តាមការចុះផ្សាយរបស់ទូរទស្សន៍សិង្ហបុរី Channel News Asia បានផ្សព្វផ្សាយព័ត៌មានឲ្យដឹង នៅថ្ងៃទី២៦ ខែសីហា ឆ្នាំ២០១៩នេះថា ប្រទេសចិន បានទាក់ទងមន្ត្រីពាណិជ្ជកម្មអាមេរិកមួយរូប កាលពីយប់មិញ ដើម្បីជជែកគ្នាថាពួកគេចង់ វិលត្រឡប់មករកតុចរចាវិញ ហើយលោក ដូណាល់ ត្រាំ បានស្វាគមន៍ចំពោះព័ត៌មាននេះថា ជាការវិវត្តភាពវិជ្ជមានមួយសម្រាប់ពិភពលោក ។
ថ្លែងនៅខាងក្រៅកិច្ចប្រជុំកំពូល នៃប្រទេសឧស្សាហកម្មធំៗ លោក ត្រាំ បានសាទរចំពោះប្រធានាធិបតីចិនលោក ហ្ស៊ី ជិនពីង ក្នុងនាមជាមេដឹកនាំដ៏អស្ចារ្យម្នាក់ និងបានថ្លែងថា លោកសូមស្វាគមន៍ ចំពោះបំណងប្រាថ្នា របស់គាត់ចំពោះកិច្ចព្រមព្រៀងមួយ និងដើម្បីភាពស្ងប់ស្ងាត់ ។
គេបានដឹងថា សង្គ្រាមពាណិជ្ជកម្មដ៏ជូរចត់ កាន់តែខ្លាំងឡើងរវាងប្រទេស ដែលមានសេដ្ឋកិច្ចធំបំផុតទាំង២ នៅលើពិភពលោក បានកើនឡើងយ៉ាងខ្លាំង កាលពីថ្ងៃសុក្រ ដោយភាគីទាំងពីរបានបង្កើន ពន្ធគយលើការនាំចេញ របស់គ្នាទៅវិញទៅមក ៕
ប្រភព ៖ដើមអំពិល
ប្រែសម្រួលដោយ៖ ម៉ៅ បុប្ផាមករា
