នៅរសៀលថ្ងៃទី២៧ ខែសីហា ឆ្នាំ២០១៩ លោកជំទាវ ធីណា ស៊ូសាន រ៉េត ស (Tina Susan Redshaw) ឯកអគ្គរាជទូតចក្រភពអង់គ្លេស ប្រចាំនៅកម្ពុជា បានផ្ដល់កិត្តិយសជាអធិបតី ក្នុងសិក្ខាសាលាផ្សព្វផ្សាយស្ដីអំពី អាហារូបករណ៍ឆីវវិនណីង (Chevening) ថ្នាក់បរិញ្ញាបត្រជាន់ខ្ពស់ ទៅសិក្សានៅចក្រភពអង់គ្លេសសម្រាប់ឆ្នាំ២០២០-២០២១ រយៈពេល០១ឆ្នាំ នៅសាលប្រជុំសាលាខេត្តសៀមរាប។
លោកជំទាវឯកអគ្គរាជទូត បានមានប្រសាសន៍ស្វាគមន៍ក្នុងឱកាសនោះថា អាហារូបករណ៍ឆីវវិនណីង គឺជាអាហារូបករណ៍ ដែលបង្កើតនូវទំនាក់ទំនងដល់ប្រជាជនទូទាំងពិភពលោក ហើយក៏ជាការផ្ដល់ឱកាសដល់ពួកគេស្វែងយល់ពីចក្រភពអង់គ្លេស។ លោកជំទាវ បានបន្ថែមថា វត្តមានរបស់លោកជំទាវនៅខេត្តសៀមរាបនាពេលនេះ ដោយសារលោកជំទាវយល់ថាខេត្តសៀមរាប ក៏មានប្រជាពលរដ្ឋមានសមត្ថភាពអាចទទួលបានអាហារូបករណ៍នេះ មិនមែនមានតែរាជធានីភ្នំពេញនោះឡើយ។
ក្នុងឱកាសនោះ ក៏មានការធ្វើបទបង្ហាញពីបទពិសោធ ដើម្បីទទួលបានអាហារូបករណ៍ឆីវវិនណីង ពីអតីតនិស្សិតជោគជ័យផងដែរ។ កញ្ញា រស្មី ជាអតីតនិស្សិតទទួលបានអាហាររូបករណ៍បានបង្ហាញថា អាហារូបករណ៍សម្រាប់ឆ្នាំ២០២០-២០២១ អាចមានចំនួនរហូតដល់ជិត២០រូប ដែលពួកគេអាចជ្រើសរើសសាកលវិទ្យាល័យ និងមុខវិជ្ជាទៅតាមចំណង់ចំណូលចិត្តរបស់ពួកគេ នៅទូទាំងចក្រភពអង់គ្លេស ដែលរាល់ការចំណាយទាំងអស់ក្នុងលក្ខខណ្ឌការសិក្សា ស្ថិតនៅក្នុងអាហារូបករណ៍។ កញ្ញា បានបញ្ជាក់ថា នៅកម្ពុជាមានតែជនជាតិខ្មែរតែប៉ុណ្ណោះដែលមានសិទ្ធប្រឡងប្រជែង ទទួលបានអាហារូបករណ៍នេះ។
សូមជម្រាបថា ក្នុងឱកាសនោះ មានសិស្សនិស្សិត និងសាស្រា្តចារ្យមកពី សាកលវិទ្យាល័យ ចំនួន០៧ និង០១វិទ្យាស្ថាន ក្នុងខេត្តសៀមរាប ចូលរួមស្ដាប់ និងសាកសួរសំណួរ ដោយឡែករាល់ចម្ងល់ និងសំណួរទាំងអស់ របស់លោកអ្នក ដែលចង់ដាក់ពាក្យយកអាហារូបករណ៍នេះ លោកអ្នកអាចធ្វើការទំនាក់ទំនង ស្ថានទូតចក្រភពអង់គ្លេសនៅកម្ពុជា និងអ៊ីម៉ែល ukincambodia@fco.gov.uk។
អត្ថបទ និងរូបភាព៖ លោក សេង ផល្លី
