សមត្ថកិច្ចស្រុកពួកបានឲ្យដឹងថា កាលពីវេលាម៉ោង០៩និង១០នាទីព្រឹក ថ្ងៃទី១១ ខែតុលា ឆ្នាំ២០១៨នេះ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្ត និង ម៉ូតូ នៅលើផ្លូវជាតិលេខ០៦ ត្រង់ចំណុចចន្លោះគីឡូម៉ែត្រលេខ៣២៦និង៣២៧ ក្នុងទឹកដីភូមិព្រៃក្មេង ឃុំខ្នាត ស្រុកពួក ខេត្តសៀមរាប បណ្ដាលឲ្យមនុស្សម្នាក់បានស្លាប់ភ្លាមនៅនឹងកន្លែងកើតហេតុ ។
សមត្ថកិច្ចស្រុកពួកបានឲ្យដឹងទៀតថា ហេតុការណ៍នោះគឺ មុនពេលកើតហេតុ មានរថយន្តម៉ាកហ៊ីយ៉ាន់ដាយ ពណ៌ ស ពាក់ស្លាកលេខត្បូងឃ្មុំ 3A-1188 សណ្ដោងរ៉ឺម៉កពណ៌ខៀវ 4A-0105 បើកបរដោយឈ្មោះ ផុន ម៉េងស្រ៊ី ភេទប្រុស អាយុ ២៣ឆ្នាំ មុខរបរបើកបរ រស់នៅភូមិជ្រួស ឃុំចក ស្រុកអូររាំងឪ ខេត្តកំពង់ចាម បើកបរមកពីទិសខាងលិចទៅទិសកើតដឹកដំឡូងមីចំនួន២៧តោន ត្រូវបានសមត្ថកិច្ចឃាត់ខ្លួនក្រោយពីកើតហេតុ រីឯម៉ូតូម៉ាកហុងដាឌ្រីម ពណ៌ខ្មៅ សេរីឆ្នាំ២០១៧ ពាក់ស្លាកលេខសៀមរាប 1Y-5509 បើកបរដោយឈ្មោះ ឆៃ រ៉ាដឿង ភេទប្រុស អាយុ២៣ ឆ្នាំ រស់នៅភូមិជ័យ សង្កាត់ទឹកវិល ក្រុងសៀមរាប បានទទួលរងគ្រោះស្លាប់នៅនឹងកន្លែងកើតហេតុ មុខរបរជាងសំណង់ បើកបរមកពីទិសខាងកើតទៅទិសខាងលិច ។
សមត្ថកិច្ចស្រុកពួកបានឲ្យដឹងបន្ថែមទៀតថា មូលហេតុដែលបង្កឲ្យកើតមានករណីគ្រោះថ្នាក់ចរាចរណ៍នេះ គឺអ្នកបើកបរម៉ូតូ បានបើកវ៉ារថយន្ត១បាំងកន្លះមិនស្គាល់អត្តសញ្ញាណ បានរេចង្កូត ហើយបើកបុកពីមុខនិងចូលក្រោមរថយន្តធុនធំដឹកដំឡូងមី ។
ក្រោយពេលកើតហេតុ សមត្ថកិច្ចនគរបាលជំនាញស្រុកពួក បានចុះទៅពិនិត្យ និងធ្វើការវាស់វែង និងដកហូតវត្ថុតាងយកមករក្សារទុកនៅអធិការដ្ឋាននគរបាលស្រុកពួក ដើម្បីអនុវត្តនីតិវីធីបន្ត ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
