បន្ទាប់ពីបានធ្វើការបណ្តុះបណ្តាល កម្មវិធីអប់រំបេតិកភណ្ឌសម្រាប់កុមារ ដល់សិស្សសាលាសបឋមសិក្សាស្រះស្រង់ និងសិស្សវិទ្យាល័យនគរធំ អស់រយៈពេល៨ខែកន្លងមក គឺចាប់ផ្ដើមពីខែមករា ដល់ខែសីហា ឆ្នាំ២០១៩ កម្មវិធីនេះ ត្រូវបានបិទបញ្ចប់ប្រកបដោយភាពជោគជ័យ កាលពីថ្ងៃទី២៤ ខែសីហា ឆ្នាំ២០១៩ ដែលរៀបចំដោយអង្គការគាំពារកេរមរតក សហការជាមួយអាជ្ញាធរជាតិអប្សរា និងសប្បុរសជន ។
គោលបំណងនៃកម្មវិធីនេះ គឺបង្កើតឡើងដើម្បីផ្ដល់ឱកាសឱ្យកុមារដែលកើត និងរស់នៅក្នុងតំបន់រមណីយដ្ឋានវប្បធម៌-ប្រវត្តិសាស្ត្រ យល់ដឹងពីកេរមរតកវប្បធម៌របស់ខ្លួន និងបណ្ដុះគំនិតកុមារឱ្យជ្រួតជ្រាបពីតម្លៃមរតកវប្បធម៌ ជាពិសេស ពួកគេអាចធ្វើជាអ្នកស្នងមរតកវប្បធម៌នៅសហគមន៍របស់ខ្លួន លើវិស័យថែរក្សាការពារ គ្រប់គ្រងកេរមរតកវប្បធម៌នាពេលអនាគតបានយ៉ាងល្អ ។
លោក អ៊ឹម សុខរិទ្ធី សមាជិកក្រុមប្រឹក្សាភិបាលអង្គការគាំពារកេរមរតក និងអនុប្រធានក្រុមការងារអប់រំបេតិកភណ្ឌ នៃអាជ្ញាធរជាតិអប្សរា មានប្រសាសន៍ថា កម្មវិធីអប់រំបេតិកភណ្ឌជាផ្នែកមួយនៃកម្មវិធីអប់រំរបស់ក្រសួង ដោយផ្តោតទៅលើបច្ចុប្បន្នភាពនៃការស្រាវជ្រាវ របកគំហើញថ្មីៗ ដើម្បីបង្រៀនដល់សិស្សានុសិស្សឱ្យយល់ដឹងច្បាស់លាស់ទាន់សម័យកាល ពិសេសចំពោះសិស្សបឋមសិក្សា បង្រៀនមូលដ្ឋានឱ្យស្គាល់ទូទៅអ្វីជាបេតិកភណ្ឌ មានអ្វីខ្លះ , អ្វីជាកេមរតក ? ដោយសិក្សាក្នុងថ្នាក់ និងចុះសិក្សានៅតាមរមណីយដ្ឋានប្រវត្តិសាស្ត្រ សារមន្ទីរ និងផាត់គំនូរពណ៌ជាដើម។
លោក អ៊ឹម សុខរិទ្ធី បានបញ្ជាក់បន្ថែមថា ចំពោះសិស្សវិទ្យាល័យ គឺបង្រៀនពីសេចក្តីណែនាំទូទៅនៃប្រវត្តិសាស្ត្រ បុរាណវិទ្យា នរវិទ្យា និងវិធីសាស្ត្រស្រាវជ្រាវ ដែលអាចធ្វើឱ្យយុវជនអនុវត្ត ស្រាវជ្រាវចងក្រងឯកសារដោយខ្លួនឯងនៅក្នុងសហគមន៍របស់ខ្លួន ហើយក្រៅពី សាលាគោលដៅក្នុងតំបន់បេតិកភណ្ឌ នាពេលអនាគត កម្មវិធីអប់រំបេតិកភណ្ឌសម្រាប់កុមារនេះ នឹងពង្រីកវិសាលភាពទៅតំបន់ផ្សេងៗឱ្យកាន់តែទូលំទូលាយ។
