នៅថ្ងៃទី១០ ខែកញ្ញា ឆ្នាំ២០១៩នេះ មន្ទីរអប់រំយុវជននិងកីឡាខេត្តសៀមរាប បានរៀបចំប្រជុំបូកសរុបវាយតម្លៃការអនុវត្តចលនាប្រឡងប្រណាំង៣ល្អ “ កូនល្អ សិស្សល្អ មិត្តល្អ ” របស់កុមារនិងយុវជន និងលើកសរសើរចំពោះអង្គភាព និងបុគ្គលមានស្នាដៃការងារក្រុមប្រឹក្សាកុមារកម្ពុជា និងក្រុមប្រឹក្សាយុវជនកម្ពុជា ព្រមទាំងពិនិត្យមើលពីវឌ្ឍនភាពការងារអនុវិស័យយុវជនក្នុងឆ្នាំសិក្សា២០១៨-២០១៩ ផងដែរ ។
លោក ម៉ិត សុវណ្ណ ប្រធានការិយាល័យយុវជន នៃមន្ទីរអប់រំយុវជននិងកីឡាខេត្តសៀមរាប មានប្រសាសន៍ថា៖ ការប្រជុំបូកសរុបចលនាប្រឡងប្រណាំង៣ល្អ “កូនល្អ សិស្សល្អ មិត្តល្អ” ប្រចាំឆ្នាំសិក្សា ២០១៨-២០១៩ ធ្វើឡើងក្នុងគោលបំណងបូកសរុបវាយតម្លៃពីវឌ្ឍនភាពការងារយុវជនប្រចាំឆ្នាំ និងលើកទិសដៅអនុវត្តនៅឆ្នាំសិក្សា២០១៨-២០១៩សម្រាប់អនុវិស័យ ការងារយុវជន និង លើកទឹកចិត្តដល់កុមារ យុវជនដែលមានស្នាដៃ ក្នុងការអនុវត្តចលនាប្រឡងប្រណាំង ៣ល្អ ” កូនល្អសិស្សល្អ មិត្តល្អ ” តាមរយៈការផ្តល់បណ្ណសរសើរជូនអង្គភាព និងបុគ្គលមានស្នាដៃ ។
លោក ម៉ិត សុវណ្ណ មានប្រសាសន៍បន្ថែមថា សកម្មភាពនេះ គឺជំរុញការលើកទឹកចិត្តឱ្យអង្គភាព និងបុគ្គលខិតខំបង្កើនស្នាដៃបន្ថែមទៀត ក្នុងការចូលរួមពង្រឹងគុណភាព ប្រសិទ្ធភាពអប់រំ សម្រាប់ឆ្នាំសិក្សាថ្មី និងអភិវឌ្ឍន៍ការងារក្រុមប្រឹក្សាកុមារកម្ពុជា និងក្រុមប្រឹក្សាយុវជនកម្ពុជា ឱ្យមានសកម្មភាពល្អ គ្រប់អង្គភាពសាលារៀន និងបង្ហាញពីការយកចិត្តទុកដាក់ថែទាំគាំពារដល់កុមារ-យុវជន ពីថ្នាក់ដឹកនាំមន្ត្រីនៃស្ថាប័នអប់រំគ្រប់លំដាប់ថ្នាក់ជាពិសេសពីរាជរដ្ឋាភិបាលកម្ពុជាដែលបានចាត់ទុកកុមារនិងយុវជន ជាទំពាំងស្នងឬស្សី និងជាសសរទ្រូង ជាកម្លាំងស្នូល ជាកោសិកាដ៍រឹងមាំនិងជាអនាគតប្រទេសជាតិ។
លោក សុខ ដានី អនុប្រធានមន្ទីរអប់រំយុវជននិងកីឡាខេត្ត មានប្រសាសន៍ថា៖ ចលនាប្រឡងប្រណាំង៣ល្អ របស់កុមារ និង យុវជន ថា ជាចំណែកមួយដ៏ សំខាន់បំផុតក្នុងគោលដៅនៃការអភិវឌ្ឍធនធានមនុស្ស ខណៈនៅក្នុងអាណត្តិទី៦នេះ រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី បានកំណត់នៅក្នុងកម្មវិធីនយោបាយវិស័យអប់រំ ជាវិស័យអាទិភាពមួយដ៏សំខាន់នៃយុទ្ធសាស្ត្រចតុកោណ ហើយបច្ចុប្បន្ននេះ វិស័យអប់រំកំពុងមានការអភិវឌ្ឍគ្រប់ផ្នែក ដើម្បីលើកកម្ពស់សមត្ថភាពសិស្ស និសិត្ស និងប្រជាពលរដ្ឋទូទៅ ឱ្យមានជំនាញបច្ចេកទេស និងវិទ្យាសាស្ត្រខ្ពង់ខ្ពស់ ឆ្លើយតបទៅតម្រូវការនៃទីផ្សារការងារ ពិសេស ផ្តោតការយកចិត្តទុដាក់រអភិវឌ្ឍកម្លាំងយុវវ័យ ជាកម្លាំងដ៏សំខាន់។
លោក សុខ ដានី មានប្រសាសន៍បន្ថែមថា ប្រការសំខាន់សូមឲ្យក្មួយៗ ត្រូវខិតខំរៀនសូត្របង្កើនចំណេះដឹង ចំណេះធ្វើ និងរៀនរស់នៅជាមួយគ្នា រៀនរៀបចំខ្លួនឱ្យមានទម្លាប់ល្អ ចេះរក្សាប្រពៃណីទំនៀមទម្លាប់ គោរពសិទ្ឋគ្នាទៅវិញទៅមក មានការយោគយល់គ្នា អធ្យាស្រ័យ និងចេះអត់ឱន ព្រមទាំងរក្សាសមភាពរវាងបុរស និងនារី មានស្មារតីឧស្សាព្យាយាម ខិតខំកសាងអំពើល្អឱ្យបានកាន់តែច្រើន ព្រមទាំងស្រឡាញ់រាប់អានគ្នា ក្លាយជា កុមារ-យុវជនដែលមាន ទម្លាប់ល្អទាំងក្នុងគ្រួសារ សហគមន៍ និងក្នុងសង្គមជាតិ ដើម្បីរួមចំណែកកាត់បន្ថយភាពអសកម្មក្នុងមជ្ឈដ្ឋានយុវវ័យ និងសម្រេច នូវគោលដៅអភិវឌ្ឍធនធានមនុស្ស ។
សូមបញ្ជាក់ថា សម្រាប់ឆ្នាំសិក្សា២០១៨-២០១៩នេះ កុមារមានស្នាដៃក្នុងការអនុវត្តចលនាប្រឡងប្រណាំង ៣ល្អ ចំនួន១០៤.៩០៧នាក់ ក្នុងនោះស្រី៥៤.៩០១នាក់ , យុវជនមានស្នាដៃក្នុងការអនុវត្តចលនាប្រឡងប្រណាំង ៣ល្អ ចំនួន១៦.៥១៨នាក់ ក្នុងនោះស្រី៩.៦៦៥នាក់ និងអង្គភាពមានស្នាដៃល្អចំនួន១០៣ អង្គភាព និង បុគ្គលមានស្នាដៃល្អ ៦២២នាក់ ក្នុងនោះស្រី៣៦៤នាក់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
