នៅព្រឹកថ្ងៃទី២៧ ខែសីហា ឆ្នាំ២០១៩នេះ អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ បានរៀបចំសិក្ខាសាលាផ្សព្វផ្សាយមួយ ស្ដីពីការលើកទឹកចិត្ត ផ្នែកពន្ធដារចំពោះសហគ្រាសប្រកបអាជីវកម្ម ក្នុងវិស័យកសិកម្មនៅខេត្តសៀមរាប ក្រោមអធិបតីភាពរបស់លោក វ៉ាន់ ពុទ្ធិពល អគ្គនាយករង នៃអគ្គនាយកដ្ឋានពន្ធដារ និងជាតំណាងឯកឧត្ដម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ , ឯកឧត្ដម ខូយ ឈីន សមាជិកក្រុមប្រឹក្សាខេត្តសៀមរាប និងជាតំណាងឯកឧត្ដម អ៊ឹង ហឿន ប្រធានក្រុមប្រឹក្សាខេត្ត និង លោក ចឹក គឹមជុន នាយករងរដ្ឋបាលខេត្ត និង តំណាងឯកឧត្ដម ទៀ សីហា អភិបាលខេត្តសៀមរាប ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត , តំណាងសភាពាណិជ្ជកម្មខេត្តសៀមរាប , ម្ចាស់ និងតំណាងសហគ្រាស ស្ថិតក្នុងវិស័យកសិកម្ម មកពីខេត្តកំពង់ធំ កំពង់ចាម និងខេត្តសៀមរាប ប្រមាណ ២០០នាក់។
មានប្រសាសន៍ក្នុងឱកាសនោះ លោក ចឹក គឹមជុន តំណាងឯកឧត្ដម ទៀ សីហា អភិបាលខេត្តសៀមរាប បានសម្ដែងនូវការគាំទ្រចំពោះសិក្ខាសាលាផ្សព្វផ្សាយ ស្ដីពីការលើកទឹកចិត្តផ្នែកពន្ធដារ ចំពោះសហគ្រាសប្រកបអាជីវកម្ម ក្នុងវិស័យកសិកម្ម ដែលរៀបចំឡើងដោយអគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ ព្រោះនឹងធ្វើឲ្យធុរជនដែលប្រកបអាជីវកម្មក្នុងវិស័យកសិកម្មនេះ បានយល់ដឹងថ្មីៗបន្ថែមទៀត ជុំវិញការអនុគ្រោះ និង ការលើកលែង នូវអាករលើតម្លៃបន្ថែម ក្នុងវិស័យកសិកម្ម ប៉ុន្តែសុំឲ្យសិក្ខាកាមទាំងអស់ ត្រូវតែមានសេចក្ដីក្លាហានក្នុងការលើកឡើងជាមតិ យោបល់ និង សំណូមពរ ដែលជាតម្រូវការចាំបាច់សម្រាប់អាជីវកម្មរបស់ខ្លួន ។
លោក វ៉ាន់ ពុទ្ធិពល អគ្គនាយករង នៃអគ្គនាយកដ្ឋានពន្ធដារ មានប្រសាសន៍ថា គោលបំណងនៃសិក្ខាសាលាថ្ងៃនេះ គឺដើម្បីផ្សព្វផ្សាយនូវបទប្បញ្ញត្តិ ដែលពាក់ព័ន្ធនឹងការលើកទឹកចិត្តផ្នែកពន្ធដារ ដល់សហគ្រាសប្រកបអាជីវកម្មក្នុងវិស័យកសិកម្ម ដូចជា៖ ការអនុគ្រោះនូវអាករលើតម្លៃបន្ថែមជាបន្ទុករបស់រដ្ឋ ចំពោះការនាំចូល និងការផ្គត់ផ្គង់ទំនិញមួយចំនួន ដូចជាជីគ្រប់ប្រភេទ ពូជដំណាំគ្រប់ប្រភេទ បសុឱសថ ចំណីសត្វ និងចំណីបន្ថែម ពូជសត្វគ្រប់ប្រភេទ គ្រឿងយន្ត និងឧបករណ៍កសិកម្មប្រភេទ រីឯការលើកលែងអាករលើតម្លៃបន្ថែម លើការផ្គត់ផ្គង់ផលិតផលកសិកម្មមិនទាន់កែច្នៃផ្តល់ការលើកលែងអាករលើតម្លៃបន្ថែម លើការផ្គត់ផ្គង់ផលិតផលកសិកម្ម មិនទាន់កែច្នៃដែលមានដូចជា ឫស មើម ដើម សំបក ផ្លែ ផ្កា ឬ គ្រាប់នៃរុក្ខជាតិ ដែលបានមកពីការធ្វើកសិកម្មដាំដុះ ទោះមិនទាន់កិនឬកិនបំបែករួចហើយក្តី និងដែលមិនទាន់ត្រូវបានយកទៅកែច្នៃជាផលិតផលផ្សេងៗ ដូចជាគ្រាប់ធញ្ញជាតិនានា និង ស្រូវអង្ករ ។
