នៅព្រឹកថ្ងៃទី០១ ខែតុលា ឆ្នាំ២០១៩នេះ មន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តសៀមរាប បានធ្វើការបិទផ្សាយជាសាធារណៈនូវឯកសារនៃការវិនិច្ឆ័យ ក្នុងនោះមាន ប្លង់សុរិយោដី និង បញ្ជីឈ្មោះម្ចាស់ដី ចំនួន១.៥៣៣ ក្បាលដី ស្ថិតក្នុងភូមិកសិកម្ម សង្កាត់ស្រង៉ែ ក្រុងសៀមរាប ក្នុងរយៈពេល១៥ថ្ងៃ គិតចាប់ពីថ្ងៃទី០១ ដល់ថ្ងៃទី១៥ ខែតុលា ឆ្នាំ២០១៩ នៅក្នុងបរិវេណវត្តមេត្តាករុណា ។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តសៀមរាប មានប្រសាសន៍ថា ក្នុងរយៈពេល១៥ថ្ងៃ ដោយគិតទាំងថ្ងៃបុណ្យនិងថ្ងៃឈប់សម្រាក តម្រូវឲ្យម្ចាស់ដី ឬនិងអ្នកកាន់កាប់ដី ព្រមទាំងស្ថាប័ន និង អង្គភាពពាក់ព័ន្ធទាំងអស់ មកចូលរួមពិនិត្យ ផ្ទៀងផ្ទាត់មើលទិន្នន័យនេះឲ្យបានគ្រប់ៗគ្នា ដើម្បីធានាបាននូវសុក្រឹត ត្រឹមត្រូវ ក្នុងការចេញវិញ្ញាបនបត្រសម្គាល់ម្ចាស់អចលនវត្ថុ ដែលហៅថា ប័ណ្ណកម្មសិទ្ធិ ព្រោះថា នេះជាឱកាសចុងក្រោយ ដែលម្ចាស់កម្មសិទ្ធិទាំងអស់ មានសិទ្ធិធ្វើការ កែ តម្រូវ ឬជំទាស់តវ៉ាបាន ក្នុងករណីដែលពិនិត្យមើលទៅឃើញថាមានកំហុសឆ្គង មកគណៈកម្មការរដ្ឋបាល ។
លោក ហ៊ី សាយ មានប្រសាសន៍បន្ថែមថា រយៈកាលកន្លងមក មន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តសៀមរាប បានធ្វើការបិទផ្សាយរួច និង បានចេញ-ចែកប័ណ្ណបានចំនួន ០៧ សង្កាត់ និង មួយឃុំ គឺ៖ សង្កាត់សៀមរាប បាន០៧ភូមិ , សង្កាត់សាលាកំរើក បាន០៧ភូមិ , សង្កាត់ស្វាយដង្គំ បាន១៤ភូមិ , សង្កាត់ជ្រាវ បាន០៧ភូមិ , សង្កាត់ស្លក្រាម បាន០៧ភូមិ , សង្កាត់គោកចក បាន០៧ភូមិ និង សង្កាត់នគរធំ បាន០១ភូមិ ព្រមទាំងឃុំអំពិល ស្រុកប្រាសាទបាគង បានចេញ-ចែកប័ណ្ណកម្មសិទ្ធិចំនួន០២ភូមិ ស្ថិតក្នុងអនុក្រឹត្យលេខ៥២ និង អនុក្រឹត្យលេខ ១៥៨ គឺភូមិព្រគុយ និង ភូមិគោកចាន់ ខណៈសង្កាត់សំបួរ ទើបបញ្ចប់ការបិទផ្សាយចំនួន០២ភូមិ នឹងឈានដល់ការចេញប័ណ្ណនាពេលឆាប់ៗខាងមុខនេះ ព្រមទាំងបាននឹងកំពុងអនុវត្តការចុះបញ្ជីដីដីធ្លីមានលក្ខណៈជាប្រព័ន្ធក្នុងស្រុកចំនួន០៤ទៀត គឺស្រុកសូទ្រនិគម , ស្រុកប្រាសាទបាគង , ស្រុកពួក និង ស្រុកក្រឡាញ់ ៕
អត្ថបទ និង រូបថត ៖ លោក លីវ សាន្ត
