ខេត្តសៀមរាប មានសក្ដានុពលយ៉ាងខ្លាំង ក្នុងការច្នៃប្រឌិតធនធានធម្មជាតិជាតំបន់ទេសចរណ៍ និងផ្ដល់ចំណូលដល់ប្រជាពលរដ្ឋផ្ទាល់ក្នុងមូលដ្ឋាន តួយ៉ាងសហគមន៍បឹងឈូក ក្នុងស្រុកបន្ទាយស្រី បានជួយដល់ជីវភាពប្រជាពលរដ្ឋ ពីវិស័យទេសចរណ៍។
សហគមន៍បឹងឈូក ក្នុងស្រុកបន្ទាយស្រី ខេត្តសៀមរាប បានជួយលើកកម្ពស់សេដ្ឋកិច្ចសហគមន៍ទេសចរណ៍មូលដ្ឋាន បង្កើនប្រាក់ចំណូល និងការងារដល់ប្រជាជន តាមរយៈវិស័យទេសចរណ៍ លើសពីនោះវាក៏ជាកន្លែងអភិរក្សជីវៈចម្រុះដ៏សំបូរបែប រួមនិងសត្វស្លាបរាប់រយប្រភេទផងដែរ នេះបើតាមការលើឡើងរបស់ប្រធានសហគមន៍ លោក ភួង សាវ៉ុន។
សហគមន៍បឹងឈូក មានប្រភពទឹកពីតំបន់ក្បាលស្ពាន ក្នុងស្រុកបន្ទាយស្រី លាតសន្ធឹងនៅចន្លោះភូមិចំនួនបី គឺភូមិកោះជ្រុំ ភូមិអូរម្នាស់ និងភូមិទួលក្រឡាញ់ នៃឃុំខ្នារសណ្ដាយ ស្រុកបន្ទាយស្រី ខេត្តសៀមរាប។
លោក ភួង សាវ៉ុន បានឲ្យដឹងថា សហគមន៍នេះ បានបង្កើតឡើងកាលពីឆ្នាំ២០១៧ ដោយមានការចូលរួមប្រជាពលរដ្ឋក្នុងឃុំខ្នារសណ្តាយ ។ លោកថា រហូតមកដល់ពេលនេះ គេនៅមិនទាន់បានកំណត់ផ្ទៃដីបឹងមួយនេះថា មានទំហំប៉ុនណានៅឡើយទេ ប៉ុន្តែដោយមានការគាំទ្របន្ថែមពីអាជ្ញាធរគ្រប់ជាន់ថ្នាក់នោះ ក្រុមការងារសហគមន៍ បានធ្វើការយ៉ាងយកចិត្តទុកដាក់ក្នុងការអប់រំផ្សព្វផ្សាយពីអត្ថប្រយោជន៍របស់ធនធានធម្មជាតិ ការការពារធនធានធម្មជាតិ ដល់ប្រជាពលរដ្ឋ ដោយសុំឲ្យពួកគាត់បញ្ឈប់សកម្មភាពកាប់បំពានព្រៃកោងកាង ការនេសាទខុសច្បាប់ និងការដាក់អន្ទាក់សត្វស្លាបទឹកជាដើម។
លោក ភឿន នីន ជាប្រជាពលរដ្ឋក្នុងមូលដ្ឋាននេះ និងជាសមាជិកសហគមន៍ម្នាក់ក្នុងសហគមន៍នេះ បានបង្ហាញថាពីមុនមុខរបរនេសាទរបស់លោកមិនសូវបានផលប៉ុន្មានទេ ប៉ុន្តែចាប់តាំង ពីមានការបង្កើតសហគមន៍បឹងឈូកនេះមក ការនេសាទរបស់លោកទទួលបានផលជាងមុន ។ ព្រោះសហគមន៍ បានហាមមិនឲ្យមានការនេសាទខុសច្បាប់ ដូចជាប្រើមងក្រឡាញឹក ប្រើឧបករណ៍ឆក់ជាដើម។ ដូច្នេះការថែរក្សាធនធានទាំងនេះ ហើយទាញយកប្រយោជន៍ពីវា តាមវិស័យទេចរណ៍ គឺជាការល្អបំផុត បើទោះជាពេលនេះវាមិនទាន់ហុចផលជាដំកំភួនក៏ដោយ តែប្រសិនបើការពារបានអ្នកទេសចនឹងមកកាន់ទីនេះកាន់តែច្រើន៕
អត្ថបទ និង រូបភាព ៖ លោក ជា ស្រស់ និងលោក ខេង ឧត្តម
កែសម្រួលអត្ថបទ ៖ លោក សេង ផល្លី