លោកស្រី ចយ ក្លាក (Joyce H. Clark) ប្រធានក្រុមប្រឹក្សាភិបាលអង្គការគាំពារកេរមរតក បានលើកឡើងថា ខ្លឹមសារនៃការអប់រំបេតិកភណ្ឌមានច្រើនបែបបទ ទាំងលើដី ក្រោមដី និងនៅក្នុងទឹក រួមទាំងការគោរពប្រតិបត្តិរបស់ប្រជាជន ប៉ុន្តែអ្វីដែលសំខាន់ ក្រោយពីរៀនសូត្រហើយ ធ្វើឱ្យយើងចេះស្រឡាញ់ និងចេះការពារ ដែលការពារក្នុងក្របខណ្ឌមួយថា «ថ្ងៃនេះយើងមានវប្បធម៌នេះ ថ្ងៃស្អែកក៏នៅមានវប្បធម៌នេះ ហើយនៅថ្ងៃខានស្អែក ក៏យើងនៅរក្សាបានដដែល បន្តដល់កូនចៅជំនាន់ក្រោយ» ហើយអង្គការគាំពារ កេរមរតក នឹងដកខ្លួនចេញពីប្រទេសកម្ពុជា ដោយបង្កើតអង្គការថ្មីក្នុងស្រុក ដឹកនាំដោយកូនខ្មែរផ្ទាល់ និងរក្សាទស្សនៈវិស័យដដែល មានឈ្មោះថា អង្គការមរតកវប្បធម៌ខ្មែរ។
លោក អ៊ុន មណីនីតា នាយកប្រតិបត្តិនៃអង្គការគាំពារកេរមរតក បានឱ្យដឹងថា ឆ្នាំ២០១៨ អង្គការគាំពារកេរមរតក សហការជាមួយអាជ្ញាធរជាតិអប្សរា ពាក់ព័ន្ធនឹងកម្មវិធីអប់រំបេតិកភណ្ឌសម្រាប់កុមារនៅតំបន់អង្គរ ក្នុងគោលដៅគឺបណ្តុះបណ្តាលកុមារក្នុងតំបន់អង្គរ ដែលកើតនិងធំធាត់ឡើងនៅទីនេះ បានយល់ដឹងពីសក្កានុ ពលវប្បធម៌នៅជុំវិញខ្លួនរស់នៅមានច្រើនកម្រិតណា ដែលត្រូវស្វែងយល់ ថែរក្សា រៀនបន្ថែម និងបម្រើការលើមុខជំនាញនេះ និង ដោយមើលឃើញភាពជោគជ័យនៃការអប់រំបេតិកភណ្ឌនៅបន្ទាយឆ្មារ ដូច្នេះហើយអង្គរការគាំពារកេរមរតក បានផ្តួចផ្តើមកម្មវិធីអប់រំបេតិកភណ្ឌសម្រាប់កុមារនៅតំបន់អង្គរ ដែលការបណ្តុះបណ្តាលនៅទីនេះមានលក្ខណៈតែមួយនៅបន្ទាយឆ្មារ កោះកេរ សំបូរព្រៃគុក។ល។
គួររំលឹកថា ក្នុងឱកាសនោះដែរ មានសប្បុរសជនខ្មែរនៅក្នុងខេត្តសៀមរាប ដែលជាភ្នាក់ងារឯកជន និង សហគ្រិនវ័យក្មេងមួយចំនួន បានជួយឧបត្ថម្ភជាសម្ភារសិក្សា សម្ភារកីទ្បា ដបទឹក កាបូបស្ពាយ និងចែកលិខិតសរសើរដល់សិស្សឆ្នើមផងដែរ ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
