ព្រៃឈើមានតួនាទីយ៉ាងសំខាន់ ក្នុងការជួយថែរក្សាដំណើរការនៃប្រព័ន្ធអេកូឡូស៊ី ជួយកាត់បន្ថយឥទ្ធិពលជាអវជ្ជមានពីការប្រែប្រួលអាកាសធាតុ និងទប់ស្កាត់ទឹកជំនន់ ខ្យល់ ព្យុះ ការហូរច្រោះដី គ្រោះរាំងស្ងួត និងជួយស្រួបយកជាតិពុលពីបរិយាកាសជាដើម និងផ្តល់នូវផលអនុផលព្រៃឈើ ជាច្រើន ដល់ប្រជាពលរដ្ឋដោយផ្ទាល់ ដែលរួមចំណែកកាត់បន្ថយភាពក្រីក្ររបស់ប្រជាសហគមន៍។គោលដៅយូរអង្វែងរបស់ប្រទេសជាតិយើង គឺការអភិរក្ស និងការគ្រប់គ្រង ធនធានធម្មជាតិ ជីវចំរុះ និងប្រព័ន្ធអេកូឡូស៊ី ប្រកបដោយប្រសិទ្ធភាព និងបានរួមចំណែកក្នុងការកាត់ បន្ថយភាពក្រីក្ររបស់ប្រជាជន និងការអភិវឌ្ឍន៍សេដ្ឋកិច្ចសង្គមឱ្យបានប្រសើរឡើង។ ធនធានធម្មជាតិ គឺជាប្រភពធនធានមួយដ៏រស់រវើក និងមិនចេះរីងស្ងួត ប្រសិនបើយើង ទាំងអស់គ្នាចេះគ្រប់គ្រង ការពារ និងអភិរក្សឱ្យបានសមស្រប។ មួយវិញទៀត ធម្មជាតិទាំងឡាយអាចរស់នៅលើភពផែនដីយើងនេះបាន ដោយ មិនចាំបាច់មានមនុស្ស តែមនុស្ស សត្វទាំងឡាយ មិនអាចរស់នៅដោយខ្វះធម្មជាតិបានទេ។ នេះបើតាមប្រសាសន៍លោក នាក់ ណេរ៉ុន អភិបាលរងខេត្តសៀមរាប ក្នុងពិធីដាំកូនឈើក្នុងឧទ្យានជាតិព្រះជ័យវរ្ម័ន-នរោត្តមភ្នំគូលែន ស្ថិតនៅក្នុងឃុំខ្នងភ្នំ ស្រុកស្វាយលើ ខេត្តសៀមរាប នៅថ្ងៃទី២៣ខែសីហាឆ្នាំ២០១៩។
លោក នាក់ ណេរ៉ុន មានប្រសាសន៍ថា ការដាំកូនឈើនាថ្ងៃនេះ ឆ្លុះបញ្ចាំងសារជា ថ្មីម្តងទៀត នូវការភ្ញាក់រលឹករបស់ប្រជាជាតិយើងទាំងមូល ក្នុងការប្រឈមមុខដោះស្រាយគ្រោះមហន្តរាយបាត់បង់ព្រៃឈើ និងស្មារតីម្ចាស់ការទទួលខុសត្រូវលើជោគវាសនាអនាគតមាតុភូមិយើង សម្រាប់យើងជំនាន់នេះ ក៏ដូចជាជំនាន់ក្រោយ យើងត្រូវចាប់ផ្តើមដោយឥតបង្អែរបង្អង់នូវផែនការស្តារព្រៃឈើ និងការដាំកូនឈើឡើងវិញ ជាខ្សែចង្វាក់គ្រប់ទិសទី ដើម្បីឱ្យ ខេត្តសៀមរាបរបស់យើងរក្សាបាននូវលំនឹងបរិស្ថានធម្មជាតិ និងមានសម្រស់ស្រស់បំព្រងដោយរុក្ខជាតិ ពណ៌បៃតងឡើងវិញ។
លោកអភិបាលរងខេត្ត បានអំពាវនាវ ដល់អ្នកដែលកំពុង បញ្ជាក់ការផ្ទេរ-លក់ដីនៅក្នុងឧទ្យាជាតិ ការកាប់បំផ្លាញព្រៃឈើ ការដុត ឆ្ការ ហ៊ុព័ទ្ធជាដើម ដើម្បីចាប់យកដីព្រៃ សូមឱ្យបញ្ឈប់ជាបន្ទាន់ ពីព្រោះជាសកម្មភាព បទល្មើសដ៏ធ្ងន់ធ្ងរបំផុត នឹងប្រឈមមុខច្បាប់ ដែលមិនអាចអត់ឱនឱ្យបាន។ ដោយឡែកយើងត្រូវរួមសាមគ្គីគ្នា បណ្តុះឡើងវិញនូវគំនិតស្រឡាញ់ព្រៃឈើ ថែរក្សាការពារព្រៃឈើ និងបណ្តុះឡើងវិញ នូវ ទស្សនៈសន្សំសំចៃក្នុងការប្រើប្រាស់ផល-អនុផលព្រៃឈើគ្រប់ប្រភេទ បណ្តុះឡើងវិញនូវស្មារតីគោរពច្បាប់ ការអនុវត្តច្បាប់ ដើម្បីរួមចំណែកកសាងធនធានធម្មជាតិ ជាពិសេស មានព្រៃឈើ និងសត្វព្រៃ កើនឡើងច្រើនជាងមុននៅក្នុងឧទ្យានជាតិព្រះជ័យវរ្ម័ន យើងនេះ។ ចំពោះកូនឈើដែលបានដាំរួចហើយ សូមអាជ្ញាធរគ្រប់លំដាប់ថ្នាក់ និងប្រជាពលរដ្ឋនៅនឹងកន្លែង មេត្តាចូលរួមថែរក្សាឱ្យបានហ្មត់ចត់ជាប្រចាំ ដើម្បីធ្វើឱ្យកូនឈើទាំងនេះ លូតលាស់ ធំធាត់ឆាប់រហ័ស និងពុំបាត់បង់ទៅវិញ។
អត្ថបទ និង រូបភាព ៖ យូ វង្ស
