មន្ត្រីនៃអាជ្ញាធរជាតិអប្សរា បានឲ្យដឹងថា ក្នុងគោលបំណងលើកកម្ពស់សោភ័ណភាព ព្រមទាំងបង្កើនភាពស្រស់ស្អាត និងទេសភាពបៃតង តាមដងផ្លូវសំខាន់ៗក្នុងក្រុងសៀមរាប មកកាន់រមណីយដ្ឋានអង្គរ អាជ្ញាធរជាតិអប្សរា គ្រោងនឹងដាំកូនឈើលម្អផ្លូវ ចាប់ពីព្រលានយន្តហោះអន្ដរជាតិខេត្តសៀមរាបរហូតដល់មុខប្រាសាទអង្គរវត្ត ដែលគម្រោងនេះមិនត្រឹមតែបង្កើនភាពទាក់ទាញបែបលក្ខណៈធម្មជាតិដល់រមណីយដ្ឋានអង្គរប៉ុណ្ណោះទេ តែក៏បានចូលរួមយ៉ាងសំខាន់ក្នុងការលើកតម្លៃលេចធ្លោជាសកលនៃរមណីយដ្ឋានអង្គរ តាមរយៈការរក្សាបាននូវភាពឆ្លុះបញ្ចាំងគ្នាទៅវិញទៅមក រវាងប្រាសាទធម្មជាតិ និងសហគមន៍មនុស្ស។
មន្ត្រីបានឲ្យដឹងបន្ថែមថា កូនឈើដែលនឹងត្រូវដាំលម្អតាមដងផ្លូវនេះមានចំនួនជាង១ពាន់ដើម ដែលជាប្រភេទកូនឈើធ្នង់ ជាប្រភេទឈើប្រណិត ដែលប្រជាជនខ្មែរទូទៅនិយមចូលចិត្ត ហើយការដាំកូនឈើឡើងវិញតាមដងផ្លូវនាពេលនេះ ក៏ស្របគ្នានឹងអាជ្ញាធរជាតិអប្សរាទើបធ្វើការជួសជុលនិងកែលម្អផ្លូវនេះជាថ្មី ដើម្បីបង្កភាពងាយស្រួលដល់ការធ្វើចរាចរណ៍ដល់បងប្អូនប្រជាពលរដ្ឋ ក៏ដូចជាភ្ញៀវទេសចរដែលមកកម្សាន្តខេត្តសៀមរាប។
ជាមួយគ្នានេះ ដើម្បីរៀបចំសណ្តាប់ធ្នាប់សាធារណៈនិងរបៀបរៀបរយក្នុងទីធ្លាមុខប្រាសាទអង្គរវត្ត អាជ្ញាធរជាតិអប្សរាក៏នឹងធ្វើការដាំដើមក្រវ៉ាន់ និងដើមឈើប្រភេទផ្សេងមួយចំនួនទៀត នៅតាមដងផ្លូវមុខប្រាសាទអង្គរវត្ត ដែលជាច្រកចូលចម្បង សម្រាប់ទៅទស្សនាប្រាសាទអង្គរវត្តដែរ ៕
អត្ថបទ និង រូបថត : លោក ម៉ាត់ អារីហ្វីន
កែសម្រួលអត្ថបទ : លោក លីវ សាន្ត
