ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានមានប្រសាសន៍ថា ការរៀបចំសួនច្បារ និងទីធ្លាកំសាន្តនៅខាងជើងជាប់នឹងទីសក្ការៈព្រះអង្គចេកព្រះអង្គចមនេះ ស្របពេលដែលមានកំណើនទាំងភ្ញៀវជាតិ និង ភ្ញៀវអន្តរជាតិ ចូលមកក្នុងខេត្តសៀមរាប កើនឡើងពីមួយឆ្នាំទៅមួយឆ្នាំ។
ដែលមានអត្ថប្រយោជន៍ គឺទី១. ដើម្បីបំពេញតាមតម្រូវការរបស់បងប្អូនប្រជាពលរដ្ឋក្នុងក្រុងសៀមរាប ដែលចង់លំហែកាយ និងមកកំសាន្តសប្បាយនៅក្នុងក្រុង ខណៈដែលទីធ្លាកំសាន្តក្នុងក្រុងកន្លងមកមានចំនួនតិចតួច ហើយមានលក្ខណៈចង្អៀត , ទី២. សម្រាប់ហាត់ប្រាណ សម្រាប់កុមារៗលេងកំសាន្ត , ទី៣. សម្រាប់ភ្ញៀវជាតិ និង ភ្ញៀវអន្តរជាតិ បានលំហែកាយក្នុងក្រុង បន្ទាប់ពីពួកគេបានវិលត្រឡប់មកពីទស្សនាតំបន់រមណីយដ្ឋាន និង ប្រាសាទនានាដែលមាននៅក្នុង ខេត្តនិង ទី៤. លើកកម្ពស់សោភ័ណភាពក្នុងក្រុង ឲ្យកាន់តែមានភាពស្រស់ស្អាត និង ភាពទាក់ទាញ ខណៈពេលដែលខេត្តសៀមរាប បានក្លាយជាតំបន់គោលដៅនៃភ្ញៀវទេសចរណ៍ នៅលើពិភពលោក ។
ឯកឧត្តមបណ្ឌិត ឃឹម ប៊ុនសុង មានប្រសាសន៍ទៀតថា ប្រសិនបើគ្មានភ្លៀងធ្លាក់មកជោគជាំ ដែលរំខានដល់ដំណើរការទេនោះ ការរៀបចំសួនច្បារ និងទីលានកំសាន្តដោយក្រាលការ៉ូនេះ នឹងត្រូវបញ្ចប់នៅមុនថ្ងៃបុណ្យភ្ជំបិណ្ឌ ខណៈបច្ចុប្បន្ន សម្រេចបាន៦០ភាគរយហើយ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
