តាមការព្យាករណ៍របស់ពិភពលោក ថានៅឆ្នាំ២០២០ខាងមុខ ចំនួនអ្នកទេសចរណ៍នៅលើពិភពលោកអាចនឹងមានចំនួនកើនដល់ ១,៦០០ លាននាក់ ក្នុងនោះកម្ពុជាក៏រំពឹងថានឹងអាចទទួលបានភ្ញៀវទេសចរណ៍អន្តរជាតិកើនឡើងដល់ ៧លាននាក់ផងដែរ បើតាមការប៉ាន់ស្មានថានៅឆ្នាំ២០១៩ នេះកម្ពុជា នឹងបានទទួលភ្ញៀវទេសចរអន្តរជាតិប្រហែលជា ជាង៦លាននាក់ នេះបើតាមប្រសាសន៍ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ នៅក្នុងពិធីប្រគល់វិញ្ញាបនបត្រវិជ្ជាជីវៈ ក្របខ័ណ្ឌគុណវុឌ្ឍិអាស៊ានជំនាន់ទី១៧ កម្រឹតសញ្ញាបត្រវិជ្ជាជីវៈ២ ផ្នែកបដិសណ្ឋារកិច្ច និងទេសចរណ៍ក្របខ័ណ្ឌគុណវុឌ្ឍិអាស៊ាន ដល់និស្សិតជ័យលាភីចំនួន២៩៣នាក់ នៅសាលាសណ្ឋាគារនិងទេសចរណ៍ ប៉ូល ឌុយប្រ៊ូល ខេត្តសៀមរាប នាព្រឹកថ្ងៃទី១២ ខែកញ្ញា ឆ្នាំ២០១៩។
ឯកឧត្តម ប៉ាក់ សុខុម គូសបញ្ជាក់បន្ថែមថា ជាចក្ខុវិស័យ នៅឆ្នាំ២០២៥ កម្ពុជាប្រហែលជាអាចទទួលបានភ្ញៀវទេសចរអន្តរជាតិ ១១លាននាក់ និងនៅឆ្នាំ២០៣០ អាចនឹងកើនដល់ ១៥លាននាក់ ។ ដើម្បីសម្រេចបានចក្ខុវិស័យខាងលើនេះ ក្រសួងទេសចរណ៍ បាននិងកំពុងអនុវត្តយ៉ាងសកម្ម នូវមុំយុទ្ធសាស្ត្រចំនួន៤ គឺរួមមាន ទី១ ការបង្កើតនិងផ្សព្វផ្សាយផលិតផលទេសចរណ៍ថ្មីៗ ទី២ការពង្រឹងគុណភាពសេវាកម្មតាមយុទ្ធនាការ សេវាមួយ ស្តង់ដារមួយ ទី៣ ការអភិវឌ្ឍធនធានមនុស្សតាមយុទ្ធនាការ បគ្កលិកម្នាក់ ជំនាញមួយ និងទី៤ ការអភិវឌ្ឍទេសចរណ៍ឆ្លាតវៃ ។
ឯកឧត្តម វាយតម្លៃថា ការអភិវឌ្ឍន៍ធនធានមនុស្ស ដើម្បីចូលរួមបង្កើតការងារ និងអភិវឌ្ឍមូលធនមនុស្សក្នុងវិស័យទេសចរណ៍ គឺជាការបង្កើនគុណភាពសេវាកម្មទេសចរណ៍នៅកម្ពុជា ឲ្យកាន់តែប្រសើឡើងថែមទៀត ។
ថ្លែងក្នុងឱកាសនោះផងដែរ ឯកឧត្តម ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ថ្លែងថា ជោគជ័យលើដំណើរការបណ្តុះបណ្តាលរយៈពេល១៧ឆ្នាំ របស់សាលាសណ្ឋាគារនិងទេសចរណ៍ ប៉ូល ឌុយប្រ៊ូលកន្លងមក បានបង្ហាញអំពីគោលបំណងរបស់ខ្លួន ក្នុងការជួយរំលែកបន្ទុករាជរដ្ឋាភិបាល លើវិស័យអប់រំ បណ្តុះបណ្តាលឯកទេសនិងវិជ្ជាជីវៈ រួមទាំងបានចូលរួមបង្កើតនិងពង្រីកទីផ្សារការងារក្នុងវិស័យទេសចរណ៍ ដែលនេះគឺជាកត្តាសំខាន់ ក្នុងការអភិវឌ្ឍប្រទេសជាតិ ។ បទពិសោធន៍មួយដែលមិនអាចមើលរំលងបាន គឺការធ្វើបច្ចុប្បន្នភាពលើកម្មវិធីសិក្សាជារៀងរាល់ឆ្នាំ ដើម្បីឆ្លើយតបបានទាន់ពេលវេលា ទៅនឹងស្ថានភាពប្រែប្រួលឥតឈប់ឈរផ្នែកបច្ចេកទេសលើទីផ្សារ និងតម្រូវការឈានឡើងរបស់បុគ្គលម្នាក់ៗក្នុងសង្គម ។
បើយោងតាមរបាយការណ៍របស់លោកស្រី ហែលហ្គា ណាហ្គី នាយិកាសាលាសណ្ឋាគារ និងទេសចរណ៍ ប៉ូល ឌុយប្រ៊ូល បានឲ្យដឹងថា ចាប់ពីឆ្នាំ២០០២ ដល់ឆ្នាំសិក្សា២០១៨-២០១៩នេះ សាលាប៉ូលឌុយប្រ៊ូល បានបណ្ដុះបណ្ដាលសិស្សបានចំនួនជាង៣ពាន់នាក់ ក្នុងនោះស្រី ជាង១ពាន់នាក់ ហើយសិស្សប្រមាណជា ៩០ភាគរយ កំពុងបម្រើការងារដោយផ្ទាល់ក្នុងវិស័យទេសចរណ៍ ៕
អត្ថបទ និង រូបភាព ៖ លោក ងិន គឹមឡេង និង លោក ស៊ាន សុផាត
កែសម្រួលអត្ថបទ ៖ លោក សេង ផល្លី