លោក វ៉ាន់ ពុទ្ធិពល មានប្រសាសន៍បន្ថែមថា ការលើកទឹកចិត្តអាករលើតម្លៃបន្ថែម ប្រាក់រំដោះពន្ធលើប្រាក់ចំណូល ពន្ធអប្បបរមា ពន្ធកាត់ទុកលើសេវា៖ អាករលើតម្លៃបន្ថែមជាបន្ទុករបស់រដ្ឋ សហគ្រាសដែលផ្គត់ផ្គង់ទំនិញឬសេវាឱ្យដល់សហគ្រាសផលិត ផ្គង់ផ្គត់ក្នុងស្រុក ឬនាំចេញ ស្រូវ អង្ករ ពោត សណ្តែកម្រេច ដំឡូងមី គ្រាប់ស្វាយចន្ទីនិងជ័រកៅស៊ូ អាករលើតម្លៃបន្ថែមជាបន្ទុករបស់រដ្ឋគិតចាប់ពីខែមីនា ឆ្នាំ២០១៩ ដល់ដំណាច់ឆ្នាំ២០២៣ និងត្រូវបានអនុញ្ញាតឥណទានអាករ លើធាតុចូលដែលទាក់ទិននឹងការផ្គត់ផ្គង់នេះ ហើយការព្យួរទុកជាបណ្តោះអាសន្ន នូវការបង់ប្រាក់រំដោះពន្ធលើប្រាក់ចំណូលសហគ្រាសផលិត ផ្គង់ផ្គត់ក្នុងស្រុក ឬនាំចេញ ស្រូវ អង្ករ ពោត សណ្តែកម្រេច ដំឡូងមី គ្រាប់ស្វាយចន្ទី និងជ័រកៅស៊ូត្រូវបានព្យួរទុកជាបណ្តោះអាសន្ននូវការបង់ប្រាក់រំដោះពន្ធលើប្រាក់ចំណូលប្រចាំខែ សម្រាប់រយៈពេល ០៥ឆ្នាំ គិតចាប់ពីខែមករា ឆ្នាំ២០១៩ រហូតដល់ដំណាច់ឆ្នាំ ២០២៣។
លោក វ៉ាន់ ពុទ្ធិពល មានប្រសាសន៍បន្ថែមទៀតថា ក្នុងសិក្ខាសាលានេះ មានវាគ្មិនចំណានៗមកពីអគ្គនាយកដ្ឋានពន្ធដារ ដែលនឹងត្រូវបកស្រាយទៅលើឯកសារនិមួយៗតាមកម្មវិធីដែលបានកំណត់ ប៉ុន្តែសំខាន់ សូមឲ្យសិក្ខាកាមទាំងអស់ ត្រូវតែហ៊ានសាកសួរ ប្រសិនបើមានចម្ងល់ ។
គួររំលឹកថា ដើម្បីទទួលបានការលើកទឹកចិត្តផ្នែកពន្ធដារខាងលើ សហគ្រាសត្រូវបំពេញ តាមលក្ខខណ្ឌទាំង ០៣ ដូចជាស្នើសុំវិញ្ញាបនបត្រអាករលើតម្លៃបន្ថែមជាបន្ទុករបស់រដ្ឋ ពីអគ្គនាយកដ្ឋានពន្ធដារ ដែលមានសុពលភាព ០១ឆ្នាំ ម្តង, ត្រូវភ្ជាប់ជាមួយលិខិតប្រកាសអាករលើតម្លៃបន្ថែមប្រចាំខែ នូវបញ្ជីឈ្មោះសហគ្រាសដែលផ្គត់ផ្គង់ទំនិញឬសេវាជាបន្ទុករបស់រដ្ឋ ,ត្រូវកាន់បញ្ជីគណនេយ្យស្របតាមច្បាប់និងបទប្បញ្ញត្តិជាធរមាន និងប្រកាសបង់ពន្ធអាករដទៃទៀតជាធរមានទៅតាមកាលកំណត់។ ការលើកលែងពន្ធលើប្រាក់ចំណូលសម្រាប់សហគ្រាសធុនតូចនិងមធ្យមក្នុងវិស័យអាទិភាព (ផ្នែកកសិកម្ម) សហគ្រាសធុនតូចនិងមធ្យម ក្នុងវិស័យអាទិភាពចំពោះផលិតផលកសិកម្ម ឬកសិ-ឧស្សាហកម្ម ត្រូវទទួលបានការលើកទឹកចិត្តពន្ធលើប្រាក់ចំណូលដូចជា៖ ៣ឆ្នាំ ចាប់ពីថ្ងៃចុះបញ្ជី ឬធ្វើបច្ចុប្បន្នភាពរួចរាល់ គិតពីខែតុលា ឆ្នាំ២០១៨ តទៅ៥ឆ្នាំ ចាប់ពីថ្ងៃចុះបញ្ជី ឬធ្វើបច្ចុប្បន្នភាពរួចរាល់ គិតពីខែតុលា ឆ្នាំ២០១៨តទៅ ដែលបំពេញលក្ខខណ្ឌណាមួយ ដូចជា៖ប្រើវត្ថុធាតុដើមក្នុងស្រុកចាប់ពី ៦០ថ្ងៃឡើងទៅ ឬបង្កើនចំនួននិយោជិតបន្ថែមយ៉ាងតិច ២០% ឬមានទីតាំងក្នុងតំបន់ប្រមូលផ្តុំសហគ្រាសធុនតូច និងមធ្យម៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
