លោកបណ្ឌិត អ៊ា ដារិទ្ធ អនុប្រធានមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរនៃអាជ្ញាធរជាតិអប្សរា ត្រូវបានសកលវិទ្យាល័យ CORNELL សហរដ្ឋអាមេរិក អញ្ជើញឱ្យទៅសហការបង្រៀនជាមួយសាស្ត្រាចារ្យ Kaja McGowan រយៈពេល១ឆមាស ចាប់ពីថ្ងៃទី១ សីហា ដល់២៤ ធ្នូ ឆ្នាំ២០១៨ លើមុខវិជ្ជាទឹក ក្នុងនោះអំពីសិល្បៈនិងនយោបាយនៅតំបន់អាស៊ីខាងត្បូងនិងអាស៊ីអគ្នេយ៍ ដែលខ្លឹមសារសំខាន់នៃមេរៀននោះ គឺបង្ហាញនយោបាយគ្រប់គ្រងទឹកនៃអរិយធម៌អង្គរ និងសារៈសំខាន់នៃទឹកក្នុងជំនឿសាសនា ពិសេសទឹកអម្រិតនៅក្នុងទេវកថាកូរសមុទ្រទឹកដោះ បន្ទាប់ពីរូបលោក ធ្លាប់បានឆ្លងកាត់ជីវិតសិក្សា បទពិសោធន៍ការងារផ្នែកបុរាណវិទ្យា និងការស្រាវជ្រាវជាង២០ឆ្នាំជាមួយស្ថាប័នជាតិ-អន្តរជាតិ ។
លើសពីនោះ លោកបណ្ឌិត អ៊ា ដារិទ្ធ បានបង្រៀនប្រវត្តិ សាស្ត្រខ្មែរសង្ខេប ពីសម័យហ្វូណនរហូតដល់សម័យបច្ចុប្បន្ន កុលាលភាជន៍ខ្មែរ ការចុះបញ្ជីបេតិកភណ្ឌពិភពលោកអង្គរ និងការគ្រប់គ្រងបេតិកភណ្ឌអង្គរដោយអាជ្ញាធរជាតិអប្សរារួមទាំងការផ្សព្វផ្សាយអំពីការរៀនភាសាខ្មែរ និងអំពាវនាវឱ្យនិស្សិតអន្តរជាតិចាប់អារម្មណ៍ពីប្រទេសខ្មែរ ទាំងផ្នែកបុរាណដ្ឋាននិងប្រវត្តិសាស្ត្រផងដែរ ។
លោកបណ្ឌិត អ៊ា ដារិទ្ធ មានប្រសាសន៍ថា នេះជាមោទកភាពណាស់សម្រាប់រូបលោក ក៏ដូចជាស្ថាប័នអាជ្ញាធរជាតិអប្សរា ដែលបានចែករំលែកបទពិសោធន៍ការងារគ្រប់គ្រងបេតិកភណ្ឌអង្គរ រយៈពេល២៥ ឆ្នាំដល់និស្សិតអន្តរជាតិនៅសហរដ្ឋអាមេរិក។
សូមបញ្ជាក់ថា លោកបណ្ឌិត អ៊ា ដារិទ្ធ បានបញ្ចប់ថ្នាក់បរិញ្ញាបត្របុរាណវិទ្យានៅសាកលវិទ្យាល័យភូមិន្ទវិចិត្រសិល្បៈនាឆ្នាំ១៩៩៥ ថ្នាក់អនុបណ្ឌិតនៅសកលវិទ្យាល័យ Kyoto នៅឆ្នាំ២០០០ និងថ្នាក់បណ្ឌិតនៅសកលវិទ្យាល័យ Osaka Ohtani នៃប្រទេសជប៉ុន នាឆ្នាំ២០១០ ។
លោកបានបំពេញការងារនៅស្ថាប័នអាជ្ញាធរជាតិអប្សរាចាប់ពីឆ្នាំ២០០០មក ហើយជាសាស្ត្រាចារ្យនៃសាកលវិទ្យាល័យភូមិន្ទវិចិត្រសិល្បៈ មហាវិទ្យាល័យបុរាណវិទ្យាលើមុខវិជ្ជាប្រវត្តិកុលាលភាជន៍ខ្មែរ និងជាសាស្ត្រាចារ្យបង្រៀនពីប្រវត្តិសាស្ត្រខ្មែរ និងអរិយធម៌ពិភពលោកនៅសលវិទ្យាល័យបញ្ញាសាស្ត្រក្នុងខេត្តសៀមរាប។
នៅឆ្នាំ២០០៤ លោកបានទទួលអាហារូបករណ៍ពី Asian Cultural Council, USA ដើម្បីសិក្សាអំពីរបៀបគ្រប់គ្រងវត្ថុបុរាណដែលបានពីកំណាយរហូតដល់អភិរក្សនៅ Arizona State University, Freer/Sackler Galleries (Smithsonian) និង University of Pennsylvania Museum of Archaeology and Anthropology ហើយលោកក៏ជាសហប្រធាននៃគម្រោងស្រាវជ្រាវ Field school សហការជាមួយសិង្ហបុរីនៅកោះកែរនិងនៅតំបន់អង្គរជាច្រើនលើកផងដែរ៕
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
