សហរដ្ឋអាមេរិក នឹងបន្តដាក់ទណ្ឌកម្ម លើអ្នកណាក៏ដោយដែលទិញប្រេងអ៊ីរ៉ង់ ឬក៏ធ្វើជំនួញជាមួយ កងកម្លាំងការពារបដិវត្តន៍អ៊ីរ៉ង់ ហើយនឹងគ្មានការលើកលែង លើទណ្ឌកម្មប្រេង ដែលត្រូវបានធ្វើឡើងជាថ្មីនោះទេ នេះបើយោងតាមសម្តី របស់មន្ត្រីសហរដ្ឋអាមេរិកមួយរូប បាននិយាយនៅថ្ងៃអាទិត្យ។
លោកស្រី Sigal Mandelker ជាអនុរដ្ឋមន្ត្រីក្រសួងរតនាគារ សហរដ្ឋអាមេរិក ទទួលបន្ទុកផ្នែកអំពើភេរវកម្ម និងការស៊ើបការណ៍សម្ងាត់ហិរញ្ញវត្ថុ បាននិយាយប្រាប់ អ្នកសារព័ត៌មានយ៉ាងដូច្នេះថា “យើងនឹងបន្តដាក់សម្ពាធ លើប្រទេសអ៊ីរ៉ង់ ហើយដូចដែលលោកប្រធានាធិបតី (ត្រាំ) បាននិយាយហើយថា គ្មានការលើកលែងណាមួយ ចំពោះប្រេងរបស់ប្រទេសអ៊ីរ៉ង់នោះទេ”។
គួរបញ្ជាក់ថា ការនាំចេញប្រេងឆៅ របស់ប្រទេសអ៊ីរ៉ង់ តាមសេចក្តីរាយការណ៍ បានធ្លាក់ចុះជាង៨០ភាគរយ ដោយសារតែសហរដ្ឋអាមេរិក ធ្វើការដាក់ទណ្ឌកម្មជាថ្មី បន្ទាប់ពីលោកប្រធានាធិបតី ដូណាល់ ត្រាំ ដកទីក្រុងវ៉ាស៊ីនតោន ចេញពីកិច្ចព្រមព្រៀង នុយក្លេអ៊ែអ៊ីរ៉ង់ឆ្នាំ២០១៥ ដែលធ្វើឡើងជាមួយ មហាអំណាចពិភពលោក៕
ប្រភព ៖ដើមអំពិល
ប្រែសម្រួល៖ប៉ាង កុង
