កាលពីព្រឹកមិញនេះ លោក បូ ម៉េងទ្រី អភិបាលរងក្រុងសៀមរាប តំណាងប្រធានគណៈកម្មការរដ្ឋបាល និង លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានអញ្ជើញជាអធិបតី ក្នុងពិធីបិទផ្សាយ ជាសាធារណៈនូវឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ ដល់ក្បាលដីសរុបចំនួន ៣,១៧៦ ក្បាលដី ក្នុងសង្កាត់សំបួរ ក្រុងសៀមរាប។
នៅព្រឹកថ្ងៃទី២៦ ខែកក្កដា ឆ្នាំ២០១៩នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានធ្វើការបិទផ្សាយ ជាសាធារណៈនូវឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធរបស់កម្មវិធីអនុវិស័យរដ្ឋបាលដីធ្លី ដែលគាំទ្រថវិកាដោយរាជរដ្ឋាភិបាលកម្ពុជា ក្នុងភូមិចំនួន២ ក្នុងចំណោម ភូមិចំនួន៥ នៃសង្កាត់សំបួរ ក្រុងសៀមរាប ស្ថិតក្នុងបរិវេណ សាលាសង្កាត់សំបួរ។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានបញ្ជាក់ថា ការបិទផ្សាយជាសាធារណៈនូវឯកសារ នៃការវិនិច្ឆ័យនេះមានរយៈពេល ១៥ថ្ងៃ គឺចាប់ពីថ្ងៃទី ២៦ ខែសីហា រហូតដល់ថ្ងៃទី ០៩ ខែកញ្ញា ឆ្នាំ ២០១៩ ដោយគិតរួមទាំងថ្ងៃបុណ្យ និងថ្ងៃឈប់សម្រាក។ ក្នុងរយៈ១៥ថ្ងៃនេះដែរ ប្រជាពលរដ្ឋ ព្រមទាំងស្ថាប័ន និងអង្គភាពពាក់ព័ន្ធទាំងអស់ ក្នុងភូមិចំនួន២ គឺភូមិតាគង់ និងភូមិព្នៅ សរុបទាំងអស់មានចំនួន ៣,១៧៦ ក្បាលដី សូមមកចូលរួមពិនិត្យមើលទិន្នន័យ ដែលបានបិទផ្សាយនេះ ដូចជានៅលើបញ្ជីឈ្មោះម្ចាស់ដី ត្រូវពិនិត្យផ្ទៀងផ្ទាត់ ឈ្មោះ សាវតា ទំហំដី ប្រភេទទ្រព្យ និងនៅលើប្លង់សុរិយោដី ត្រូវពិនិត្យមើល ទីតាំងដី រូបរាងដី ព្រោះនេះគឺជាឱកាសចុងក្រោយ ដែលភាគីពាក់ព័ន្ធទាំងអស់មានសិទ្ធធ្វើការកែតម្រូវ ឬជំទាស់តវ៉ាបាន ក្នុងករណីពិនិត្យមើលទៅឃើញថា មានកំហុសឆ្គងមកគណៈកម្មការរដ្ឋបាល ដើម្បីចៀសវាងវិវាទណាមួយកើតឡើង ក្រោយចេញវិញ្ញាបនបត្រសម្គាល់ម្ចាស់អចលនវត្ថុ ដែលជាភាសាសាមញ្ញហៅថាប្លង់រឹង (បណ្ណកម្មសិទ្ធិ)។
លោក ប៊ូ ជុំសម្បត្តិ បានបញ្ជាក់បន្ថែមថា ក្រោយពីបញ្ចប់ការបិទផ្សាយជាសាធារណៈនូវឯកសារនៃការវិនិច្ឆ័យនេះទៅគណៈកម្មការរដ្ឋបាលនឹងលើកសំណើជូនទៅ ឯកឧត្តមអភិបាលនៃគណៈអភិបាលខេត្តសៀមរាប ដើម្បីសម្រេចចេញវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋដែលជាម្ចាស់ដី និងអ្នកកាន់កាប់ដីរូបណា ដែលបានបំពេញលក្ខខណ្ឌគ្រប់គ្រាន់តាមនីតិវិធីច្បាប់ និងជាក្បាលដីមិនមានទំនាស់។
សូមជម្រាបថា ក្នុងសង្កាត់សំបួរ មានភូមិចំនួន៥ ប៉ុន្តែមានតែភូមិចំនួន២ប៉ុណ្ណោះ ដែលបានធ្វើការបិទផ្សាយ ជាសាធារណៈនូវឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ ដោយឡែកភូមិចំនួន៣ទៀត នាពេលកន្លងមកអាជ្ញាធរមូលដ្ឋានសង្កាត់សំបួរ បានផ្សព្វផ្សាយឲ្យប្រជាពលរដ្ឋមកធ្វើការជួបប្រជុំ ដើម្បីឈានដល់ការបិទផ្សាយ ជាសាធារណៈនូវឯកសារវិនិច្ឆ័យការចុះបញ្ជីដីធ្លីនេះផងដែរ ប៉ុន្តែពុំមានប្រជាពលរដ្ឋចូលរួម។
អត្ថបទ និង រូបភាព ៖ សេង ផល្លី និងលោក ខេង ឧត្តម
