នៅព្រឹកថ្ងៃទី២៦ ខែសីហា ឆ្នាំ២០១៩នេះ នៅសាលប្រជុំសាលាស្រុក មានកិច្ចប្រជុំគណៈកម្មាធិការសម្របសម្រួលបច្ចេកទេស របស់ក្រុមប្រឹក្សាស្រុក អាណត្តិទី៣ ដែលដឹកនាំដោយ លោក សុខ ណារ៉េត អភិបាលរងស្រុក តំណាងលោកស្រី ម៉ននី រង្សី អភិបាល នៃគណៈអភិបាលស្រុកក្រឡាញ់ ដោយមានការអញ្ជើញចូលរួមពី សមាជិកក្រុមប្រឹក្សាស្រុក លោកនាយករដ្ឋបាលស្រុក លោក លោកស្រី ប្រធានការិយាល័យ-អង្គភាព ចំណុះរដ្ឋបាលស្រុក លោក លោកស្រី ប្រធាន អនុប្រធាន ការិយាល័យ-អង្គភាព ជុំវិញស្រុក និងលោក មេឃុំ ទាំង១០។
កិច្ចប្រជុំនាពេលនេះ គឺដើម្បីពិនិត្យ និងអនុម័តលើសេចក្តីព្រាងមួយចំនួនរួមមាន៖
ទី១.ការផ្សព្វផ្សាយសេចក្តីសម្រេចលេខ០១៧/១៩ សសរ ចុះថ្ងៃអង្គារ ៦កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៦ ខែសីហា ឆ្នាំ២០១៩ របស់រដ្ឋបាលស្រុក ស្តីពីការទទួលស្គាល់ប្រធាន អនុប្រធាន និងសមាជិកគណៈកម្មាធិការសម្របសម្រួលបច្ចេកទេស របស់ក្រុមប្រឹក្សាស្រុក។
ទី២.ដើម្បីពិនិត្យ ពិភាក្សា និងអនុម័តលើសេចក្តីព្រាងប្រតិទិនកិច្ចប្រជុំរបស់គណៈកម្មាធិការសម្របសម្រួលបច្ចេកទេស របស់ក្រុមប្រឹក្សាស្រុក អាណត្តិទី៣ (ខែសីហា ឆ្នាំ២០១៩ ដល់ខែមិថុនា ឆ្នាំ២០២០) និងទី៣.គឺដើម្បីពិនិត្យ និងធ្វើបច្ចុប្បន្នភាព នៃការដោះស្រាយលើសំណួរ-សំណូមពរ ដែលបានលើកឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុក អាណត្តិទី២ ឆ្នាំ២០១៧ និងឆ្នាំ២០១៨។
ក្នុងកិច្ចប្រជុំនេះផងដែរ សមាជិក សមាជិកា ទាំងអស់ក៏បានឯកភាព គាំទ្រ និងកែសម្រួលសេចក្តីព្រាងមួយចំនួនខាងលើផងដែរ ដោយក្នុងនោះ ប្រធានអង្គប្រជុំ បានថ្លែងអំណរគុណ ដល់ការអញ្ជើញចូលរួម និងសូមលោក លោកស្រី ដែលមកពីការិយាល័យ-អង្គភាព និងឃុំ ទាំងអស់ យកចិត្តទុកដាក់ ក្នុងកិច្ចការងារនេះ និងដើម្បីយកទៅផ្សព្វផ្សាយបន្ត៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
