ក្នុងឱកាសនៃកិច្ចប្រជុំប្រចាំសប្តាហ៍ជាមួយថ្នាក់ដឹកនាំក្រសួងព័ត៌មាន នាព្រឹកថ្ងៃទី ៩ ខែ កញ្ញា ឆ្នាំ ២០១៩ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន បានជម្រាបជូនពីការដែលក្រសួង ព័ត៌មាន រៀបចំការប្រកួតប្រជែង ស្នាដៃវីដេអូ អប់រំប្រឆាំង និងព័ត៌មានក្លែងក្លាយ ដែលជាការបើកឱកាស ដល់សាធារណជន សិស្ស និស្សិត ជាពិសេសយុវជន ចូលរួម បង្ហាញស្នាដៃ និងគំនិតរបស់ខ្លួន។
ការប្រកួតប្រជែង ស្នាដៃវីដេអូ អប់រំប្រឆាំង និងព័ត៌មានក្លែងក្លាយ មាន រយៈពេល ៥ នាទី ធ្វើឡើងក្រោមប្រធានបទ ការប្រឌិត ព័ត៌មានក្លែងក្លាយជះឥទ្ធិពលដល់សង្គម ។ ជាការលើកទឹកចិត្តដល់ម្ចាស់ជ័យលាភីលេខ ១ ទទួល បានថវិកា ៤ លានរៀល លេខ ពីរ ទទួលបាន ៣ លានរៀល និងលេខ បី ទទួល បាន ១ លាន ៥ សែនរៀល។
តាមការបញ្ជាក់របស់ ឯកឧត្តម ផុស សុវណ្ណ ប្រតិភូរាជរដ្ឋាភុបាល ទទួលបន្ទុក អគ្គនាយក ព័ត៌មាន និងសោតទស្សន៏ ក្រសួង ព័ត៌មាន បានឲ្យដឹងថា ការ ទទួលពាក្យ ធ្វើឡើងរយៈពេល ១ ខែ ដែលគ្រោងឈប់ទទួលពាក្យនៅថ្ងៃទី ១៨ ខែ តុលា ឆ្នាំ ២០១៩ ។ ដូច្នេះ សាធារណជន សិស្ស និស្សិត ជាពិសេសយុវជន ដែលមានបំណងចូលរួមប្រកួតប្រជែង សូមផ្ញើប្រវត្តិរូបសង្ខេប រួមជាមួយខ្លឹម សារអត្ថបទ ដែលខ្លួនគ្រោងផលិតវីដេអូ អប់រំខ្លី ប្រឆាំងនឹងព័ត៌មាន ក្លែងក្លាយ មកអគ្គនាយកដ្ឋាន ព័ត៌មាន និងសោតទស្សន៏ ក្រសួងព័ត៌មាន ចាប់ពីថ្ងៃជូន ដំណឹងនេះ ដើម្បីគណៈកម្មការពិនិត្យ និងវាយតម្លៃជម្រុះដំបូង។
នៅក្នុងឱកាសនៃកិច្ចប្រជុំប្រចាំសប្តាហ៍នេះដែរ ឯកឧត្តម លោកជំទាវ ជាអគ្គ នាយក នៃអគ្គនាយកដ្ឋាន ទាំង ៥ ចំណុះឲ្យក្រសួង ព័ត៌មាន ឯកឧត្តម លោក ជំទាវ ជារដ្ឋលេខាធិការ អនុរដ្ឋលេខាធិការ ប្រតិភូរាជរដ្ឋាភិបាល ទទួលបន្ទុក ការងារតាមជំនាញនីមួយៗ បានធ្វើរបាយការណ៏ ពីលទ្ធផលការងារ សម្រេច អនុវត្តបានក្នុងរយៈពេល ១ សប្តាហ៍មកនេះ ក៏ដូចជាលើកពីផែនការ សកម្មភាព ការងារ ដែលត្រូវបន្តបំពេញ នៅពេលខាងមុខទៀត សំដៅធ្វើយ៉ាងណា ឲ្យរាល់ផែនការ ការងារដែលគ្រោងទុកសម្រេចបានលទ្ធផលល្អបន្តទៀត ។
