អាជ្ញាធរជាតិអប្សរា នឹងសហការជាមួយអគ្គនាយិកាក្រុមហ៊ុនហេងអភិវឌ្ឍន៍ គ្រោងរៀបចំពិធីបួងសួងសុំសេចក្តីសុខ និងពិធីអកអំបុក នៅទីលានជល់ដំរី ក្នុងបរិវេណក្រុងអង្គរធំ ខេត្តសៀមរាប សម្រាប់ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅខែវិច្ឆិកាខាងមុខនេះ ក្នុងនោះព្រះសង្ឃមកពីបណ្តាប្រទេសចំនួន៥៩ នឹងនិមន្តចូលរួម ព្រមទាំងបើកទូលាយឱ្យភ្ញៀវទេសចរជាតិ និងអន្តរជាតិឱ្យចូលរួមដោយសេរីផងដែរ។
លោក ឡុង កុសល អ្នកនាំពាក្យអាជ្ញាធរជាតិអប្សរាបានឱ្យដឹងនៅព្រឹកថ្ងៃទី១ ខែតុលា ឆ្នាំ២០១៩ នេះថា នេះជាលើកទីមួយ នៅក្នុងតំបន់អង្គរ ដែលនឹងរៀបចំព្រឹត្តិការណ៍នេះ ដែលជាចំណែកមួយ ទាក់ទាញភ្ញៀវទេសចរផងដែរ។ ក្រៅពី ការទស្សនា ការប្រណាំងទូកនៅតាមដងស្ទឹង នៅក្នុងក្រុងសៀមរាប ប្រជាពលរដ្ឋទូទៅ រួមទាំងភ្ញៀវទេសចរបរទេស នឹងបានទស្សនាពិធីបួងសួងសុំសេចក្តីសុខ តាមបែបទំនៀមទំលាប់ប្រពៃណី វប្បធម៌ខ្មែរ ដែលនឹងមានរៀបចំជាវាលស្រែ មានស្រូវជានិមិត្តរូប រួមនឹងពិធីអកអំបុក។
លោកបានបញ្ជាក់ថា អាជ្ញាធរជាតិអប្សរា នឹងគាំទ្រដល់វិស័យឯកជន ក្នុងការចូលរួមរៀបចំព្រឹត្តិការបែបនេះ ដើម្បីលើកតម្កើងវប្បធម៌ ខ្មែរ ឱ្យកាន់តែរុងរឿងបន្តទៅមុខទៀត។ ជាមួយគ្នានេះដែរ លោកក៏បានអំពាវនាវឱ្យប្រជាពលរដ្ឋខ្មែរទាំងអស់ចូលរួម និងជួយផ្សព្វផ្សាយ ដល់ភ្ញៀវទេសចរបរទេស ចូលរួមនៅក្នុងព្រឹត្តិការណ៍នេះឱ្យបានច្រើន ដើម្បីបានឈ្វេងយល់កាន់ច្បាស់អំពីវប្បធម៌ ប្រពៃណី និងទំនៀមទំលាប់របស់ខ្មែរ៕
