កសិករមួយរូបស្ទើរតែបាត់បង់ជីវិត ដោយសាររូបគេជាមនុស្សគមិនអាចស្រែកបាន ខណៈត្រាក់ទ័រមួយគ្រឿងបានគៀបរូបគេជាប់ក្នុងភក់ តែជាសំណាងល្អពួកគេទាំងពីរត្រូវបានជួយសង្គ្រោះទាន់ពេលវេលា បច្ចុប្បន្នកំពុងទទួលការព្យាបាល។
នៅព្រឹកថ្ងៃទី២៧ ខែសីហា ឆ្នាំ២០១៩នេះ ជនរងគ្រោះ ដោយសារក្រឡាប់ត្រាក់ទ័រ ២នាក់ កាលពីយប់ម្សិលមិញនេះ ត្រូវបាន លោក ឃុត សំអាត ប្រធានក្រុមប្រឹក្សាស្រុក និងជាប្រធានកិត្តិយសអនុសាខាកាកបាទក្រហមស្រុកក្រឡាញ់ រួមនិងលោកស្រី ម៉ននី រង្សី អភិបាលស្រុក និងជាប្រធានអនុសាខាកាកបាទក្រហមកម្ពុជាស្រុកក្រឡាញ់ ចុះសួរសុខទុក្ខ នៅមន្ទីរពេទ្យបង្អែកស្រុកក្រឡាញ់ ខេត្តសៀមរាប។
តាមការឲ្យដឹងតាមទូរសព្ទ ពីនាយករងរដ្ឋបាលស្រុកក្រឡាញ់ បានឲ្យដឹងថា គ្រោះថ្នាក់នេះ កើតឡើងនៅវេលាម៉ោងប្រមាណ ៧យប់ ថ្ងៃទី២៦ ខែសីហា ឆ្នាំ២០១៩ ស្ថិតក្នុងភូមិតសន្ថន ឃុំសំបួរ ស្រុកក្រឡាញ់ ខេត្តសៀមរាប គ្រោះថ្នាក់នេះបណ្ដាលមក ពីម៉ាស៊ីនត្រាក់ទ័រមានភាពចំណាស់ ជាហេតុនាំឲ្យអ្នកបើកបរគ្រប់គ្រងកម្លាំងម៉ាស៊ីនមិនបាន ទើបថយជ្រុលធ្លាក់ក្នុងស្ទឹងក្រឡាញ់តែម្ដង។ ទោះបីជាមានប្រជាពលរដ្ឋនៅក្បែរកន្លែងកើតហេតុ ដឹងភ្លាមៗ ក៏ដោយ ក៏ការជួយសង្គ្រោះត្រូវចំណាយពេលរហូតដល់ទៅ២ម៉ោង ទើបសង្គ្រោះជនរងគ្រោះទាំងពីររូបនោះបាន។
ព័ត៌មានជាតិ ថ្មីៗ
ជនរងគ្រោះទាំងពីរនាក់នោះ ទី១មានឈ្មោះ ក្លេន គ្រី ជាអ្នកបើករ និងជាមនុស្សគ អាយុ ៣៦ឆ្នាំ មានមុខរបរជាកសិករ រងរបួសធ្ងន់ ទី២ឈ្មោះ សារឿន អាយុ ៣៤ ឆ្នាំ មានមុខរបរជាកសិករ រងរបួសស្រាល។ បន្ទាប់ពីជួយសង្គ្រោះបានពីក្នុងស្ទឹង ពួកគេទាំងពីរត្រូវបានក្រុមសង្គ្រោះ នៃមន្ទីរពេទ្យបង្អែកស្រុកក្រឡាញ់ នាំទៅមន្ទីរពេទ្យភ្លាមៗ តាមរយៈរថយន្តសង្គ្រោះបន្ទាន់ស្រុក។
សូមជម្រាបថា អំណោយចែកជូននាពេលនោះ រួមមាន មី ១កេះ ភួយ១ បំពង់ទឹកក្តៅ១ កំសៀវ១ ស្កស ១គ.ក ទឹកដោះគោ០៦កំប៉ុង ទឹកសុទ្ធ ២យួរ ត្រីខ ១យួរ ទឹកផ្លែឈើ១២កំប៉ុង និងថវិកា១០ម៉ឺនរៀល។ ជាមួយគ្នានោះដែរ ក៏មានការចូលរួមពីក្រុមការងារសហភាពសហព័ន្ធយុវជនកម្ពុជាស្រុកក្រឡាញ់ ដោយបានឧបត្ថម្ភអ្នករងរបួសធ្ងន់ ថវិកា ១០ម៉ឺន៩ពាន់រៀល និងអ្នករបួសស្រាលទទួលបានថវិកា ៦ម៉ឺនរៀល។
អត្ថបទ៖ សេង ផល្លី
រូបភាព៖ រដ្ឋបាលស្រុកក្រឡាញ់
