ក្នុងឱកាសអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជាពីថ្ងៃទី២២ដល់ថ្ងៃទី២៦ខែកញ្ញាឆ្នាំ២០១៩ និង ក្នុងដំណើរទស្សនកិច្ចបំពេញការងារមួយចំនួននៅខេត្តសៀមរាប ពីថ្ងៃទី ២៤ដល់ថ្ងៃទី២៦ខែកញ្ញា ប្រតិភូមជ្ឈមណ្ឌលផ្លាស់ប្តូរអន្តរជាតិ នៃក្រសួងទំនាក់ទំនងផ្លាស់ប្តូរអន្តរជាតិ នៃសាធារណរដ្ឋប្រជាមានិត ចិន ចំនួន៤រូប ដឹកនាំដោយលោក យ៉ាវ ជានគូ នាយករងនៃមជ្ឈមណ្ឌលផ្លាស់ប្តូរទំនាក់ទំនងអន្តរជាតិ បានធ្វើបទបង្ហាញបែបបាឋកថាអំពីវឌ្ឍនភាពនៃការវីវត្តនិងរីកចម្រើនរបស់ប្រជាជាននៃប្រទេសចិន កាលពីព្រឹកថ្ងៃទី២៥ ខែកញ្ញា ឆ្នាំ២០១៩នេះ ជូនដល់ ឯកឧត្តម លោកជំទាវ លោក លោកស្រី ជាប្រធានក្រុមប្រឹក្សាខេត្ត និង សមាជិកសមាជិកាក្រុមប្រឹក្សាខេត្ត , គណៈអភិបាលខេត្ត , ប្រធាន អនុប្រធានមន្ទីរ អង្គភាពស្ថាប័ននានាជុំវិញខេត្ត និង អភិបាលក្រុងស្រុកទាំង១២សរុបចំនួនជាង៧០រូប ។
ក្នុងបទឧទ្ទេសនាម លោក យ៉ាវ ជានគូ បានលើកឡើងពីទំនាក់ទំនងប្រទេសទាំងពីរកម្ពុជានិងចិន ដែលមានប្រវត្តិទំនាក់ទំនង និងសាមគ្គីភាពជាភាតរៈ ជាប្រវត្តិសាស្ត្រមានតាំងពីយូរណាស់មកហើយ ហើយប្រទេសយើងទាំងពីរជាប្រទេសជិតខាង និងជាបងប្អូនល្អនឹងគ្នាទៀតផង ដូច្នេះតាមរយៈបទឧទ្ទេសនេះ នឹងជួយបង្កើនចំណងទាក់ទង សាមគ្គីភាព និងសហប្រតិបត្តិការគ្រប់ជ្រុងជ្រោយកាន់តែស៊ីជម្រៅថែមទៀត រវាងរដ្ឋាភិបាលនិង ប្រជាជននៃប្រទេសយើងទាំងពីរកាន់តែ ជ្រាលជ្រៅថែមទៀត ព្រមទាំងមើលឃើញពីភាពវិវដ្តរីកចម្រើនរបស់ប្រទេសទាំងពីរ ខណៈដែលប្រទេសយើងទាំងពីរតែងតែជួយជ្រោមជ្រែងនិងផ្តល់ការគាំទ្រដល់គ្នាទៅវិញទៅមកជាដរាប ជាពិសេសបាឋកថា អំពីដំណើរការប្រព្រឹត្ត វឌ្ឍនភាព និងការទទួលខុសត្រូវរបស់រដ្ឋាភិបាលនៃប្រជាជនចិន អស់រយ:កាល ៧០ឆ្នាំ ពីឆ្នាំ១៩៤៩ ដល់ឆ្នាំ ២០១៩ និងការរីក ចម្រើនលូតលាស់លើគ្រប់វិស័យរបស់ប្រទេសចិន ពោលគឺ បច្ចុប្បន្នចិនទទួលបានកំណើនសេដ្ឋកិច្ចឈរនៅលំដាប់ទី២ក្នុងពិភពលោក បន្ទាប់ពីសហរដ្ឋអាមេរិកខណៈដែលជប៉ុននៅលំដាប់ទី៣ ។
