កាលពីរសៀលថ្ងៃទី១០ ខែសីហា ឆ្នាំ២០១៩ម្សិលមិញនេះ គណ:កម្មកាកិច្ចការបរទេស សហប្រតិបត្តិការអន្តរជាតិ ឃោសនាការនិងព័ត៌មាន(គណៈកម្មការទី៥)នៃព្រឹទ្ឋសភា ដឹកនាំដោយលោកជំទាវ ទី បូរ៉ាស៊ី ប្រធានគណៈកម្មការទី៥ និង ឯកឧត្តម លោកជំទាវ សមាជិក សមាជិកាប្រតិភូអមដំណើរ បានជួបប្រជុំភាក្សាការងារជាមួយរដ្ឋបាលខេត្តសៀមរាប ដឹកនាំដោយ ឯកឧត្តម អ៊ឹង ហឿន ប្រធានក្រុមប្រឹក្សាខេត្ត , លោក លី សំរិទ្ឋ អភិបាលរងខេត្ត និងជាតំណាងឯកឧត្ដម ទៀ សីហា អភិបាលខេត្ត , លោក នាក់ ណេរ៉ុន អភិបាលរងខេត្ត ដោយមានការចូលរួមពីសំណាក់ប្រធាន អនុប្រធាន អង្គភាព មន្ទីរ ស្ថាប័នពាក់ព័ន្ឋមួយចំនួនទៀត ។
មានមតិសា្វគមន៍ក្នុងឱកាសនោះ លោក លី សំរិទ្ឋ អភិបាលរងខេត្ត បានបញ្ជាក់ថា រដ្ឋបាលខេត្តសៀមរាប ក្រោមការដឹកនាំរបស់រាជរដ្ឋាភិបាល ក៏ដូចជាក្រសួងមហាផ្ទៃ និងក្រសួង/ស្ថាប័ននានា បានធ្វើឱ្យមានការរីកចម្រើនស្ទើរគ្រប់វិស័យ ក្នុងការចូលរួមលើកកម្ពស់ កម្រិតជីវភាពប្រជាពលរដ្ឋ រួមចំណែកឈានទៅសម្រេចឱ្យបាននូវគោលដៅអភិវឌ្ឍ ប្រកបដោយនិរន្តរភាព ក្នុងនោះភាពប្រែប្រួលនៃកម្រិតជីវភាពរបស់ប្រជាពលរដ្ឋនៅខេត្តសៀមរាប បានកត់សំគាល់ឱ្យឃើញតាមរយៈអត្រានៃភាពក្រីក្រពី ៣២,៤០ភាគរយ ក្នុងឆ្នាំ២០០៩ ដោយបានថយចុះមកនៅត្រឹមតែ២១,១៦ភាគរយ ក្នុងឆ្នាំ២០១៨ បានធ្វើឱ្យខេត្តសៀមរាប ដែលជាខេត្តក្រីក្រជាងគេបំផុតលំដាប់លេខរៀងទី២ នៅឆ្នាំ២០០១ ក្នុងចំណោមរាជធានី-ខេត្តទាំង២៥ បានងើបឡើងយ៉ាងរហ័សទៅឈរនៅលំដាប់លេខរៀងទី៩ នៅឆ្នាំ២០១៨នេះ ។
ក្នុងឱកាសនោះដែរ ថ្នាក់ដឹកនាំមន្ទីរ អង្គភាពពាក់ព័ន្ធក្នុងខេត្ត បានធ្វើសេចក្ដីរាយការណ៍ជូនប្រតិភូគណៈកម្មការទី៥ នៃព្រឹទ្ធសភា អំពីសកម្មភាពការងាររបស់អង្គភាពខ្លួន ដែលបានអនុវត្តនាពេលកន្លងមក ក្នុងនោះលោក ជា គឹមសាន្ត ស្នងការរង នៃស្នងការដ្ឋាននគរបាលខេត្តសៀមរាប បានធ្វើសេចក្តីរាយការណ៍អំពីសកម្មភាពការងារគ្រប់គ្រងជនបរទេស និងការអនុវត្តច្បាប់អន្តោប្រវេសន៍ , លោក លីវ សុខុន ប្រធានមន្ទីរព័ត៌មានខេត្តសៀមរាប បានធ្វើសេចក្តីរាយការណ៍ អំពីបច្ចុប្បន្នភាពនៃការគ្រប់គ្រងប្រព័ន្ឋផ្សព្វផ្សាយព័ត៌មានតាមរយៈ វិទ្យុ ទូរទស្សន៍ កាសែត ទស្សនាវដ្តី និងតាមប្រព័ន្ឋអនឡាញ និង លោក ច័ន្ទ សុខុមចិត្តា ប្រធានមន្ទីរការងារ និង បណ្តុះបណ្តាលវិជ្ជាជីវៈខេត្ត បានធ្វើសេចក្តីរាយការណ៍ អំពីការផ្តល់ប័ណ្ណការងារជូនជនបរទេស និងការត្រួតពិនិត្យប័ណ្ណការងាររបស់ជនបរទេស ដែលកំពុងធ្វើការនៅតាមរោងចក្រ សហគ្រាស និងក្រុមហ៊ុន នានាក្នុងខេត្ត ។
