នារសៀលថ្ងៃអាទិត្យទី១៤ ខែតុលា ឆ្នាំ២០១៨ បន្ទាប់ទទួលបដិសណ្ឋាកិច្ចស្វាគមន៍យ៉ាងកក់ក្ដៅ នៅឯអាកាសយានដ្ឋានអន្តរជាតិសៀមរាប ប្រតិភូជាន់ខ្ពស់ នៃសាធារណរដ្ឋស្លូវាក បានអញ្ជើញទៅទស្សនារមណីយដ្ឋានទេសចរណ៍វប្បធម៌ ប្រវត្តិសាស្ត្រ ប្រាសាទអង្គវត្ត ដែលជាស្ថាបត្យកម្មអច្ឆរិយដ៏អស្ចារ្យរបស់កម្ពុជា។
តាមរយៈសម្រង់សំដីពីអ្នកបកប្រែភាសា ឯកឧត្តម ឧបនាយករដ្ឋមន្ត្រីប្រទេសស្លូវ៉ាក មានប្រសាសន៍ថា៖ ឯកឧត្តម និងក្រុមគណៈប្រតិភូនៃប្រទេសស្លូវ៉ាក ខណៈ អញ្ជើញទៅទស្សនាប្រាសាទអង្គរវត្ត ដោយបានសម្តែងនូវអារម្មណ៍រំភើប ជាមួយនឹងប្រាង្គប្រាសាទបុរាណដ៏ធំស្កឹមស្កៃគួរជាទីស្ញប់ស្ញែងប្រកបដោយក្បូរក្បាច់រចនាដែលមនុស្សជាតិក្នុងពិភពលោកកោតសរសើរមិនដាច់ពីមាត់។
ឯកឧត្តម បញ្ជាក់ថា៖ កន្លងមកឯកឧត្តម ធ្លាប់បានទៅទស្សនកិច្ចនៅបណ្តាប្រទេសមួយចំនួននៅក្នុងតំបន់អាស៊ីនេះដែរ តែកម្ពុជាមានការចាប់អារម្មណ៍ខ្លាំងជាងគេ ជាពិសេសប្រាសាទអង្គរវត្តពិតជាអស្ចារ្យហួសពីការស្មាននិងបង្កើតនូវមនោសញ្ចេតនាដក់ជាប់ក្នុងអារម្មណ៍ តាមការវាយតម្លៃរបស់ឯកឧត្តមផ្ទាល់ប្រាសាទអង្គរ ពិតជាអច្ឆរិយៈវត្ថុក្នុងលោក ដែលមិនអាចគណនាបាន។
នាល្ងាចថ្ងៃដដែលនេះដែរ ក្នុងឱកាសអបអរសាទរការមកដល់ និងដំណើរទស្សនកិច្ចផ្លូវការ របស់គណៈប្រតិភូជាន់ខ្ពស់នៃប្រទេសស្លូវ៉ាកនៅខេត្តសៀមរាប ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានរៀបចំពិធីលៀងសាយសាយភោជន៍ ដើម្បីផ្តល់នូវភាពកក់ក្តៅ និងឆ្លុះបង្ហាញពីចំណងសាមគ្គីភាព និងសហប្រតិបត្តិការ ជាមួយគ្នាទៅវិញទៅមកឱ្យកាន់តែជិតស្និទ្ឋថែមទៀត។ ក្នុងឱកាសស្នាក់នៅខេត្តសៀមរាប ឯកឧត្តម និងក្រុមគណៈប្រតិភូនៃសាធារណៈរដ្ឋស្លូវ៉ាក នឹងទៅទស្សនានៅតំបន់បឹងទន្លេសាប និង បុរាណដ្ឋានមួយចំនួនក្នុងខេត្តសៀមរាប ហើយនឹងបន្តដំណើរទៅកាន់រាជធានីភ្នំពេញ
ដោយឡែក ថ្ងៃទី១៥ខែតុលា បន្ទាប់ពីគណៈប្រតិភូជាន់ខ្ពស់ នៃសាធារណៈរដ្ឋស្លូវ៉ាក ទៅទស្សនានៅតំបន់ធម្មជាតិបឹងទន្លេសាប ឯកឧត្តម ភីធើ កាស្ស៊ីមៀ Peter Kazimir នឹងដឹកនាំប្រតិភូ ទៅចូលជួបសម្តែងការគួរសម និងពិភាក្សាការងារសំខាន់ៗ ជាមួយប្រមុខដឹកនាំជាន់ខ្ពស់របស់ព្រះរាជាណាចក្រកម្ពុជា នៅឯរាជធានីភ្នំពេញ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
