អភិបាលក្រុងសៀមរាប លោក សូរ ប្លាតុង បានឱ្យដឹងថា ប្រជាជនកម្ពុជា នឹងប្រារព្ធពិធីបុណ្យភ្ជុំបិណ្ឌដែលនឹងចាប់ផ្តើម នៅថ្ងៃទី៨ ដល់ទី១០ ខែតុលានេះ ដូច្នេះទីវត្តអារាម នឹងមានសកម្មភាពមមាញឹកជាងគេ និងជាគោលដៅសម្រាប់ការប្រារព្ធពិធីមួយនេះ ដូច្នេះ អាជ្ញាធរក្រុងសៀមរាប បានរៀបចំផែនការការពារសន្ដិសុខសណ្ដាប់ធ្នាប់រួចហើយដែរ ដែលគោលដៅសំខាន់ៗសម្រាប់ការការពារ មានទីវត្តអារាម និងតំបន់ទីសក្ការៈបូជានានា ដូចជាព្រះអង្គចេក ព្រះអង្គចម ដែលប្រជាជនជាច្រើនមានជំនឿ និងគោរពបូជា ហើយក្រុមការងាររបស់លោក ក៏បានរៀបចំផែនការការពារសណ្ដាប់ធ្នាប់ក្នុងក្រុងរួចហើយ ក្នុងឱកាសបុណ្យភ្ជុំបិណ្ឌនេះ ។
លោកអភិបាលក្រុង បានបញ្ជាក់បន្ថែមថា ទោះក្នុងឱកាសបុណ្យភ្ជុំនេះ មិនសូវមមាញឹក ដោយសារពលរដ្ឋខ្មែរភាគច្រើន ធ្វើដំណើរទៅតាមខេត្ត និងស្រុកកំណើតយ៉ាងណាក្ដី តែកម្លាំងរបស់លោក នៅតែដាក់ពង្រាយ និងយាមកាម ការពារសុវត្ថិភាពដល់ពលរដ្ឋ ពិសេសភ្ញៀវទេសចរ ដែលធ្វើដំណើរមកកម្សាន្តខេត្តសៀមរាម ក្នុងអំឡុងរដូវភ្ជុំបិណ្ឌនេះ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
