ប្រជាពលរដ្ឋទីទ័លក្រ និង រងគ្រោះដោយគ្រោះធម្មជាតិ ចំនួន ៤៥០ គ្រួសារ មកពីសង្កាត់ចំនួនពីរ ក្រុងសៀមរាប គឺ សង្កាត់ទឹកវិល និងសង្កាត់ស្រង៉ែ បានទទួលអំណោយរបស់រាជរដ្ឋាភិបាល ដែលផ្តល់តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា ហើយត្រូវបានមន្ទីរសង្គមកិច្ច អតីតយុទ្ធជននិងយុវនីតិសម្បទាខេត្តសៀមរាប ដែលក្នុងមួយគ្រួសារទទួលបានកន្ទេល១ ,មុង១ , ភួយ១ , សារុង១ និង ក្រម៉ា១ ។
ពិធីប្រគល់អំណោយនេះ បានប្រព្រឹត្តទៅនៅក្នុងបរិវេណវត្តសណ្តាន់ សង្កាត់ទឹកវិល ក្រុងសៀមរាប កាលពីព្រឹកថ្ងៃទី២៨ ខែសីហា ឆ្នាំ២០១៩នេះ ក្រោមវត្តមានលោក នាក់ ណេរ៉ុន អភិបាលរងនៃគណៈអភិបាលខេត្តសៀមរាប ដោយមានការចូលរួមពីថ្នាក់ដឹកនាំមន្ទីរ អង្គភាពនានាក្នុងខេត្ត អាជ្ញាធរក្រុង និង ចៅសង្កាត់ទាំងពីរ ។
លោក អោ ម៉ៅ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានបញ្ជាក់ថា វិស័យសុខុមាលភាពសង្គម គឺជាអាទិភាពមួយ ក្នុងចំណោមអាទិភាពទាំង៨ របស់មន្ទីរអតីតយុទ្ធជននិងយុវនីតិសម្បទា ដែលត្រូវយកចិត្តទុកដាក់ដោះស្រាយជូនប្រជាពលរដ្ឋ ដែលបានរងគ្រោះគ្រប់មុខសញ្ញា ដែលវិស័យសង្គមកិច្ចយកចិត្តទុកដាក់ ដោះស្រាយរាល់បញ្ហាជួបការលំបាករបស់បងប្អូន សំខាន់ជនរងគ្រោះ និង ជនងាយរងគ្រោះ ។
ព័ត៌មានជាតិ ថ្មីៗ
លោក អោ ម៉ៅ បានបញ្ជាក់បន្ថែមថា រាជរដ្ឋាភិបាលកម្ពុជា បានដាក់ចេញនូវគោលនយោបាយគាំពារសង្គម ក្នុងនោះរួមមាន គាំពារមនុស្សវ័យចំណាស់ និង គាំពារទៅលើសុខុមាលភាពស្ត្រីនិងកុមារ ពិសេសបានអនុវត្តឧបត្ថម្ភសាច់ប្រាក់ដល់ស្ត្រីមានផ្ទៃពោះ សម្រាប់ការពិនិត្យផ្ទៃពោះ និង សម្រាលកូន និង កុមារក្រោមអាយុ២ឆ្នាំ ក្នុងគ្រួសារក្រីក្រ ដោយអនុវត្តចាប់ពីថ្ងៃទី០១ ខែមិថុនា ឆ្នាំ២០១៩នេះតទៅ ខណៈក្នុងឆ្នាំ២០១៩ បានផ្តល់អំណោយជាសម្ភារប្រើប្រាស់ និងគ្រឿងបរិភោគ ជូនមនុស្សចាស់ជរា ជនងាយរងគ្រោះ និងជនរងដោយគ្រោះធម្មជាតិនៅក្នុងក្រុងសៀមរាប , ស្រុកសូទ្រនិគម , ស្រុកអង្គរជុំ , ស្រុកអង្គរជុំ , ស្រុកក្រឡាញ់ និង ស្រុកប្រាសាទបាគង សរុបចំនួន១២៩គ្រួសារ ។
