កាលពីថ្ងៃពុធ ក្រុមឧទ្ទាមហួធី នៅក្នុងប្រទេស យេម៉េន បានរាយការណ៍ថា ប្រព័ន្ធការពារដែនអាកាស របស់ពួកគេ បានបាញ់ទម្លាក់ យន្តហោះគ្មានមនុស្សបើក ពហុមុខងារ MQ-9 របស់យោធាអាមេរិក ទៅលើខេត្ត ដាម៉ា ភាគកណ្តាលប្រទេស យេម៉ែន។
យោងតាមសារព័ត៌មាន Sputnik ចេញផ្សាយនៅថ្ងៃទី២១ ខែសីហា ឆ្នាំ២០១៩ បានឱ្យដឹងដោយផ្អែកតាម ការលើកឡើង របស់អ្នកនាំពាក្យក្រសួងការពារជាតិ អាមេរិក ថា រដ្ឋាភិបាល ទីក្រុងវ៉ាស៊ីនតោន បានបញ្ជាក់ថា ក្រុមឧទ្ទាម ហ៊ូធី បានបាញ់ទម្លាក់យន្តហោះ គ្មានមនុស្សបើក របស់អាមេរិក នៅក្នុងប្រទេសយេម៉ែន។
ហេតុការណ៍នេះបានកើតឡើង នៅពេលដែល អ្នកនាំពាក្យចលនា បានប្រាប់វិទ្យុ Al Masirahថា រ៉ុក្កែតដែលទម្លាក់ យន្តហោះគ្មានមនុស្សបើក ត្រូវបានធ្វើទំនើបកម្ម នៅនឹងកន្លែង ហើយនឹងត្រូវបង្ហាញ នៅក្នុងសន្និសីទសារព័ត៌មានមួយ នាពេលឆាប់ៗនេះ។
អ្នកនាំពាក្យចលនារូបនេះ បានព្រមានក្រុមចម្រុះ អារ៉ាប់ ដឹកនាំដោយ អារ៉ាប់ប៊ីសាអូឌីត គិតឱ្យបាន «មួយពាន់ដង មុនពេលចូលលុកលុយ ដែនអាកាសយេម៉ែន»។ប្រទេសយេម៉ែនដែលមាន ទីតាំងស្ថិតនៅភាគខាងត្បូង នៃឧបទ្វីបអារ៉ាប់ បានផុងចូលទៅក្នុងជម្លោះ ក្នុងពេលដែលកម្លាំង រដ្ឋាភិបាលដឹកនាំ ដោយប្រធានាធិបតី Abdrabuh Mansour Hadi និងចលនាឧទ្ទាមហ៊ូធី ត្រូវបានជាប់នៅក្នុង ជម្លោះប្រដាប់អាវុធ អស់រយៈពេលជាច្រើនឆ្នាំ៕
ប្រែសម្រួលៈ ណៃ តុលា
