បន្ទាប់ពីថ្នាក់ដឹកនាំខេត្ត បានចុះពិនិត្យស្ថានផ្លូវ ប្រឡាយ និងបរិស្ថានកាលពីពេលកន្លងទៅថ្មីៗនេះរួចមក នៅព្រឹកថ្ងៃទី២៥ ខែសីហា ឆ្នាំ ២០១៩នេះ លោក សុខ ថុល នាយករដ្ឋបាលសាលាខេត្ត សហការជាមួយអាជ្ញាធរក្រុងសៀមរាប អាជ្ញាធរជាតិអប្សរា និង ក្រុមហ៊ុនប្រមូលសំរាម អ៊ែកធីវ ហ្គ្រីន ស៊ីធី បានចុះយុទ្ឋនាការសម្អាត សងខាងកំណាត់ផ្លូវ៦០ម៉ែត្រ ចាប់ពីចំណុចប្រសព្វផ្លូវជាតិលេខ៦ ឆ្ពោះទៅរង្វង់មូលអប្សរា ដោយបានកាប់ក្រីមែកឈើធ្លាក់រយីករយាក ប្រមូលរើសចេញនូវកំណាត់ និងមែកឈើ ព្រមទាំងចុះស្តារ និងសម្អាតសំរាមក្នុងប្រឡាយសំខាន់ៗមួយចំនួនក្នុងក្រុងសៀមរាប ដើម្បីបើកមុខទឹកហូរឱ្យបានលឿនជាងមុន ជៀសវាងមានការហូរយឺតធ្វើឱ្យលិចផ្លូវ។
លោក សុខ ថុល មានប្រសាសន៍ថា ក្នុងនាមអាជ្ញាធរខេត្ត សូមបងប្អូនប្រជាពលរដ្ឋ ចូលរួមសហការរៀបចំសណ្តាប់ធ្នាប់សាធារណៈ តាមដងផ្លូវដោយសម្អាតបរិស្ថាន និង អនាម័យ នៅតាមមុខផ្ទះរបស់ខ្លួនឱ្យបានជាប្រចាំ ដោយត្រូវគិតគូរវេចខ្ចប់សំរាម និងកាកសំណល់ផ្សេងៗ យកទៅចោលក្នុងធុងសំរាម ព្រោះបញ្ហាសំរាម ចោលពាសវាលពាសកាល បានធ្វើឱ្យប៉ះពាល់ដល់សុខុមាលភាពសាធារណៈ ។
លោក សុខ ថុល មានប្រសាសន៍ទៀតថា បញ្ហាសំរាម និងកាកសំណល់នេះ ជាមុខសញ្ញាមួយមិនគួរធ្វេសប្រហែសនោះទេ ជាពិសេសខេត្តសៀមរាប ជាខេត្តទេសចរណ៍ និងដើម្បីសម្រេចគោលដៅទេសចរណ៍ និងបន្តចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ ចាំបាច់ត្រូវរួមគ្នាប្រមូលវេចខ្ចប់សំរាម និងកាកសំណល់ ដាក់ក្នុងធុងសំរាមឱ្យបានត្រឹមត្រូវ បើសំរាមមិនធ្លាក់ដល់ដីទេ នោះផ្ទះយើងនឹងស្អាត ទីក្រុងយើងក៏ស្អាត យើងទាំងអស់គ្នាមានសុខភាពល្អ ។
គួររំលឹកថា កាលពីថ្ងៃទី២៤ ខែសីហា ឆ្នាំ២០១៩នេះ លោក លី សំរិទ្ធ អភិបាលរងខេត្ត និង ជាតំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានចុះពិនិត្យស្ថានភាពផ្លូវ និងប្រព័ន្ធប្រឡាយសំខាន់ៗក្នុងក្រុងសៀមរាប ដើម្បីជួសជុលកែលម្អ នាពេលខាងមុខនេះ ព្រមទាំងបានជំរុញដល់មន្ទីរ អង្គភាព ស្ថាប័ន និងអាជ្ញាធរគ្រប់លំដាប់ថ្នាក់ ព្រមទាំងប្រជាពលរដ្ឋផងដែរ សូមឱ្យសហការគ្នាយកចិត្តទុកដាក់សម្អាតអនាម័យ បរិស្ថានតាមដងផ្លូវ តាមភោជនីយដ្ឋាន និងតាមគេហដ្ឋានរៀងៗខ្លួនឱ្យបានជាប្រចាំ ដោយមិនត្រូវបោះសំរាម ឬកាកសំណល់ផ្សេងៗ ពាសវាលពាសកាល ខ្វះសណ្តាប់ធ្នាប់នោះទេ ៕
អត្ថបទ ៖ លោក យូ វង្ស
រូបថត ៖ រដ្ឋបាលខេត្តសៀមរាប
កែសម្រួលអត្ថបទ ៖ លោក លីវ សាន្ត