ជាមួយនឹងសម្ដែងនូវកោតសរសើរ នៃការខិតខំប្រឹងប្រែងក្នុងកិច្ចអភិវឌ្ឍកាន់តែប្រសើរឡើងរបស់រដ្ឋបាលខេត្តសៀមរាប នារយៈពេលកន្លងមកនោះ លោកជំទាវ ទី បូរ៉ាស៊ី ប្រធានគណៈកម្មការទី៥ នៃព្រឹទ្ឋសភា មានប្រសាសន៍ថា គោលបំណងសំខាន់ដែលក្រុមគណៈប្រតិភូគណៈកម្មការទី៥ នៃព្រឹទ្ឋសភា មកបំពេញបេសកកម្មនៅខេត្តសៀមរាបនាពេលនេះ គឺដើម្បីចង់ដឹងការវិវត្តរបស់ខេត្ត ហើយមិនមែនមកដើម្បីធ្វើការតាមដាន ស៊ើបអង្កេតអំពីការងាររបស់រដ្ឋបាលខេត្តនោះទេ ប៉ុន្តែក្នុងនាមជាសមាជិកព្រឹទ្ឋសភា គឺ មានកាតព្វកិច្ច និងភារកិច្ច លើការងារពាក់ព័ន្ឋ ទៅនឹងការងារកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន ជាសមត្ថកិច្ចរបស់គណៈកម្មការទី៥ នៃព្រឹទ្ឋសភា ដែលមានភារកិច្ចតាមដានការអនុវត្តច្បាប់ ពាក់ព័ន្ឋទៅនឹងជនបរទេស , ពាក់ព័ន្ឋទៅនឹងជនអន្តោប្រវេសន៍ និង ការងារផ្សព្វផ្សាយព័ត៌មាន ។
លោកជំទាវ ទី បូរ៉ាស៊ី មានប្រសាសន៍ទៀតថា តាមរយៈបេសកកម្មរបស់គណៈកម្មការទី៥ នៃព្រឹទ្ឋសភានាពេលនេះ ក្រុមការងារ ទទួលបាននូវការយល់ដឹងកាន់តែស៊ីជម្រៅអំពីផលវិបាក ឬភាពងាយស្រួលចំពោះការអនុវត្តច្បាប់អន្តោប្រវេសន៍ និងការគ្រប់គ្រងជនបរទេស , ការអនុវត្តច្បាប់ ស្តីអំពីរបបសារព័ត៌មាន និងការគ្រប់គ្រងប្រព័ន្ឋផ្សព្វផ្សាយព័ត៌មានរបស់ខេត្តសៀមរាប , ការផ្តល់ប័ណ្ណការងារជូនជនបរទេស និងការត្រួតពិនិត្យប័ណ្ណការងាររបស់ជនបរទេស, ការគ្រប់គ្រងជនបរទេសបែបអន្តោប្រវេសន៍ ដែលកំពុងរស់នៅតាមដងទន្លេសាបស្ថិតក្នុងភូមិសាស្ត្រខេត្តសៀមរាប , វឌ្ឍនភាពលើវិស័យនានារបស់ខេត្តសៀមរាប , បង្កើនទំនាក់ទំនងកាន់តែជិតស្និទ្ឋរវាងសមាជិកព្រឹទ្ឋសភាជាមួយអាជ្ញាធរខេត្តសៀមរាប ជាពិសេស ក្រុមការងារ នឹងធ្វើរបាយការណ៍ជូនថ្នាក់ដឹកនាំព្រឹទ្ឋសភា សម្រាប់ផ្តល់អនុសាសន៍ ជូនថ្នាក់ដឹកនាំក្រសួង ស្ថាប័នពាក់ព័ន្ឋ ដើម្បីកែលំអនូវចំណុចសេសសល់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
