នៅថ្ងៃទី២២ ខែសីហា ឆ្នាំ២០១៩ សាខាកាកបាទក្រហមកម្ពុជាខេត្តសៀមរាប បានសហការជាមួយរដ្ឋបាលស្រុកប្រាសាទបាគង រៀបចំវេទិកាសាធារណៈស្តីពីការពារជីវិត និងពិការភាពពីគ្រោះថ្នាក់ចរាចរណ៍ លើកទី១ នៅភូមិស្ពានភ្នែក ឃុំកណ្តែក ស្រុកប្រាសាទបាគង ក្នុងគោលបំណងលើកកម្ពស់តួនាទីជនពិការ ក្នុងការអនុវត្តគម្រោង និងធ្វើឱ្យប្រសើរឡើងនូវលក្ខខណ្ឌរស់នៅរបស់ជនពិការ ជាពិសេសបានផ្តល់ឱកាស និងលើកទឹកចិត្តយុវជនពិការ ឱ្យដើរតួនាទីជាអ្នកដឹកនាំក្លិប , ជាអ្នកផ្សព្វផ្សាយ និង ជាមិត្តអប់រំមិត្តក្នុងគ្រឹះស្ថានសិក្សា , ទីសាធារណៈ និងសហគមន៍ ។
វេទិកានេះ មានអ្នក សម្របសម្រួលជាវាគ្មិន មកពីគណៈកម្មាធិការអនុសាខាកាកបាទក្រហមកម្ពុជាស្រុកប្រាសាទបាគង , ការិយាល័យសាធារណៈការ និងដឹកជញ្ជូនស្រុកប្រាសាទបាគង , អធិការរងនគរបាលស្រុកប្រាសាទបាគង និង អ្នកស្ម័គ្រចិត្តយុវជនកាកបាទក្រហមកម្ពុជា ដោយមានការចូលរួមពីសំណាក់បងប្អូនប្រជាពលរដ្ឋក្នុងស្រុកប្រាសាទបាគង សរុបចំនួនជិត២០០នាក់ ។
វេទិកានេះ ក៏បានបទបង្ហាញ និងពន្យល់អំពីស្ថានភាពសុវត្ថិភាពចរាចរណ៍ ច្បាប់ចរាចរណ៍ផ្លូវគោក និងស្លាកសញ្ញាសំខាន់ៗ , អនុក្រិតស្តីពី ការផាកពិន័យ និងការអនុវត្តច្បាប់ចរាចរណ៍ផ្លូវគោក , ស្ថានភាពជនពិការក្នុងខេត្តសៀមរាប និងសិទ្ធិរបស់ជនពិការ ក្នុងការប្រើប្រាស់ផ្លូវ ដើម្បីទៅទទួលសេវាសាធារណៈរបស់ជនពិការ , បង្ហាញពីវិធីពាក់មួកឱ្យបានត្រឹមត្រូវ និង ចែកខិតប័ណ្ណស្តីពីស្លាកសញ្ញាចរាចរណ៍សំខាន់ៗ ផងដែរ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោកស្រី ប៊ុន ទៀង អភិបាលរងស្រុក និងជាអនុប្រធានអនុសាខាគណៈកម្មាធិការកាកបាទក្រហមកម្ពុជាស្រុកប្រាសាទបាគង បានអំពាវនាវ និងសំណូមពរដល់អ្នកប្រើប្រាស់ផ្លូវនិងអ្នករួមដំណើរ ត្រូវចូលរួមអនុវត្តឱ្យបាននូវអនុសាសន៍សារសុវត្ថិភាពរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា គឺ៖ ថ្ងៃនេះថ្ងៃស្អែកកុំ ឱ្យមានគ្រោះថ្នាក់ចរាចរណ៍ ជាពិសេសបានស្នើដល់អ្នកបើកបរយានជំនិះ ត្រូវមានស្មារតីប្រុងប្រយ័ត្នជានិច្ច ពាក់ខ្សែក្រវ៉ាត់សុវត្ថិភាពឱ្យបានគ្រប់គ្នា និង ពាក់មួកសុវត្ថិភាពឱ្យបានគ្រប់គ្នាទោះជិតឆ្ងាយក៏ដោយ ព្រមទាំងត្រូវបន្ថយល្បឿនទៅតាមស្ថានភាពផ្លូវ កុំបើកវ៉ាជែង បើកបរដោយភាពយោគយល់ និងបើពិសារគ្រឿងស្រវឹងសូមកុំបើកបរ។
