្តមួយដែលនៅដាច់ឆ្ងាយពីប្រាសាទ គឺជាការល្អ ព្រោះវាមិនប៉ះពាល់ដល់ការធ្វើដំណើររបស់អ្នកទេសចរ និងជាការលើកកម្ពស់សោភ័ណភាពប្រាសាទអង្គរ ។
សូមបញ្ជាក់ថា អាជ្ញាធរជាតិអប្សរា បាននឹងកំពុងកែប្រែទីតាំងអតីតចំណតរថយន្តបណ្ដោះអាសន្នមុខប្រាសាទអង្គរវត្ត និង កែប្រែជាកន្លែងដាំស្មៅនិងកូនឈើឡើងវិញ ដើម្បីចូលរួមលើកកម្ពស់របៀបរៀបរយ សោភ័ណភាព បរិស្ថាន ទេសភាពបៃតងក្នុងរមណីយដ្ឋានអង្គរ ឱ្យស័ក្ដិសមជាតំបន់បេតិកភណ្ឌពិភពលោក ព្រមទាំងទាក់ទាញភ្ញៀវទេសចរឲ្យកាន់តែច្រើន។
បច្ចុប្បន្នការងារនេះបានដំណើរការជាបន្តបន្ទាប់ ក្នុងនោះអាជ្ញាធរជាតិអប្សរា កំពុងធ្វើការកាយប្រភេទដីរឹង មានក្រួស ចេញពីទីតាំងខាងលើ ដោយជំនួសមកវិញនូវប្រភេទដីជីជាតិអាចដាំដុះបាន ហើយការរៀបចំនេះ គឺជាផ្នែកមួយនៃផែនការរួមក្នុងការរៀបចំរបៀបរៀបរយ សណ្ដាប់ធ្នាប់ នៅមុខប្រាសាទអង្គរវត្ត ដោយក្នុងនោះមានការដាំស្មៅ ដាំដើមឈើឡើងវិញ និងរៀបចំជាចំណតឱ្យបានត្រឹមត្រូវ ស្របទៅតាមលំហូរនៃយានយន្ត និងការចរាចរណ៍របស់ភ្ញៀវទេសចរនៅប្រាសាទអង្គរវត្ត ៕
អត្ថបទ និង រូបភាព ៖ លោក ជា ស្រស់ និង លោក ខេង ឧត្តម
កែសម្រួលអត្ថបទ ៖ លោក លីវ សាន្ដ
