យោងតាមប្រភពព័ត៌សារព័ត៌មាន BBC បានចុះផ្សាយឲ្យដឹងថា អាជ្ញាធរឥណ្ឌូនេស៊ី កំពុងតាមប្រមាញ់អ្នកទោសជាង ២៥០ នាក់ ដែលបានរត់គេចចេញពីពន្ធនាគារនៅខេត្ត West Papua ។
ការហែកគុករត់ចេញនេះ បានកើតឡើងកាលពីថ្ងៃច័ន្ទ ខណៈដែលក្រុមអ្នកតវ៉ាបានដើរតាមផ្លូវក្នុងទីក្រុងជាច្រើន ដោយបានបិទផ្លូវ និងដុតអាគារជាច្រើនរួមទាំងពន្ធនាគារផងដែរ ។
ភាពវឹកវរនេះត្រូវបានបង្កឡើងដោយសារមានការឃុំខ្លួននិស្សិតមកពី Papuan នៅក្នុងទីក្រុង Surabaya ដោយចោទប្រកាន់ថាពួកគេបានមើលងាយទង់ជាតិឥណ្ឌូនេស៊ី ។
ខណៈពេលនេះផងដែរ កម្លាំងប៉ូលីសក៏ត្រូវបានបញ្ជូនទៅកាន់ Papua មុនការតវ៉ាដែលបានគ្រោងទុកបន្ថែមទៀត ។
អ្នកនាំពាក្យក្រសួងយុត្តិធម៌ អ្នកស្រី Marlien Lande បាននិយាយថា ពន្ធនាគារនៅ Sorong ត្រូវបានដុតបំផ្លាញ ហើយដុំថ្មត្រូវបានគេគប់ទៅលើពួកអ្នកទោស ។
អ្នកស្រី Marlien និយាយថា៖ «អ្នកទោស ២៥៨ នាក់បានរត់គេចខ្លួន ហើយមានតែ ៥ នាក់ប៉ុណ្ណោះ ត្រូវបានចាប់បញ្ជូនមកគុកវិញនៅព្រឹកនេះ» ។ អ្នកស្រីបន្ថែមថាៈ ឆ្មាំ និងបុគ្គលិកជាច្រើននាក់ បានរងរបួស នៅពេលពួកគេព្យាយាមបញ្ឈប់ការរត់គេចខ្លួនរបស់ពួកអ្នកទោសទាំងនោះ ៕
ប្រភពពី ៖ BBC
