សម្ដេចសង្ឃ នៃព្រះរាជាណាចក្រកម្ពុជា មានថេរៈដីកាច្បាស់ៗថា គម្រោងអភិវឌ្ឍន៍ មជ្ឈមណ្ឌលវប្បធម៌សន្តិភាព ក្នុងក្រុងសៀមរាប គឺដើម្បីបម្រើជាតិ និង សាសនា ក្នុងគុណប្រយោជន៍ជាតិទាំងមូល មិនសំដៅបុគ្គលណាមួយឡើយ។
គម្រោងអភិវឌ្ឍន៍ មជ្ឈមណ្ឌលវប្បធម៌សន្តិភាព ក្នុងក្រុងសៀមរាប ជាគម្រោងអភិវឌ្ឍន៍ដល់សហគមន៍ដោយផ្ទាល់ និងប្រយោល ព្រមទាំងផ្សាភ្ជាប់វិស័យសាសនា វិស័យកសិកម្ម និងទេសចរណ៍ ប៉ុន្តែមិនបានបម្រើដល់បុគ្គលណាមួយឡើយ នេះបើតាមថេរៈដីកា សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស កាលពីរសៀលថ្ងៃទី ២៦ ខែ សីហា ឆ្នាំ២០១៩ម្សិលមិញ។
ក្នុងឱកាសនិមន្តដឹកនាំប្រតិភូ អ្នកវិនិយោគ ផ្នែកវិស័យសាសនា និងចុះពិនិត្យទីតាំងគម្រោងអភិវឌ្ឍន៍ មជ្ឈមណ្ឌលវប្បធម៌សន្តិភាព ស្ថិតនៅទំនប់៧៨ ក្នុងភូមិសាស្ត្រសង្កាត់ជ្រាវ ក្រុងខេត្តសៀមរាបនោះ សម្តេចសង្ឃ ទេព វង្ស មានថេរៈដីកាថា គម្រោងអភិវឌ្ឍន៍ មជ្ឈមណ្ឌលវប្បធម៌សន្តិភាពនេះ នឹងបង្កើតនូវសមទ្ធិផលសាធារណៈ និងឯកជនជាច្រើនដូចជា សាលារៀន ចាប់ពីថ្នាក់មត្តេយ្យសិក្សា ដល់ឧត្តមសិក្សា និង មានទីផ្សារ សណ្ឋាគារ និង មន្ទីរពេទ្យជាដើម តាមរយៈការវិនិយោគ របស់ដៃគូអភិវឌ្ឍ។ ជាមួយនោះ ព្រះអង្គ បានបញ្ជាក់ថា ប្លង់មេនៃមជ្ឈមណ្ឌលវប្បធម៌សន្តិភាព ត្រូវរក្សាផ្ទៃដីឲ្យ ១វត្ត ទំហំ ១ហិចតា។ ក្នុងនោះដែរ អ្នកវិនិយោគនៃប្រទេសវៀតណាម នឹងនាំយកនូវពុទ្ធបដិមា ដែល មានកម្ពស់៤០ម៉ែត្រ មានទម្ងន់៤០តោនធ្វើអំពីថ្ម ដាក់នៅតាមទីតាំងដែលបានកំណត់ផងដែរ។
ព្រះអង្គបានបញ្ជាក់បន្ថែមថា លោកចៅសង្កាត់ ក៏ដូចអ្នកកាន់គម្រោង ត្រូវធ្វើយ៉ាងណាត្រូវតែមានប្រព័ន្ធស្រោចស្រព ក្នុងការ ផ្គត់ផ្គង់ទឹកស្រោចស្រពដល់ស្រែរបស់ប្រជាកសិករ ដោយតំបន់សង្កាត់ជ្រាវនេះ បានកំពុងក្លាយជាតំបន់កសិទេសចរណ៍ ដែលជាទីកន្លែងផលិតបន្លែសុវត្ថិភាព ក្នុងការផ្គត់ផ្គង់នៅក្នុងទីផ្សារក្រុងសៀមរាប តាមសណ្ឋាគារ ភោជនីយដ្ឋាន ក្រៅពីការងារបង្កបង្កើនផល ក្នុងការលើកស្ទួយនូវជីវភាពប្រជាពលរដ្ឋក្នុងសង្កាត់ជ្រាវ ក៏ដូចបណ្តាសង្កាត់ ឃុំជិតខាងផងដែរ ។
តាមការឲ្យដឹងពីលោក ក្តោប រ៉ន ចៅសង្កាត់ជ្រាវ គម្រោងអភិវឌ្ឍន៍នេះ បម្រើដល់ផលប្រយោជន៍របស់បងប្អូនប្រជាកសិករ ក្នុងសង្កាត់ជ្រាវ និង បណ្តាឃុំជាប់ជាមួយលើការងារបង្កបង្កើនផល ទាំងប្រាំង វស្សាដែលមានផ្ទៃដី ២៨៨ហិចតា ។ លោកក៏បានឲ្យដឹងទៀតថា ក្នុងការជីកធ្វើបារាយណ៍ ដើម្បីស្តុបទឹកធ្វើការងារបង្កបង្កើនផល គឺមានវិសាលភាពក្នុងការស្រោចស្រពលើផ្ទៃដីស្រែ ទាំងប្រាំង និងវស្សាបានជាង២០០ហិចតា ។
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
