នៅថ្ងៃទី០៩ ខែកញ្ញា ឆ្នាំ២០១៩ លោក ឃុត សំអាត ប្រធានក្រុមប្រឹក្សាស្រុក និង លោកស្រី ម៉ននី រង្សី អភិបាលស្រុកក្រឡាញ់ បានអញ្ជើញជាអធិបតីនិងចូលរួមដាំកូនឈើចម្រុះ ចំនួន ៦៨៥ ដើម នៅបរិវេណប្រាសាទគោកសំរោង ស្ថិតនៅក្នុង ភូមិក្រឡាញ់ ឃុំក្រឡាញ់ស្រុកក្រឡាញ់ ខេត្តសៀមរាប។
ក្នុងឱកាសនោះ លោកស្រី ម៉ននី រង្សី បានមានប្រសាសន៍ថា ការប្រារព្ធពិធីនេះ គឺបានឆ្លុះបញ្ចាំងឲ្យឃើញពីការខិតខំប្រឹងប្រែងយ៉ាងសកម្មរបស់រាជរដ្ឋាភិបាល ក្នុងការគ្រប់គ្រង ការអភិរក្សធនធានព្រៃឈើ គឺជាគោលដៅអាទិភាពខ្ពស់ និងចក្ខុវិស័យវែងឆ្ងាយ ប្រកបដោយនិរន្តរភាព ហើយជាពិសេសរដ្ឋបាលស្រុកបាននឹងកំពុងតែអនុវត្តយុទ្ធនាការគ្រួសារមួយ ដាំដើមឈើឱ្យបានមួយដើម។
ដោយឡែកក្រៅពីយុទ្ធនាការ ដាំកូនឈើនៅលើផ្ទៃដីតាមទីសាធារណៈ រួមមាន សាលារៀន វត្តអារាម ការិយាល័យអង្គភាពស្រុក ស្រុកក្រឡាញ់ក៏មានដីព្រៃសហគមន៍០១កន្លែងផងដែរ ឈ្មោះថាព្រៃឡ មានទំហំផ្ទៃដី ១០៣ហិកតា ដែលបានចុះបញ្ជីត្រឹមត្រូវ ស្ថិតក្នុងឃុំសែនសុខ ហើយសហគមន៍មួយនេះមានការគ្រប់គ្រងដោយគណៈកម្មការសហគមន៍ និងអនុវត្តលក្ខន្តិកៈបានយ៉ាងល្អប្រសើរ ដើម្បីអនុញ្ញាតឲ្យប្រជាសហគមន៍ ប្រើប្រាស់ និងអាស្រ័យផល។
ព័ត៌មានជាតិ ថ្មីៗ
សូមជម្រាបថា ក្នុងពិធីដាំកូនឈើនោះ រួមមានប្រភេទកូនឈើក្រញូង បេង ធ្នង់ជាដើម ដែលផ្ដល់ដោយសង្កាត់រដ្ឋបាលព្រៃឈើស្រុកក្រឡាញ់ និងសប្បុរសជន និងចូលរួមដាំពីសំណាក់សមាជិកក្រុមប្រឹក្សាស្រុក មន្ត្រីរដ្ឋបាលស្រុក កងកម្លាំងប្រដាប់អាវុធទាំង៣ សហភាពសហព័ន្ធយុវជនកម្ពុជាស្រុកក្រឡាញ់ និងអាជ្ញាធរមូលដ្ឋានព្រមទាំងសប្បុរសជនក្នុងស្រុកក្រឡាញ់ផងដែរ។
សូមបញ្ជាក់ថា នេះជាលើកទី២ហើយ ដែលរដ្ឋបាលស្រុកក្រឡាញ់បានរៀបចំពិធីដាំកូនឈើនេះ ដោយលើកទី១ ប្រារព្ធនៅទីតាំងវិទ្យាល័យសែនសុខ ឃុំសែនសុខ កាលពីថ្ងៃទី ១២ ខែកក្កដា ឆ្នាំ២០១៩ ចំនួន ៣៦៥ ដើម។
អត្ថបទ÷ សេង ផល្លី
រូបភាព÷ រដ្ឋបាលស្រុកក្រឡាញ់
