នៅសាលប្រជុំសាលាខេត្តសៀមរាប នាព្រឹកថ្ងៃទី០២ ខែតុលា ឆ្នាំ២០១៩នេះ ការិយាល័យបច្ចេកទេស នៃមន្ទីរសុខាភិបាលខេត្ត បានរៀបចំកិច្ចប្រជុំប្រចាំត្រីមាសទី៣ នៃក្រុមការងារពិសេសថ្នាក់ខេត្ត សម្រាប់លុបបំបាត់ជំងឺគ្រុនចាញ់ ក្រោមអធិបតីភាពលោក ពិន ប្រាកដ អភិបាលរងខេត្ត និង លោកវេជ្ជបណ្ឌិត ជា ងួន អនុប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នៃក្រសួងសុខាភិបាល ដោយមានការអញ្ជើញចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាព ស្ថាប័ន ពាក់ព័ន្ឋមួយចំនួនក្នុងខេត្ត គណៈអភិបាលក្រុងស្រុក មន្ត្រីសុខាភិបាលនៃស្រុកប្រតិបត្តិ និង មន្ត្រីនៃមណ្ឌលសុខភាពតាមបណ្តាឃុំ-សង្កាត់ ក្នុងទូទាំងខេត្ត ។
កិច្ចប្រជុំនេះធ្វើឡើងក្នុងគោលបំណង ធ្វើបច្ចប្បន្នភាពអំពីស្ថាន ភាពជំងឺគ្រុនចាញ់ សមិទ្ឋផល បញ្ហាប្រឈម និងទិសដៅនៃការអនុវត្តឈានទៅរកការលុបបំបាត់ជំងឺគ្រុនចាញ់ក្នុងខេត្តសៀមរាប ពង្រឹងតួនាទីក្រុមការងារ និងអន្តរាគមន៍ក្នុងការឆ្លើយតបនឹងជំងឺគ្រុនចាញ់ ព្រមទាំងពិភាក្សាលើបញ្ហាដែលបានលើកឡើងក្នុងកិច្ចប្រជុំ ដើម្បីផ្តល់ និងទទួលនូវអនុសាសន៍សម្រាប់ទិសដៅដៅជំហានបន្ទាប់ ដើម្បីសម្រេចគោលដៅលុបបំបាត់ជំងឺគ្រុនចាញ់ ក្នុងនោះមាន ៖ ១- ពិនិត្យ ពិភាក្សាលើស្ថានភាពជំងឺគ្រុនចាញ់រយ:ពេល ៩ខែដើមឆ្នាំ២០១៩ , ២- ពិនិត្យវឌ្ឍនភាពការងារប្រយុទ្ធប្រឆាំងនឹងជំងឺគ្រុនចាញ់ និង ៣- ដកបទពិសោធន៍ការងារ បញ្ហាប្រឈម និងស្នើសុំអនុសាសន៍ ។
លោកវេជ្ជបណ្ឌិត ជា ងួន អនុប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ មានប្រសាសន៍ ថា តាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា កម្ពុជាមានគោលដៅលុបបំបាត់ជំងឺគ្រុនចាញ់ប្រភេទហ្វស៊ីប៉ារ៉ូមនៅត្រឹមឆ្នាំ២០២០ និងលុបបំបាត់ជំងឺគ្រុនចាញ់ប្រភេទវីវ៉ាក់នៅឆ្នាំ២០២៥ ខណៈដែលមកដល់បច្ចុប្បន្នជំងឺគ្រុនចាញ់ប្រភេទ ហ្វាស៊ីប៉ារ៉ូបថយចុះច្រើន ដែលតាមបណ្តាខេត្តខ្លះកាលពីមុនមាន១០០ករណី តែសព្វថ្ងៃ និន្នាការជំងឺធ្លាក់មកនៅត្រឹម១០ឬក៏១ករណីផងក៏មាន ដូច្នេះសង្ឃឹមនិងជឿជាក់ថា ការលុបបំបាត់ជំងឺគ្រុនចាញ់ប្រភេទហ្វាស៊ីប៉ារ៉ូមក្នុងឆ្នាំ២០២០ ច្បាស់ជាមានខេត្តខ្លះលុបបំបាត់បានជាក់ជាមិនខាន។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា នៅឆ្នាំ២០២០ខាងមុខនេះ ជាឆ្នាំគោលដៅលុបបំបាត់ជំងឺគ្រុនចាញ់ប្រភេទ ហ្វាស៊ីប៉ារ៉ូម និងលុបបំបាត់ជំងឺគ្រុនចាញ់ប្រភេទវីវ៉ាក់នៅឆ្នាំ២០២៥ យើងត្រូវពិនិត្យនិងតាមដានជាប្រចាំពិនិត្យនូវនិន្នាការនៃជំងឺ បើឃើញមានអត្រាកើនឡើងយើងត្រូវរិះរកយុទ្ឋសាស្ត្រថ្មីនិងរួមគ្នាដោះស្រាយ ដើម្បីឈានទៅលុបបំបាត់ជំងឺគ្រុនចាញ់តាមការកំណត់ប្រកបដោយប្រសិទ្ឋភាព និងទទួលបានលទ្ឋផលគាប់ប្រសើរ ដូច្នេះតាមរយៈនេះ សុំឲ្យក្រុមការងារពិសេសថ្នាក់ខេត្តសម្រាប់លុបបំបាត់ជំងឺគ្រុនចាញ់ខេត្ត ចូលរួមពិនិត្យលើការងារអនុវត្តកន្លង មករបស់យើង ថាតើនៅមានសេសសល់ចំណុចណាខ្លះ ដែលអនុវត្តមិនទាន់បានរលូន និងបានជួបបញ្ហាប្រឈម និងភាពងាយស្រួលដូចម្តេចខ្លះ គួរនាំគ្នាលើកយកបើកបង្ហាញឱ្យអស់ ដើម្បីរួមគ្នារិះរកវិធីសាស្ត្រដោះស្រាយ។
ក្នុងឱកាសនោះដែរ លោក ពិន ប្រាកដ បានជំរុញដល់ក្រុមការងារពិសេសថ្នាក់ខេត្ត បន្តការអប់រំពីវិធានការបង្ការជំងឺគ្រុនចាញ់ និងបំផុសលើកទឹកចិត្តចលនាចូលរួមរបស់ប្រជាជន ក្នុងការអនុវត្តសកម្មភាពលុបបំបាត់ប្រភពកកើតសត្វមូស ដង្កូវទឹក អនាម័យ បរិស្ថាន និងត្រូវស្វែងរកសេវាពិនិត្យ ពិគ្រោះ និងព្យាបាលជំងឺឲ្យបានត្រឹមត្រូវទាន់ពេលវេលា នៅមូលដ្ឋានសុខាភិបាលសាធារណៈដូចជា មណ្ឌលសុខភាព ឬមន្ទីរពេទ្យបង្អែក ដែលនៅជិតលំនៅដ្ឋានបំផុត ដើម្បីកាត់បន្ថយអត្រាឈឺ និងស្លាប់ដោយសារជំងឺគ្រុនចាញ់ឲ្យទទួលបាននូវប្រសិទ្ធភាពខ្ពស់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
