នៅថ្ងៃទី ០១ ខែតុលា ឆ្នាំ២០១៩នេះ លោក សូរ ប្លាតុង ប្រធានគណៈកម្មាធិការអនុសាខាកាកបាទក្រហមស្រុកប្រាសាទបាគង និងលោក ទៀប ប៊ុនឈួយ ប្រធានកិត្តិយសអនុសាខាកាកបាទក្រហមស្រុកប្រាសាទបាគង និង ក្រុមការងារ បានអញ្ជើញជួបសួរសុខទុក្ខ និងនាំយកអំណោយ ថវិកាមនុស្សធម៌ របស់អនុសាខាកាកបាទក្រហមកម្ពុជាស្រុក ផ្តល់ជូនគ្រួសាររងគ្រោះដោយខ្យល់កន្ទ្រាក់របើកដំបូលផ្ទះចំនួន ២គ្រួសារ រួមមាន៖ គ្រួសារទី១ លោក បេង រ៉ានី និងប្រពន្ធឈ្មោះ ហឿម ស្រីតូច រស់នៅភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាប, គ្រួសារទី២៖ លោក សាំង សាក់ និងប្រពន្ធឈ្មោះ រិទ្ធី រក្សា រស់នៅភូមិត្រពាំងទឹម ឃុំកណ្តែក ស្រុកប្រាសាទបាគង ខេត្តសៀមរាប។
អំណោយមនុស្សធម៌ និងថវិកាបានផ្តល់ជូននាពេលនោះដែរ គឺក្នុង ១គ្រួសារទទួលបានរួមមាន ៖ អង្គរ ២៥គ.ក្រ ទឹកត្រី១យួរទឹកស៊ីអ៊ីវ១យួរ ទឹកបរិសុទ្ធវីតាល់១កេស មី ១កេស តង់១ ឡាំងទឹក១ កន្ទេល១ មុង១ ភួយ១ចានដែក១ ចានសម្ល៥ ចានបាយ៥ ចានស្រាក់១ និងថវិកា ៥៥០,០០០ រៀល ។
មានប្រសាសន៍នាឱកាសនោះ លោក សូរ ប្លាតុង បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ព្រមទាំងសម្ដែងនូវការសោកស្តាយជាពន់ពេក ចំពោះចំពោះគ្រួសារដែលរងគ្រោះនៅនេះ ហើយក្នុងនាមកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន មិនទុកចោលបងប្អូនប្រជាពលរដ្ឋក្នុងមូលដ្ឋានឱ្យនៅកណ្ដោយកណ្ដែងឡើយ ដូចពាក្យស្លោកលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
