លោកវរសេនីយ៍ឯក អ៊ុន ស្រស់ អធិការនគរបាលស្រុកស្រីស្នំ បានឲ្យដឹងថា នៅវេលាម៉ោង១២ និង៤៣នាទីយប់ ឈានចូលថ្ងៃទី២៥ ខែ សីហា ឆ្នាំ២០១៩នេះ មានករណីគ្រោះថ្នាក់ចរាចរណ៍មួយកើតឡើងនៅលើកំណាត់ផ្លូវជាតិលេខ៦៨ ចន្លោះបង្គោលគីឡូម៉ែត្រលេខ:៣៥និង៣៦ ស្ថិតនៅក្នុងភូមិត្រុំខាងត្បូង ឃុំ ជ្រោយនាងងួន ស្រុកស្រីស្នំ ខេត្តសៀមរាប រវាងរថយន្តមួយគ្រឿងមិនស្គាល់ម៉ាក ជាមួយនឹង គោយន្តកន្ត្រៃ ( KUBOTA) ដែលបើកបរស្របទិសគ្នាពីត្បូងទៅជើង បានបណ្ដាលឲ្យស្លាប់មនុស្សម្នាក់ ជាម្ចាស់បើកបរគោយន្កកន្ត្រៃ ។
លោកអធិការនគរបាលស្រុកស្រីស្នំ បានឲ្យដឹងទៀតថា ជនរងគ្រោះមានឈ្មោះ ហ៊ាក សុផាន់ ភេទ ប្រុស អាយុ ៣៤ឆ្នាំ មុខរបរ ធ្វើស្រែ មានទីលំនៅបច្ចុប្បន្ន ភូមិស្លែងស្ពាន ឃុំស្លែងស្ពាន ស្រុកស្រីស្នំ ខេត្តសៀមរាប ។ រីឯជនបង្កមិនស្គាល់អត្តសញ្ញាណ ដោយក្រោយពេលបុករួច បានបើកបររថយន្តរត់គេចខ្លួនបាត់ពីកន្លែងកើតហេតុ ។
លោកអធិការ បញ្ជាក់បន្ថែមថា តាមពិនិត្យរបស់នគរបាលជំនាញ បានឲ្យដឹងថា ករណីនេះគឺបណ្តាមកពីអ្នកបើកបររថយន្តគ្មានការប្រុងប្រយ័ត្ន និង គោយន្តកន្ត្រៃយក៏ពុំមានការបំពាក់ភ្លើងសញ្ញាចរាចរណ៍ និង ចំណាំងផ្លាតផងដែរ ទើបបណ្ដាលឲ្យមានគ្រោះថ្នាក់ចរាចរណ៍នេះកើយឡើង។
ហើយនៅក្នុងហេតុការណ៍គ្រោះថ្នាក់ចរាចរណ៍នេះ ធ្វើឲ្យខូចខាត: គោយន្កកន្ត្រៃ ០១គ្រឿង និង មានបន្សល់បំណែករថយន្តធ្លាក់នៅកន្លែងកើតហេតុ: កាងមុខសញ្ញាត្រីកោណកញ្ចក់ភ្លើង ហើយក្រោយកើតហេតុ កម្លាំងនគរបាលជំនាញស្រុកបានចុះវាស់វែង និងបានធ្វើកំណត់ហេតុ រីឯចំណែកសាកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី រីឯរថយន្តបង្កកម្លាំងសមត្ថកិច្ច បាននឹងកំពុងស្រាវជ្រាវ ដើម្បីយកមកដោះស្រាយតាមផ្លូវច្បាប់ ៕
អត្ថបទ ៖ រូបភាព ៖ ម៉ី សុខារិទ្ធ
កែសម្រួល៖ អ៊ុន ណារាជ្យ