ទាក់ទងទៅការងារផ្សព្វផ្សាយ ឯកឧត្តម ឃឹម វុទ្ធី អគ្គនាយកទូរទស្សន៍ជាតិ កម្ពុជា បានជម្រាបជូនក្នុងអង្គប្រជុំ ពីគម្រោងធ្វើការផ្សាយផ្ទាល់នៅពេលព្រឹក តាមរយៈប្រព័ន្ធ ម៉ាស៊ីន LiveU ជាអំណោយរបស់ ឯកឧត្តម ខៀវ កាញារីទ្ធ ផ្តលជូន ដល់ក្រុមការងារ ទូរទស្សន៍ជាតិកម្ពុជា ដោយធ្វើការថត តាមបណ្តាផ្សារនានា ក្នុងរាជធានីភ្នំពេញ ហើយរាយការណ៍ផ្ទាល់តែម្តង អំពីតម្លៃម្ហូបអាហារ មុខទំនិញមួយចំនួនក្នុងទីផ្សារប្រចាំថ្ងៃ ក៏ដូចជាទិដ្ឋភាពចរាចរណ៍ផងដែរ។
ឯកឧត្តម រដ្ឋមន្ត្រី ខៀវ កាញារីទ្ធ បានវាយតម្លៃខ្ពស់ចំពោះលទ្ធផល ការងារទាំងឡាយ ដែលបណ្តាអគ្គនាយកដ្ឋានទាំង ៥ ក៏ដូចជាថ្នាក់ដឹកនាំ ទទួលបន្ទុកតាមផ្នែកជំនាញនីមួយៗ សម្រេចអនុវត្តន៍បាន ក្នុងរយៈពេលកន្លងមកនេះ ហើយជាមួយនេះ ឯកឧត្តម ក៏បានជម្រុញលើកទឹកចិត្ត ឲ្យបន្តបំពេញនូវរាល់ភារកិច្ចការងារ ឲ្យសម្រេចបានលទ្ធផលថ្មីៗបន្ថែមទៀត។ ឆ្លៀតក្នុងឱកាស នោះដែរ ឯកឧត្តម ខៀវ កាញារីទ្ធ បានលើកពីគម្រោង រៀបចំជាវគ្គបណ្តុះបណ្តាល និយាយអំពីការងាររបស់ គណៈម្មាធិការវប្បធម៏អាស៊ាន តារយៈការអញ្ជើញ ថ្នាក់ដឹកនាំ ក៏ដូចជាមន្ត្រី តាមបណ្តា មន្ទីរព័ត៌មាន ខេត្ត រាជធានី តាមបណ្តា អគ្គនាយកដ្ឋានទាំង ៥ មកចូលរួមស្តាប់ ដើម្បីទទួលបានចំណេះដឹង កាន់តែស៊ី ជម្រៅ ទាក់ទងនិងអាស៊ានដោយអញ្ជើញ មន្ត្រីជំនាញមកពី ក្រសួង ការបរទេស និងសហប្រតិបត្តការអន្តរជាតិ មកធ្វើការ ឧទ្ទេសនាម ជូនបានច្បាស់លាស់ ។ ឯកឧត្តម រដ្ឋមន្ត្រី ក៏បានផ្តាំផ្ញើដល់ថ្នាក់ដឹកនាំ ក៏ដូចជាមន្ត្រី នៃក្រសួង ការបរទេស ដែលបានទៅប្រជុំ ទស្សនកិច្ច សិក្សានៅ ក្រៅប្រទេស នៅពេលត្រឡប់មកវិញ ត្រូវធ្វើជារបាយរណ៏ យកមកដាក់នៅ នាយកដ្ឋានទំនាក់ទំនងអន្តរជាតិ ដើម្បី ទុកជាឯកសារ ពិសេសសម្រាប់អ្នកដែល ត្រូវទៅលើកក្រោយ បានទៅមើល ស្វែងយល់ បានដឹងខ្លះៗ ពីអ្វីដែលអ្នកទៅមុនបានធ្វើ និង ទទួលបានរួចមក ហើយ៕
អត្ថបទ និង រូបភាព : ក្រសួងព័ត៌មាន
