ថ្ងៃទី១៥ ខែ តុលាឆ្នាំ២០១៨ ជាថ្ងៃគម្រប់ខួប០៦ឆ្នាំ នៃការយាងចូលទីវង្គតរបស់ព្រះករុណាសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាជាតិ ព្រះបរមរតនកោដិ អតីតព្រះមហាក្សត្រនៃព្រះរាជាណាចក្រកម្ពុជា។
ឯកឧត្តម បណ្ឌិត ឃឹម ប៊ុនសុង អភិបាលនៃគណៈអភិបាលខេត្ត ឯកឧត្តម អ៊ឹង ហឿន ប្រធានស្តីទីក្រុមប្រឹក្សាខេត្ត ព្រមទាំងឯកឧត្តម លោកជំទាវជាគណៈអភិបាលខេត្ត សមាជិកក្រុមប្រឹក្សាខេត្ត ស្នងការនគរបាល មេបញ្ជាការ បញ្ជាការង កងកម្លាំងប្រដាប់អាវុធ និង អស់លោក លោកស្រីជាថ្នាក់ដឹកនាំមន្ទីរ មន្ត្រីរាជការ សហភាពសហព័ន្ធ យុវជនកម្ពុជាខេត្ត ពាណិជ្ជករ និង ប្រជាពលរដ្ឋ ក្នុងខេត្តសៀមរាប បានអញ្ជើញ ថ្វាយគរោនផ្កា ធ្វើអភិវន្ទនកិច្ច គោរពឧទ្ទិស ចំពោះដួងព្រះវិញ្ញាណខ័នព្រះបរមរតនកោដ្ឋ ព្រះករុណាព្រះបាទសម្តេចព្រះនរោត្តមសីហនុ ក្នុងព្រះរាជពិធីគម្រប់ខួប៦ឆ្នាំ នៃការយាងចូលទីវង្គតរបស់ព្រះអង្គនៅព្រះរាជបូជនីយដ្ឋាន ព្រះរាជដំណាក់ ខេត្តសៀមរាប។
ក្នុងទឹកមុខស្រងូតស្រងាត់ របស់ថ្នាក់ដឹកនាំ មន្ត្រីរាជការកងកម្លាំងប្រដាប់អាវុធនិងអង្គភាពស្ថាប័នពាក់ព័ន្ធ បានបង្ហាញនូវ កត្តញ្ញូតាធម៌ និងសូមឧទ្ទិសដល់ដួងវិញ្ញាណខន័ ព្រះអង្គគង់ប្រថាប់ដោយសុខក្សេមក្សាន្តនាទីឋានបរមសុខកុំបីឃ្លាងឃ្លាតឡើយ និងសម្តែងនូវក្តី សោកស្តាយ អាឡោះអាល័យនឹកឃើញនូវព្រះគុណូបការៈដ៏ថ្លៃថ្លា និងវិសេសវិសាលដ៏ឧត្តុង្គឧត្តមបំផុត ចំពោះស្នាព្រហស្ថរបស់ព្រះករុណា ដែលបានបន្សល់ទុកនៅសមទ្ធិផលជាច្រើន សម្រាប់ជាតិ មាតុភូមិកូនចៅប្រជារាស្ត្រកម្ពុជាទូទាំងប្រទេស ដែលក្នុងមួយព្រះជន្មរបស់ព្រះអង្គ ព្រះអង្គបានលះបង់ទាំងព្រះកាយពល និង ព្រះបញ្ញាញាណ ដើម្បីបុព្វហេតុជាតិ ក្នុងការទាមទានូវឯករាជ្យជាតិ បុរណៈភាពទឹកដីពីអាណានិគមបារាំងសេស និង ដណ្តើមបានខេត្តមួយចំនួនពីប្រទេសសៀម ព្រមទាំងប្រាសាទព្រះវិហារ និងសមិទ្ឋផលជាច្រើនដែលមិនអាចកាត់ថ្លៃបានជាពិសេសការបង្រួបបង្រួបជាតិនៅទស្សវត្សទី៩០នេះ ផងដែរ។
លោក ឧកញ៉ា ហ៊ុយ ភៀវ ប្រធានសភាពាណិជ្ជកម្មខេត្តសៀមរាប ឧត្តរមានជ័យ បានមានប្រសាសន៍ថា៖ នេះជាឆ្នាំទី៦ ដែលថ្នាក់ដឹកនាំខេត្តសៀមរាប បានប្រាព្ធពិធីនេះដើម្បីសម្តែងនូវការដឹងគុណចំពោះព្រះគុណូបការៈរបស់ព្រះអង្គដែលព្រះអង្គបានបំពេញចំពោះជាតិមាតុភូមិកម្ពុជាទាំងមូល នេះជាការបាត់បង់ដ៍ធំធេងសម្រាប់ព្រះរាជាណាចក្រកម្ពុជាយើង ពិតមានមានការសោកស្តាយនិងអាឡោះអាល័យជាទីបំផុត។
លោកបញ្ជាក់ទៀតថា៖ ក្នុងនាមយើងខ្ញុំព្រះករុណជាកូនចៅរបស់ព្រះអង្គ យើងខ្ញុំព្រះករុណានៅតែចងចាំជានិច្ចនូវស្នាព្រហស្ថដ៍ធំធេង របស់ព្រះអង្គក្នុងការដណ្តើមឯករាជ្យពីអាណានិគមបារាំង និងបាននាំមកនូវរបបប្រជាធិបតេយ្យរាជានិយមអាស្រ័យធម្មនុញ្ញ ដែលបានធ្វើឱ្យប្រជាពលរដ្ឋទទួលបានសុខសន្តិភាព និងការអភិវឌ្ឍប្រទេសជាតិ រីកចម្រើនលើគ្រប់វិស័យ រហូតមកដល់សព្វថ្ងៃនេះ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