ក្នុងឱកាសនោះដែរលោក យ៉ាវ ជានគូ បានសម្ដែងនូវការកោតសរសើរដល់ភាពរីកចម្រើនលូតលាស់ជឿនលឿនលើគ្រប់វិស័យរបស់កម្ពុជា និងបានធ្វើឱ្យកំណើនសេដ្ឋកិច្ចប្រជាជនកម្ពុជាកើនឡើងគួរឱ្យកត់សម្គាល់ ហើយមូលហេតុដែលនាំឱ្យប្រទេសកម្ពុជាវិវត្តរីកចម្រើនអាចសម្រេចបានសមិទ្ឋផលដ៏ធំធេងនេះ គឺអាស្រ័យដោយកម្ពុជាក្រោមការដឹកនាំដ៏ត្រឹមត្រូវ និងឈា្លសវៃរបស់សម្តេចតេជោ ហ៊ុនសែន ជានាយករដ្ឋមន្ត្រី ទទួលបានការគាំទ្រដ៏លើសលុបពីសំណាក់ប្រជាពលរដ្ឋកម្ពុជា លើការដឹកនាំនេះ តាមរយៈសំឡេងការបោះឆ្នោតសកលសម្រាប់អាណត្តិទី៦ ។
ក្នុងបទឧទ្ទេសនាមរបស់លោក Zheng Xinye ព្រឹទ្ធបុរស មហា វិទ្យាល័យសេដ្ឋកិច្ចអនុវត្ត នៃសកលវិទ្យាល័យRenmin ប្រទេសចិន បានលើកឡើងពីគោលនយោបាយដឹកនាំកាត់បន្ថយភាពក្រីក្រជូនប្រជាពលរដ្ឋ , ការគ្រប់គ្រងសេដ្ឋកិច្ច និងអភិវឌ្ឍន៍សេដ្ឋកិច្ចនៅក្នុងមូលដ្ឋានជនបទនៃប្រទេសចិន ខណៈបច្ចុប្បន្ននេះ ប្រទេសចិនកំពុងអនុវត្តតាមកំណែទម្រង់លុបបំបាត់ភាពក្រីក្ររបស់ប្រជាជន ជាពិសេសនៅតាមមូលដ្ឋានជនបទ តាមរយៈការកសាងប្រព័ន្ឋ ហេដ្ឋារចនាសម្ព័ន្ឋនានាឱ្យដល់មូលដ្ឋាន ចាត់មន្ត្រីចុះអង្កេតសិក្សាពីមូលហេតុដែលប្រជាជនមួយចំនួននៅតែជួបការលំបាកនិងក្រីក្រ និងរកឱ្យឃើញពីមូលហេតុបណ្តាលឱ្យគាត់ក្រដើម្បីជួយពួកគាត់ឱ្យចំគោលដៅ និងផ្តល់ជូនគាត់នូវរបបសន្តិសង្គមសម្រាប់សុខុមាល ភាព សាធារណៈ ជាដើម។ល។
មានប្រសាសន៍ក្នុងឱកាសនោះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប បានចាត់ទុកបទបង្ហាញទាំងអស់របស់ក្រុមប្រតិភូចិន ជាខ្លឹមសារឯកសារពោរពេញទៅដោយបទពិសោធន៍ ក្នុងការដឹកនាំប្រទេសរបស់រដ្ឋាភិបាលប្រទេសចិន ទទួលបានការវិវត្តរីកចម្រើនទាំងខាងវិស័យសេដ្ឋកិច្ច និង ជាបទពិសោធន៍មួយបន្ថែមទៀតសម្រាប់កម្ពុជា ដែលបង្ហាញឱ្យឃើញពីស្មារតីជួយឧបត្ថម្ភជ្រោមជ្រែងគ្នាក្នុងភាពជាមិត្តភ័ក្រ និងជាបងប្អូនដ៏ល្អរវាងកម្ពុជា និងចិន ស្របតាមប្រវត្តិសាស្ត្រនៃការទំនាក់ទំនងគ្នាដ៏យូរលង់ណាស់មកហើយរវាងប្រទេសយើងទាំងពីរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
