សមត្ថកិច្ចខេត្តសៀមរាប បានឲ្យដឹងថា នៅវេលាម៉ោង២ និង១០នាទី យប់ទាបភ្លឺ ថ្ងៃទី២២ ខែកញ្ញា ឆ្នាំ២០១៨នេះ មានករណីគ្រោះថ្នាក់ចរាចរណ៍មួយបានកើតឡើង នៅកំណាត់ផ្លូវជាតិលេខ៦ ត្រង់ចំណុចភូមិលលៃ ឃុំបាគង ស្រុកប្រាសាទបាគង រវាងរថយន្តកែច្នៃ និង ម៉ូតូ បណ្ដាលឲ្យម្ចាស់ម៉ូតូ ស្លាប់ភ្លាមៗ នៅកន្លែងកើតហេតុ ។
សមត្ថកិច្ចបានឲ្យដឹងទៀតថា រថយន្តកែច្នៃនេះ ម៉ាកម៉ាស្តា គ្មានស្លាកលេខ អ្នកបើកបរមិនស្គាល់អត្តសញ្ញាណ បានបើកបរមកពីទិសខាងត្បូងឆ្លងផ្លូវខ្វះការប្រុងប្រយ័ត្ន ទៅទិសខាងជើង បានបុកម៉ូតូមួយគ្រឿង ម៉ាកហុងដា សេរីឆ្នាំ២០១០ ពណ៌ខ្មៅ ពាក់ស្លាកលេខ សៀមរាប 1J 9649 បើកបរដោយឈ្មោះ ឈ្នាង ទើន ភេទប្រុស អាយុ២៥ឆ្នាំ រស់នៅភូមិមមាញ ឃុំរលួស ស្រុកប្រាសាទបាគង ខេត្តសៀមរាប បើកបរទិសដៅពីទិសខាងលិច ទៅទិសខាងកើត ហើយសាកសពប្រគល់ឲ្យបងប្អូនយកទៅធ្វើបុណ្យតាមប្រពៃណី ៕
អត្ថបទ និង រូបថត : ការិយាល័យនគរបាលចរាចរណ៍
កែសម្រួលអត្ថបទ : លោក លីវ សាន្ត
#មន្ទីរព័ត័មានខេត្តសៀមរាប
