ដោយដកស្រង់សម្តីពួកអាជ្ញាធរអគ្គិភ័យនោះ ទីភ្នាក់ងារព័ត៌មានយ៉ុនហាប់បានរាយការណ៍កាលពីថ្ងៃអង្គារនេះថា ការឆេះមន្ទីរពេទ្យមើលថែទាំមួយក្នុងប្រទេសកូរ៉េខាងត្បូងនេះ អ្នកជំងឺវ័យចំណាស់២នាក់ត្រូវបានស្លាប់ និង៤៧នាក់ទៀតរបួស ។
អគ្គិភ័យនេះបានកើតឡើងនៅឯអាគារមួយមាន៥ជាន់នៅ Gimpo ចម្ងាយប្រហែល៣០គីឡូម៉ែត្រខាងលិចរដ្ឋធានីសេអ៊ូល នៅម៉ោងប្រហែល ៩:០៣ នាទីព្រឹកម៉ោងក្នុងស្រុក ។
ក្នុងចំណោមអ្នកជំងឺវ័យចំណាស់ប្រហែល១៣០នាក់ ដែលស្នាក់នៅមន្ទីរពេទ្យនោះ គឺមាន២នាក់ ត្រូវបានគេបញ្ជាក់ថាបាន ស្លាប់ និង៤៧នាក់ទៀតរបួស ។ ហើយក្នុងចំណោមអ្នករងរបួសនេះមាន៨នាក់ ស្ថិតក្នុង ស្ថានភាពធ្ងន់ធ្ងរដោយសារតែស្រូបផ្សែងចូលតាមច្រមុះ ។
អគ្គិភ័យនេះត្រូវបានគេជឿជាក់ថា បានចាប់ផ្តើមចេញពីបន្ទប់ទឹកក្តៅមួយ នៅលើជាន់ទី៤ នៃអាគារនេះហើយប៉ូលិសកំពុងពិនិត្យមើលមូលហេតុពិតប្រាកដនៃឧប្បត្តិហេតុនេះ ។
សូមបញ្ជាក់ផងដែលថាអគ្គិភ័យនេះត្រូវគេពន្លត់បាននៅប្រហែល៥០នាទីក្រោយពីការឆេះមក ៕
( ប្រភព ស៊ីនហួ បកប្រែដោយលោក ប៉ិន មឿន)
