ផ្ទះមនុស្សធម៌ចំនួនមួយខ្នង ដែលជាផ្ទះមនុស្សធម៌ទី៦០ មានទំហំ ៥ម៉ែត្រគុណនឹង៦ម៉ែត្រ ធ្វើអំពីឈើ ប្រក់ស័ង្កសីភ្លីធំ ក្រាលក្ដារ ជញ្ជាំងក្ដារ តម្កល់លើជើងតាង កម្ពស់១,៨០ម៉ែត្រ ដែលផ្ដួចផ្ដើមដោយឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ត្រូវបានលោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការសាខា ប្រគល់ជូនដល់គ្រួសារពិការទីទ័លក្រ ឈ្មោះ មឿត យ៉ស់ អាយុ៤៧ឆ្នាំ និងភរិយាឈ្មោះ ស៊ុត លិស អាយុ ៤០ឆ្នាំ ពិការជើងទាំងសងខាងដោយសារជំងឺ មានកូន៦នាក់ រស់នៅភូមិថ្នល់ដាច់ ឃុំសង្វើយ ស្រុកជីក្រែង ខេត្តសៀមរាប ដែលមានមុខរបរបច្ចុប្បន្នធ្វើស្រែ និង ដាំដំណាំបន្ដិចបន្ដួចគ្រាន់ទ្រទ្រង់ជីវភាពគ្រួសារ កាលពីរសៀលថ្ងៃទី២៥ ខែកញ្ញា ឆ្នាំ២០១៨ ម្សិលមិញនេះ ។
ជាមួយនឹងការប្រគល់ផ្ទះនេះ សាខាកាកបាទក្រហមកម្ពុជាខេត្តសៀមរាប បានជូនអំណោយមនុស្សធម៌បន្ថែមរួមមាន មុង១ – ភួយ១ – សារុង១ – ក្រមា១ – កន្ទេល១ – អង្ករ៥០គីឡូក្រាម – មី១កេស – ត្រីខ១យួរ -ទឹ កស៊ីអ៊ីវ១យួរ – ទឹកបរិសុទ្ធ៥យួរ – សម្ភារផ្ទះបាយមួយចំនួន និងថវិកាចំនួន២០ម៉ឺនរៀល ។
មានប្រសាសន៍ក្នុងឱកាសនោះ លោកជំទាវ គួយ ណាលីន ឃឹម ប៊ុនសុង ក៏បាន បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តមបណ្ឌិត ឃឹម ប៊ុន សុង ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរ ចំពោះសុខទុក្ខរបស់ប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
