ក្នុងឱកាសជួបជាពិភាក្សាជាមួយអភិបាលខេត្តសៀមរាប កាល ពីថ្ងៃទី១១ ខែតុលា ម្សិលមិញនេះ ឯកឧត្តម សៅ សុភាព រដ្ឋលេខាធិការក្រសួងបរិស្ថាន មានប្រសាសន៍ថា បញ្ហាសោភ័ណភាពទីក្រុងដែលកំពុងមានការអភិវឌ្ឍកាន់តែប្រសើរឡើង វាមិនមែនជាព្រំដែនកំណត់បញ្ចប់ការគិតគូអំពីបរិស្ថាននោះទេ ដរាបណាបញ្ហាសំរាម សំណល់ផ្ទះបាយ ដែលមនុស្សមានតម្រូវការបញ្ចេញចោលជាប្រចាំថ្ងៃនោះ ដូច្នេះ ដើម្បីធានាលើការដោះស្រាយសំណល់ទាំងនោះ ការប្រមូលនិងគ្រប់គ្រងសំរាមក្នុងក្រុងសៀមរាប ត្រូវមានការកំណត់ឲ្យបានច្បាស់លាស់ ទីតាំងចាក់សំរាម ដែលអាចធានាអាយុកាលយូរអង្វែង និង មិនបណ្តាលឲ្យមានផលប៉ះពាល់បរិស្ថានសហគមន៍ប្រជាពលរដ្ឋ ពីព្រោះ សំរាមវាជាបញ្ហាគ្រោះថ្នាក់បំផុត ចំពោះសុខភាពប្រជាពលរដ្ឋដែលរស់នៅជិតទីតាំងចាក់សំរាមនោះ ។
ពាក់ព័ន្ធនឹងបញ្ហានេះ ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានមានប្រសាសន៍ថា គោលដៅទាំង៤សង្កាត់ក្នុងក្រុងសៀមរាប លើការងារប្រមូលសម្រាមក្នុងរយៈពេលកន្លងមកនេះ មានក្រុមហ៊ុនកាអ៊ែរ ជាអ្នកប្រមូលដឹកជញ្ជូន ហើយក្រុមហ៊ុននេះ នឹងត្រូវបានបញ្ចប់កិច្ចសន្យារបស់ខ្លួន នៅថ្ងៃទី០១ ខែមករា ឆ្នាំ២០១៩ ខាងមុខ នេះ ហើយនឹងមានក្រុមហ៊ុនថ្មីចូលមកជំនួស ដូច្នេះសង្ឃឹម ថា ក្រុមហ៊ុនប្រមូលដឹកជញ្ជូនសំរាមថ្មីនេះ នឹងមានកិច្ច សហការល្អជាមួយអាជ្ញាធរក្រុងសៀមរាប ជាមួយនឹងមធ្យោបាយ កម្លាំងប្រតិបត្តិការ និង ទីតាំងថ្មីសម្រាប់ចាក់ សំរាម ដែលមានទំហំធំ ធានាថាមិនបង្កផលវិបាកដល់សហគមន៍ប្រជាពលរដ្ឋនោះទេ ខណៈពេលដែលក្រុមហ៊ុន កាអ៊ែរ មិនបានគោរពទៅតាមកិច្ចសន្យា ធ្វើឲ្យប្រជាពលរដ្ឋរស់នៅជិតទីតាំងចាក់សម្រាម តែងធ្វើការ តវ៉ា និង បិទផ្លូវមិនឲ្យរថយន្តដឹកសំរាមចូលចាក់ជាច្រើនលើកមកហើយនោះ ៕
អត្ថបទ និង រូបថត : លោក ហិន គឹមឡេង
កែសម្រួលអត្ថបទ : លោក លីវ សាន្ត