លោក លិវ ឡន តំណាងនាយកប្រតិបត្តិសាខាកាកបាទក្រហមកម្ពុជាខេត្តសៀមរាប មានប្រសាសន៍ថា ៖ បច្ចុប្បន្ននេះគ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់ប្រទេសកម្ពុជា វាបានសម្លាប់មនុស្សជាមធ្យមជាង៥នាក់ និងរបួសធ្ងន់១៣នាក់ក្នុងមួយថ្ងៃ ដែលទាំងនេះបានធ្វើឱ្យបាត់បង់ធនធានមនុស្ស ហើយបន្សល់ទុកនូវកុមារកំព្រា ស្ត្រីមេម៉ាយ ជនពិការ ព្រមទាំងបានធ្វើឲ្យប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្ដាប់ធ្នាប់សង្គម ដោយសារ តែអ្នកប្រើប្រាស់ផ្លូវ មិនគោរពច្បាប់ចរាចរណ៍ , បើកបរក្រោមឥទ្ធិពលគ្រឿងស្រវឹង , បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរ។
លោក លិវ ឡន មានប្រសាសន៍បន្ថែមថា ដើម្បីចូលរួមកាត់បន្ថយសោកនាដកម្មនេះ កាកបាទក្រហមកម្ពុជា បានសហការជាមួយម្ចាស់ជំនួយក្នុងនិងក្រៅប្រទេសចាប់តាំងពីឆ្នាំ២០០៥ រហូតមក គឺបានសម្រេចនូវសមិទ្ធផលយ៉ាងច្រើន ដែលចាប់ពីខែកក្កដា ឆ្នាំ២០១៦រហូតមកដល់បច្ចុប្បន្ននេះ អង្គការ LIGHT FOR THE WORLD បានគាំទ្រក្នុងគម្រោងដាក់បញ្ចូលពិការភាពក្នុងការងារសុវត្ថិភាពចរាចរណ៍ ដែលបានអនុវត្តនៅសាខាខេត្តគោលដៅចំនួន២គឺ៖ សាខាខេត្តសៀមរាប និងសាខាខេត្តពោធិសាត់ ក្នុងទិសដៅធ្វើឱ្យមានភាពប្រសើរឡើង ក្នុងការដាក់បញ្ចូលពិការភាពទៅក្នុងដំណើរការ គម្រោងយុវជនកាកបាទក្រហមកម្ពុជានិងសុវត្ថិភាពចរាចរណ៍របស់កាកបាទក្រហមកម្ពុជា។
សូមបញ្ជាក់ថា ចាប់ពីខែមករា ដល់ខែសីហា ឆ្នាំ២០១៩នេះ សាខាកាកបាទក្រហមកម្ពុជាខេត្តសៀមរាប សហការជាមួយក្រុមតន្ត្រីជនពិការ ធ្វើការផ្សព្វផ្សាយពិការភាព ក្នងការងារសុវត្ថិភាពចរាចរណ៍បានចំនួន ០៤លើក ដែលមានសិស្សានុសិស្ស និងប្រជាពលរដ្ឋចូលរួមសរុបចំនួន ១.០៣០នាក់ ក្នុងនោះស្រីចំនួន៦០៥នាក់ និង អ្នកស្ម័គ្រចិត្ត បានចុះអប់រំផ្សព្វផ្សាយដល់ប្រជាពលរដ្ឋក្នុងសហគមន៍ និងចែកខិតប័ណ្ណពិការភាព រួមបញ្ចូលទាំងសុវត្ថិភាពចរាចរណ៍ បានចំនួន០៣លើក ដែលមានប្រជាពលរដ្ឋចូលរួមសរុបចំនួន ២២៤នាក់ ក្នុងនោះស្រីចំនួន១២១នាក់ ហើយគ្រប់សកម្មភាពនៃការផ្សព្វផ្សាយ គឺមានចែកខិតប័ណ្ណសុវត្ថិភាពចរាចរណ៍ , ផ្សព្វផ្សាយព័ត៌មានពីស្ថានភាពគ្រោះថ្នាក់ចរាចរណ៍ , វិធីពាក់មួកឱ្យបានត្រឹមត្រូវ , ចែកខិតប័ណ្ណស្តីពីស្លាកសញ្ញាចរាចរណ៍សំខាន់ៗ និង សារសុវត្ថិភាព ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
