ក្នុងឱកាសបើកកិច្ចប្រជុំថ្នាក់មន្ត្រីជាន់ខ្ពស់ស្តីពីបញ្ហាគ្រឿងញៀន លើកទី៤០ ហៅកាត់ថា អាសូត ឯកឧត្តមនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រយឆាំងគ្រឿងញៀននៃកម្ពុជា បានស្នើសុំកិច្ចប្រជុំក៏ដូចជាបណ្តាប្រទេសនៃសមាជិកអាស៊ានទាំងអស់ ផ្តោតការយកចិត្តទុកដាក់ និងផ្តល់នូវកិច្ចសហការគាំទ្របន្ថែមទៀត ក្នុងការឆ្លើយតបចំពោះស្ថានភាព នៃការផលិតគ្រឿងញៀននៅក្នុងតំបន់ត្រីកោណមាស ដែលស្ថិតនៅក្នុងតំបន់អាស៊ានរបស់យើង ខណៈកម្ពុជា បានប្តេជ្ញាយ៉ាងម៉ឺងម៉ាត់ក្នុងកាគាំទ្រ និងចូលរួមយ៉ាងពេញលេញ នូវវិធានការយុទ្ធសាស្ត្រទាំង៧ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផែនការសកម្មភាពរបស់យន្តការសុវត្ថិភាពទន្លេមេគង្គ ពិសេសសូមសមាជិកអាស៊ានទាំងអស់ គួរគប្បីប្រកាន់យកនូវការអនុវត្តទិសស្លោករួមមួយគឺ គោលដៅតែមួយ ផលប្រយោជន៍រួម ចំពោះការប្រយុទ្ធប្រឆាំង និងការដោះស្រាយបញ្ហាគ្រឿងញៀននៅក្នុងតំបន់ ដើម្បីចូលរួមចំណែកឈានទៅសម្រេចបាននូវចក្ខុវិស័យតែមួយ អត្តសញ្ញាណតែមួយ សហគមន៍តែមួយ (One Vision, One identity, One community) របស់អាស៊ាន ។
សូមបញ្ជាក់ថា នៅព្រឹកថ្ងៃទី២៨ ខែសីហា ឆ្នាំ២០១៩ នេះ នៅខេត្តសៀមរាប មានបើកកិច្ចប្រជុំថ្នាក់មន្ត្រីជាន់ខ្ពស់ស្តីពីបញ្ហាគ្រឿងញៀន លើកទី៤០ ហៅកាត់ថា អាសូត ក្រោមអធិបតីភាពឯកឧត្តមនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រយឆាំងគ្រឿងញៀននៃកម្ពុជា ដោយចូលរួមពីសមាជិក សមាជិកាអាស៊ាន , លេខាធិការដ្ឋានអាស៊ាន , ដៃគូពិភាក្សា រួមមានចិន , កូរ៉េ , ឥណ្ឌា , រុស្ស៊ី , ជប៉ុន , អូស្ត្រាលី និងអង្គការដៃគូពាក់ព័ន្ឋមួយចំនួន សរុបប្រមាណជាង១៦០នាក់ ក្នុងគោលបំណងពិនិត្យ និងពិភាក្សាលើអនុសាសន៍នានាដែលបានដាក់ចេញក្នុងឆ្នាំកន្លងទៅ ពាក់ព័ន្ធនឹងកិច្ចសហការប្រតិបត្តិការប្រយុទ្ធប្រឆាំងគ្រឿងញៀន ក៏ដូចជាផ្តល់ជាវេទិការ ដើម្បីបណ្តាប្រទេសជាសមាជិកមានឱកាសចែករំលែកបទពិសោធន៍ និងដោះស្រាយរាល់បញ្ហាដែលមានការពាក់ព័ន្ធ និង ដើម្បីលើកកម្ពស់ការចូលរួម និងគាំទ្រពីដៃគូផ្សេងៗទៀតផងដែរ ដែលតែងតែបានរៀបចំឱ្យមានជាកិច្ចប្រជុំជាមួយដៃគួ ក្នុងអំឡុងពេលនៃកិច្ចប្រជុំនេះ ។
ឯកឧត្តមនាយឧត្តមសេនីយ៍ កែ គឹមយ៉ាន មានប្រសាសន៍បន្ថែមថា ជាមួយនេះ យើងបាននឹងកំពុងដំណើរការយ៉ាងសកម្ម និងជាប់ជាប្រចាំ ក្នុងការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ជាបន្តបន្ទាប់ ពីលើកទី១ដល់លើកទី៤ នៅទូទាំងប្រទេសកម្ពុជា ដោយផ្តោតការយកចិត្តទុកដាក់ជាពហុវិស័យ ទាំងលើការផ្សព្វផ្សាយអប់រំ ការ ព្យាបាលស្តារនីតិសម្បទា និងការអនុវត្តច្បាប់ សំដៅលើកកម្ពស់សុខុមាលភាពប្រជាពលរដ្ឋ ថែរក្សាសន្តិសុខ សណ្តាប់ធ្នាប់សង្គម ក៏ដូចជាចូលរួមទប់ស្កាត់ការផលិត និងការចរាចរគ្រឿងញៀនខុសច្បាប់នៅក្នុងតំបន់យើងទាំងមូល ។
