ជាមោទកភាពណាស់ ដែលទូកងមួយក្នុងក្រុងសៀមរាប ត្រៀមខ្លួន ដើម្បីទៅចូលរួមដណ្ដើមជ័យលាភី ក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅរាជធានីភ្នំពេញនាពេលខាងមុខ។
ទូក-ង តេជ:នាគស មហាកោសាមានជ័យ បារមីអង្គរ ជាទូកងខ្នាតអន្តរជាតិ ដំបូងគេ ក្នុងខេត្តសៀមរាប ដែលត្រូវបានស្ថាបនារួចរាល់ជាស្ថាពរហើយ ដើម្បីទៅចូលរួមក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅរាជធានីភ្នំពេញនាពេលខាងមុខ។
ទូក ង ថ្មីនេះ ធ្វើឡើងពីដើមគគីរ មានបណ្តោយប្រវែង ៣៥ម៉ែត្រ និងទទឹង ១.៣៥ម៉ែត្រ អាចផ្ទុកមនុស្សបាន ៧៧នាក់ ប្រើពេលវេលាស្ថាបនាអស់ជាង៣ខែ ដោយក្រុមជាងនៅស្រុកវាលវែង ខេត្តពោធិសាត់ បន្ទាប់ពីបានលេចចេញជាទ្រង់ទ្រាយជាស្ថាពរហើយ ត្រូវបានដឹកទៅស្រុកកងមាសខេត្តកំពង់ចាម ដើម្បីលាភថ្នាំ និងរចនាក្បូរក្បាច់តាមបែបបុរាណ និងយកមករក្សាទុកនៅក្នុងបរិវេណវត្តព្រះឥន្ទកោសា ក្នុងក្រុងសៀមរាប ខេត្តសៀមរាប កាលពីរសៀលថ្ងៃទី២៦ ខែសីហា ឆ្នាំ២០១៩។
ព័ត៌មានជាតិ ថ្មីៗ
ទូកងនេះដែរ ទទួលបានឧបត្ថម្ភគាំទ្រពីលោកជំទាវឧកញ៉ា សៀង ចាន់ហេង អគ្គនាយិកា ក្រុមហ៊ុនហេងអភិវឌ្ឍន៍ និងផ្ដូចផ្ដើមដោយ ព្រះសទ្ឋម្មប្បកាសនី តាត មហាទី ព្រះគ្រូចៅអធិការវត្តព្រះឥន្ទកោសាខេត្តសៀមរាប។
គួររំលឹកថា៖ នៅឆ្នាំ២០១៨ វត្តព្រះឥន្ទកោសា មានទូកមួយឈ្មោះ មហាកោសាមានជ័យ (ទូកមួង) ប្រវែង២២ម៉ែត្រ ចំណុះ២២នាក់ បានចូលរួមប្រកួតព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅក្នុងខេត្តសៀមរាប និងទទួលបានជ័យលាភីលេខមួយ ។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
