រយៈពេល៣ថ្ងៃ ចាប់ពីថ្ងៃទី០៧ ដល់ថ្ងៃទី០៩ ខែកញ្ញា ឆ្នាំ២០១៩ ក្រុមគ្រូពេទ្យស្ម័គ្រចិត្ត ឯកទេសចក្ខុរោគខេត្តយូណាន នៃសាធារណរដ្ឋប្រជាមានិតចិន បានពិនិត្យ-វះកាត់ និងព្យាបាល ជំងឺភ្នែកឡើងបាយ ជូនប្រជាជនខេត្តសៀមរាប ដោយឥតគិតថ្លៃ នៅមន្ទីរពេទ្យភ្នែកតំបន់សៀមរាប ដែលស្ថិតក្នុងបរិវេណមន្ទីរពេទ្យបង្អែកខេត្តសៀមរាប ។
សកម្មភាពនេះ បានធ្វើឡើងដោយកិច្ចសហប្រតិបត្តិការរវាងខេត្តយូណាន នៃសាធារណៈរដ្ឋប្រជាមានិតចិន ជាមួយខេត្តសៀមរាប នៃព្រះរាជាណាចក្រកម្ពុជា ក្រោមការសម្របសម្រួល ដោយអ្នកចាត់ការទូទៅរបស់អគ្គកុងស៊ុលចិនប្រចាំតំបន់សៀមរាប និងមានការគាំទ្រដោយមន្ទីរសុខាភិបាលខេត្ត ផងដែរ ។ កិច្ចដំណើរការពិនិត្យ-ព្យាបាល និងវះកាត់ភ្នែកឡើងបាយ ត្រូវបានអនុវត្តដោយក្រុមគ្រូពេទ្យស្ម័គ្រចិត្តផ្នែកចក្ខុរោគចំនួន១០នាក់ ដឹកនាំដោយលោកស្រី Zhou Hong មកពីសមាគមប្រជាជនចិនខេត្តយូណាន ដើម្បីមិត្តភាពជាមួយបរទេសនៃសាធារណរដ្ឋប្រជាមានិតចិន ។
លោក ពិន ប្រាកដ អភិបាលរងខេត្តសៀមរាប បានឲ្យដឹងថា ខេត្តសៀមរាប មានមន្ទីរពេទ្យសាធារណៈចំនួន៥ ប៉ុន្តែក្នុងនោះមានតែមន្ទីរពេទ្យខេត្តមួយប៉ុណ្ណោះ ដែលអាចផ្តល់សេវាវះកាត់ជំងឺភ្នែកបាន។ លោកថា គំហើញគឺជាតម្រូវការចាំបាច់បំផុតរបស់មនុស្សគ្រប់រូប ការបាត់បង់គំហើយដោយប្រការណាមួយ វាធ្វើឱ្យមានការប៉ះពាល់ដល់ជិវិតរស់នៅ និងសុខុមាលភាព ។ លោកវាយតម្លៃថា ៖ ការចូលរួមរបស់គ្រូពេទ្យឯកទេសចក្ខុរោគនៃប្រទេសចិន មកពិនិត្យ-វះកាត់ព្យាបាលជំងឺបាយភ្នែកដោយឥតគឹតថ្លៃ ពិតជាបេសកកម្មដ៏មានសារសំខាន់បំផុតសម្រាប់ប្រជាពលរដ្ឋខេត្តសៀមរាប ។
អ្នកស្រីវេជ្ជបណ្ឌិត ម៉ី យាន មកពីមន្ទីរពេទ្យប្រជាជនខេត្តយូណាន មានប្រសាសន៍ថា មនុស្សចាស់ អាចនឹងមានបញ្ហាប្រឈមនៃជំងឺបាយភ្នែក និងមានករណីជាច្រើនទៀត ដែលបង្កឲ្យភ្នែក កើតមានជំងឺឡើងបាយ ដូចជាការប៉ះទង្គិច ការប៉ះពន្លឺខ្លាំង ហើយការប្រើថ្នាំដាក់ភ្នែកមិនមានវេជ្ជបញ្ជា ក៏ជាហេតុផលនៃការបង្កឲ្យភ្នែក ជួបបញ្ហាឡើងបាយបានដែរ ។ តែយ៉ាងណាក៏ដោយ ជំងឺបាយភ្នែកមិនបណ្តាលឲ្យអ្នកជំងឺពិការភ្នែកនោះទេ បើសិនជាមិនហួសពេល និងមានការព្យាបាលត្រឹមត្រូវដោយគ្រូពេទ្យឯកទេស ។ ជំងឺបាយភ្នែកអាចព្យបាលបានជាសះស្បើយ១០០% ដោយការវះកាត់តាមបច្ចេកវិទ្យាទំនើប ។ ភ្នែកគឺជាបង្អួចនៃរាងកាយមនុស្ស នៅក្នុងបេសកកម្មនេះ ក្រុមគ្រូពេទ្យស្ម័គ្រចិត្តខេត្តយូណាន បានពិនិត្យ វះកាត់ ព្យាបាលជំងឺបាយភ្នែកបានជាច្រើនករណី ពួកខ្ញុំសប្បាយចិត្ត ដែលបានជួយសង្គ្រោះឲ្យភ្នែកប្រជាជនកម្ពុជា បានមើលឃើញច្បាស់ឡើងវិញ ។
របាយការណ៍របស់ក្រុមគ្រូពេទ្យចិន បង្ហាញថា ក្នុងរយៈពេល៣ថ្ងៃនេះ អ្នកជំងឺដែលបានមកទទួលសេវាពិនិត្យ-វះកាត់មានចំនួន៥៥ករណី លើគម្រោងវះកាត់ ១០០នាក់ ។
លោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប បានបង្ហើបឲ្យដឹងថា មន្ទីរពេទ្យបង្អែកខេត្តសៀមរាប មានគ្រូពេទ្យឯកទេសចក្ខុរោគចំនួន២រូប បានផ្តល់សេវាវះកាត់ជំងឺបាយភ្នែកនេះបានពី ៧០០ ទៅ ១ ៣០០នាក់ក្នុងមួយឆ្នាំ ប៉ុន្តែលទ្ធផលនេះ វានៅតិចនៅឡើយ បើធៀបទៅនឹងចំនួនករណីបាយភ្នែកលើមនុស្សចាស់ដែលមានស្រាប់ និងករណីកើតថ្មីទៀត ជារៀងរាល់ឆ្នាំនោះ ។ មានកត្តាជាច្រើនទៀតដែល ដែលធ្វើអោយមាននៅសេសសល់ ចំនួនអ្នកជំងឺបាយភ្នែកមិនបានមកទទួលការវះកាត់ទាន់ពេលវេលា គឺការខ្វះខាតសេវាចក្ខុរោគនៅមូលដ្ឋានដាច់ស្រយាល ហើយការយល់ដឹងរបស់ប្រជាពលរដ្ឋលើករណីថែរក្សា ព្យាបាលភ្នែកនៅមានកម្រិត ៕
អត្ថបទ និង រូបភាព : លោក ងិន គឹមឡេង