មានប្រសាសន៍នោះ លោក នាក់ ណេរ៉ុន អភិបាលរងខេត្តសៀមរាប ក្នុងនាមឯកឧត្តមអភិបាលខេត្ត បានសម្ដែងនូវអំណរគុណយ៉ាងជ្រាលជ្រៅ ចំពោះប្រមុខរាជរដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន ដែលជានិច្ចកាល តែងយកចិត្តទុកដាក់ខ្ពស់នូវសុខទុក្ខរបស់ប្រជាពលរដ្ឋគ្រប់មូលដ្ឋាន ដែលជួបប្រទះនូវភាពក្រីក្រ និង គ្រោះធម្មជាតិផ្សេងៗ ខណៈដែលសម្ដេចតេជោ ធ្លាប់បានមានប្រសាសន៍ថា មិនទុកឲ្យពលរដ្ឋណាម្នាក់ស្លាប់ដោយសាររង គ្រោះ ដោយអត់អាហារនោះឡើយ ។
លោក នាក់ ណេរ៉ុន មានប្រសាសន៍បន្ថែមថា ក្រោមគោលនយោ បាយឈ្នះៗរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បាននាំមកនូវសុខសន្តិភាពពេញលេញទូទាំងប្រទេស ព្រមទាំងធ្វើឲ្យមានការអភិវឌ្ឍន៍លើគ្រប់វិស័យ នៅគ្រប់មូលដ្ឋាន ជារួមមានសាលារៀន , មន្ទីរពេទ្យ , វត្តអារាម , ផ្លូវថ្នល់ , ស្ពាន និង ប្រព័ន្ធធារាសាស្ត្រជាដើម ដែលសមទ្ធិផលទាំងនេះ កើតចេញពីស្មារតីនៃថ្ងៃជ័យជំនះ៧មករា និង កត្តាសន្តិភាព នៃគោលនយោបាយឈ្នះៗ របស់សម្តេចតេជោ ហ៊ុន សែន ខណៈដែលប្រទេសកម្ពុជានាអតីតកាល បានឆ្លងកាត់នូវវិនាសកម្មនៃសង្គ្រាម ជាពិសេស ក្នុងរបបកម្ពុជាប្រជាធិបតេយ្យ ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី០៧ ខែមករា ឆ្នាំ១៩៧៩ ដែលបានធ្វើឲ្យប្រទេសជាតិទាំងមូល ទទួលនូវមហាវិនាសកម្ម និង ខ្ទេចខ្ទាំយ៉ាងធ្ងន់ធ្ងរបំផុតលើគ្រប់វិស័យ ដែលមិនធ្លាប់កើតមានក្នុងប្រវត្តិសាស្ត្រមនុស្សជាតិ ។
លោក នាក់ ណេរ៉ុន មានប្រសាសន៍បន្ថែមទៀតថា បច្ចុប្បន្ននេះ ប្រមុខរាជរដ្ឋាភិបាលកម្ពុជា ក៏បានយកចិត្តទុកដាក់ខ្ពស់ ក្នុងការផ្តល់គោលរបបគោលនយោបាយ ជូនដល់គ្រួសារក្រីក្រ និង បងប្អូនជាស្ត្រី និង កម្មការី ដោយទទួលបាននូវបេឡាជាតិរបបសន្តិសុខសង្គម ព្រមទាំងទៅពិនិត្យ និង ព្យាបាលជំងឺនៅតាមមន្ទីរពេទ្យរដ្ឋ និង មណ្ឌលសុខភាព ដោយមិនគិតពីតម្លៃសេវា ដូច្នេះក្នុងឱកាសនេះ សូមឲ្យបងប្អូនប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាពរបស់ខ្លួនឲ្យបានល្អ ហើយប្រសិនបើមានជំងឺអ្វីកើតឡើង សូមទៅពិនិត្យ និង ព្យាបាលជំងឺនៅតាមមណ្ឌលសុខភាពដែលនៅជិតបំផុត ឲ្យបានទាន់ពេលវេលា ចៀសវាងទុកយូរ បណ្ដាលឲ្យទៅជាជំងឺធ្ងន់ធ្ងរ ៕
អត្ថបទ និង រូបថត : លោក ម៉ី សុខារិទ្ធ និង លោក ខេង ឧត្ដម
កែសម្រួលអត្ថបទ : លោក លីវ សាន្ត