ឯកឧត្តមនាយឧត្តមសេនីយ៍ កែ គឹមយ៉ាន មានប្រសាសន៍បន្ថែមទៀតថា តាមរយៈនេះ សូមឲ្យកិច្ចប្រជុំធ្វើការពិនិត្យ និងវាយតម្លៃដោយហ្មត់ចត់បន្ថែមទៀត ចំពោះលទ្ធផលការងារ និងស្ថានភាពគ្រឿងញៀនចុងក្រោយទាំងក្នុងតំបន់ និងលើពិភពលោកទាំងមូល ដោយលើកជាគំនិតផ្តួចផ្តើមផែនការយុទ្ធសាស្ត្រ និងសកម្មភាពថ្មីបន្ថែមទៀត ដើម្បីជាមូលដ្ឋានគ្រឹះដ៏សំខាន់ ដាក់ជូនកិច្ចប្រជុំរដ្ឋមន្ត្រីការបរទេស និងកិច្ចប្រជុំថ្នាក់រដ្ឋមន្ត្រី អាស៊ាន ស្តីពីគ្រឿងញៀនក្នុងឆ្នាំក្រោយ ធ្វើការពិនិត្យ និងសម្រេច ពិសេស សូមឱ្យមាននូវការពង្រឹង និងង្រីកបន្ថែមទៀត នូវកិច្ចសហការ និងការជួយគ្នាទៅវិញទៅមក ទាំងផ្នែកធនធានមនុស្ស ជំនាញបច្ចេកទេស សម្ភារ ទាំងក្នុងកម្រិតតំបន់ អនុតំបន់ទ្វេភាគី ត្រីភាគី និងពហុភាគី ។
សូមបញ្ជាក់ថា ព្រះរាជាណាចក្រកម្ពុជា ត្រូវបានទទួលធ្វើជាម្ចាស់ផ្ទះ និងជាប្រធានដឹកនាំកិច្ចប្រជុំ ដែលរៀបចំនៅខេត្តសៀមរាប ចាប់ពីថ្ងៃទី២៧ ដល់ ៣០ ខែសីហា ឆ្នាំ២០១៩ ហើយនេះជាលើកទី២ ដែលកម្ពុជាមានកិត្តិយសបានទទួលធ្វើជាម្ចាស់ផ្ទះ បន្ទាប់ពីកិច្ចប្រជុំលើកទី១ ត្រូវបានធ្វើឡើងនៅរាជធានីភ្នំពេញកាលពីឆ្នាំ ២០០៩ ខណៈកិច្ចប្រជុំថ្នាក់មន្ត្រីជាន់ខ្ពស់ស្តីពីបញ្ហាគ្រឿងញៀននេះ ត្រូវបានរៀបចំឡើងជារៀងរាល់ឆ្នាំ ដោយបណ្តាប្រទេសជាសមាជិកអាស៊ានត្រូវផ្លាស់ប្តូរវេនគ្នា ទទួលធ្វើជាម្ចាស់ផ្ទះរៀបចំ និងធ្វើជាប្រធាន។
នៅក្នុងកិច្ចប្រជុំនេះ មានក្រុមការងារចំនួន ៥ ដើម្បិពិភាក្សា ទៅ តាមវិស័យ ដែលក្នុងនោះរួមមាន៖ក្រុមការងារអប់រំបង្ការបញ្ហាគ្រឿងញៀន ដឹកនាំដោយប្រទេសហ្វីលីពីន , ក្រុមការងារព្យាបាល និងស្តារនីតិសម្បទា ដឹកនាំដោយប្រទេស ម៉ាឡេស៊ី , ក្រុមការងារអនុវត្តច្បាប់ ដឹកនាំដោយប្រទេសថៃ , ក្រុមការងារស្រាវជ្រាវ ដឹកនាំដោយប្រទេសសឹង្ហបូរី និង ក្រុមការងារអភិវឌ្ឍន៍ដំណាំជំនួស ដឹកនាំដោយប្រទេស ឥណ្ឌូនេស៊ី ។
ចំពោះកិច្ចប្រជុំក្រុមការងារតាមវិស័យនេះ មានគោលបំណងពិនិត្យ និងពិភាក្សាលើការអនុវត្តអនុសាសន៍នានាដែលបានដាក់ចេញដោយកិច្ចប្រជុំកន្លងមក ចែករំលែកបទពិសោធន៍ និងពិភាក្សា ស្វែងគំនិតថ្មីៗ ដើម្បីដាក់ជាអនុសាសន៍សម្រាប់ការអនុវត្តក្នុងឆ្នាំបន្ត ហើយក្រៅពីសមាជិកអាស៊ានទាំង១០ កិច្ចប្រជុំជាមួយដៃគូពិភាក្សា មានអាស៊ានបូកចិន ជប៉ុន សាធារណរដ្ឋកូរ៉ , អាស៊ានបូក រុស្សី និងឥណ្ឌា និង អាស៊ានបូកដៃគូពាក់ព័ន្ធ , អង្គការ UNODC , នគរបាលសហព័ន្ធអូស្ត្រាលី(AFP) , អង្គភាពត្រួតពិនិត្យគ្រឿងញៀនអាមេរិក(DEA) ផងដែរ ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
